وڭىردەگى جاعدايدى قاداعالاۋ جانە تالداۋ, كۇشتەر مەن قۇرالداردىڭ تاۋلىكتىك كەزەكشىلىگىن ۇيىمداستىرۋ بويىنشا مىندەتتەر قويىلدى. جوعارى قىراعىلىقتى قامتاماسىز ەتۋ ماقساتىندا اسكەري قىزمەتشىلەردىڭ كەزەكشىلىك اتقارۋى بويىنشا جۇكتەمەنى بىردەي ءبولۋ قاجەتتىلىگىنە نازار اۋدارىلدى. «تۋىندايتىن سىن-قاتەردى ۇدايى باعالاپ, قازىرگى ۋاقىتتا ءبىز ءۇشىن اناعۇرلىم ماڭىزدى جانە نەگىزگى كۇش-جىگەردى قايدا باعىتتاۋ كەرەك ەكەنىن ايقىنداۋ قاجەت», دەيدى قورعانىس ءمينيسترى, گەنەرال-لەيتەنانت نۇرلان ەرمەكباەۆ.
الداعى اپتادا ۆزۆودتاردىڭ جاۋىنگەرلىك وق اتۋى, اسكەري مىندەتتىلەرمەن جيىندار, باتالوندارمەن باقىلاۋ ساباقتارى جوسپارلانىپ وتىرعان اسكەرلەردەگى جاۋىنگەرلىك وقۋ-جاتتىعۋ بارىسى تۋرالى باياندالدى. زاپاستاعى, اسىرەسە تاپشى ماماندىعى بار وفيتسەرلەردى اسكەري قىزمەتكە شاقىرۋ ماسەلەسى كوتەرىلدى. اتاپ ايتقاندا, ارميانىڭ ەپيدەمياعا قارسى ءىس-شارالارعا قاتىسۋى زاپاستاعى وفيتسەرلەر باعدارلاماسى بويىنشا اسكەري كافەدرالاردا دايىندالاتىن جانە وفيتسەر اتاعىن العاننان كەيىن ارميادا قىزمەت وتكەرگىسى كەلمەيتىن اسكەري دارىگەرلەردىڭ قاجەت ەكەنىن كورسەتتى.
زاڭناماعا وفيتسەر اسكەري اتاعىن العان اسكەري كافەدرانى بىتىرۋشىلەردى مىندەتتى تۇردە اسكەري قىزمەت وتكەرۋ ءۇشىن اسكەرگە شاقىرۋ بويىنشا تۇزەتۋلەر ەنگىزۋ ماسەلەسى تالقىلاندى. «بارلىق ستۋدەنتتەر مەن جوعارى وقۋ ورىندارىنىڭ باسشىلارى اسكەري كافەدرادا وقۋ – ويىن-ساۋىق جانە زاپاستاعى وفيتسەردىڭ اسكەري بيلەتتى الۋ ءتاسىلى ەمەس, ەڭ الدىمەن – ەل مۇددەسى ءۇشىن قارۋلى كۇشتەردە قىزمەت ەتۋگە دايىن ەكەندەرىن ءتۇسىنۋى ءتيىس», دەدى ۆەدومستۆو باسشىسى.
كۇزدە اسكەرگە شاقىرۋ ناۋقانىنا دايىندالۋ شەڭبەرىندە اسكەري بولىمدەر كازارمالىق-تۇرعىن ءۇي قورىنىڭ جاي-كۇيى قارالدى. مەردىگەر ۇيىمداردىڭ جەكە عيماراتتاردى جوندەۋ قارقىنىنىڭ جەتكىلىكسىز بولۋى تۋرالى ايتىلدى. ولار بەلگىلەنگەن مەرزىمدە تاپسىرىلماۋى مۇمكىن. مۇنداي بۇزۋشىلىق ءبىرىنشى رەت بولىپ وتىرماعانى اتاپ ءوتىلدى, ويتكەنى كەيبىر جاعدايدا قۇرىلىس بويىنشا قىزمەتتەردى كورسەتۋگە ارنالعان كونكۋرستاردى اسكەري وبەكتىلەردە جۇمىس ىستەۋ تاجىريبەسى جوق, تومەن باعا ەسەبىنەن «كەزدەيسوق» ۇيىمدار جەڭىپ الادى. جالپى, قازىرگى كەزدە قارۋلى كۇشتەردەگى عيماراتتاردى سالۋ جانە كۇردەلى جوندەۋ سالاسىنداعى اۋتسورسينگتىڭ قولدانىستاعى جۇيەسى مەرزىمدەرگە, جۇمىس ساپاسىنا جانە قورعانىس جاعدايىنا تەرىس اسەر ەتەتىن كوپتەگەن كەمشىلىكتەردى انىقتايدى. الداعى ۋاقىتتا وسىنداي جاعدايلارعا جول بەرمەۋ بويىنشا جۇيەلى ۇسىنىستار ەنگىزۋگە, سونداي-اق كازارمالىق-تۇرعىن ءۇي قورىنىڭ ۋاقتىلى بەرىلۋىن قامتاماسىز ەتۋگە نۇسقاۋلار بەرىلدى.
