ورتالىق كوممۋنيكاتسيالار قىزمەتىندە وتكەن بريفينگىدە تابيعي مونوپوليالاردى رەتتەۋ كوميتەتى توراعاسىنىڭ مىندەتىن اتقارۋشىسى اسحات جاپسارباي ەلەكتر قۋاتىنىڭ ءتاريفى جايلى اقپارات بەردى.
«شىنىمەن دە, ەنەرگەتيكا مينيسترلىگى ەلەكتر قۋاتىن ءوندىرۋشى ۇيىمدار ءۇشىن ءتاريفتى ورتا ەسەپپەن 15 پايىزعا كوتەرگەن بولاتىن. قاراپايىم ەلەكتر تۇتىنۋشىلارعا ونىڭ اسەرى قانداي بولاتىنىنا كەلسەك, قازىر بۇل ماسەلە پىسىقتالىپ جاتىر. تاريف ورتا ەسەپپەن 7,2 پايىزعا وسەدى. ياعني وڭىرلەر اراسىندا ايىرماشىلىق بولادى. بۇل ءتاريفتى كوتەرگەن كەزدە قاراپايىم حالىققا اسەر ەتپەيتىندەي ەتىپ وتكىزۋگە تىرىسامىز. ياعني سارالانعان تاريف بەلگىلەيمىز. وسىنىڭ ارقاسىندا قاراپايىم حالىققا اۋىر تيمەيتىندەي تاريف بەكىتىلەدى دەپ ۇمىتتەنەمىز», دەدى كوميتەت باسشىسى.
ونىڭ ايتۋىنشا, 1 قىركۇيەكتەن باستاپ بىرنەشە وڭىردە تاريف جوسپار بويىنشا كوتەرىلمەك.
«تاريف 1 قىركۇيەكتەن باستاپ كوتەرىلەدى. 1 ساۋىردەن باستاپ ەلەكتر وندىرۋشىلەرى ءۇشىن تاريف كوتەرىلگەن بولاتىن. 1 شىلدەدە تاريفتەردىڭ ءبىر بولىگىن كوتەردىك. باياندامادا 7 پايىز دەپ ايتقانىم وسى بولاتىن. 1 قىركۇيەكتەن باستاپ تاريف كوتەرىلىپ ۇلگەرمەگەن وڭىرلەردە وزگەرىس بولادى. سوندا رەسپۋبليكا بويىنشا ورتا ەسەپپەن 3,5 پايىز پايىز بولۋى كەرەك», دەپ ناقتىلادى اسحات جاپسارباي.
