وليمپياداعا اقتوبە, شىمكەنت جانە قىزىلوردا قالاسىنان ءتورت وقۋشى, ياعني رەسپۋبليكالىق پاندىك وليمپيادانىڭ جەڭىمپازدارى قاتىستى. ۇلتتىق قۇرامانى جارىسقا تاجىريبەلى پەداگوگتەر مەن جاتتىقتىرۋشىلار دايىندادى.
زياتكەرلىك سايىستىڭ تاپسىرمالارىن جوعارى دەڭگەيدە ورىنداعان قازاقستاندىق ءتورت قاتىسۋشىنىڭ ۇشەۋى جۇلدەگەر اتاندى. رۋستام ۆالەەۆ التىن مەدالعا, ەركەبۇلان تازابەك كۇمىس مەدالعا, ەراسىل ساپاربەكوۆ قولا مەدالعا يە بولدى.
بۇل رەتتە ۇلتتىق قۇراما مۇشەلەرى وقۋ-جاتتىعۋ كەزىندە جۇمىستى جوعارى دەڭگەيدە جۇرگىزگەن مۇعالىمدەر مەن جاتتىقتىرۋشىلارىنا العىس ءبىلدىردى.
«وسى جىلى قۇراما كوماندامىزدىڭ قورجىنىن مەدالدارمەن تولتىراتىنىمىزعا سەنىمدى بولدىق. زياتكەرلىك سايىسقا ءبىز بار كۇش-جىگەرىمىزدى سالىپ دايىندالدىق. مۇعالىمدەر مەن جاتتىقتىرۋشىلاردىڭ ارقاسىندا جوعارى كورسەتكىشتەرگە قول جەتكىزدىك. بىزگە ءاردايىم قولداۋ كورسەتەتىن جاتتىقتىرۋشىلارىمىزعا, مۇعالىمدەرىمىز بەن اتا-انالارىمىزعا العىسىمىز شەكسىز. ءبىزدىڭ حالىقارالىق وليمپيادالارعا قاتىسۋىمىز ءۇشىن قىرۋار جۇمىس جۇرگىزەتىن «دارىن» ورتالىعىنا العىس ايتامىز», دەدى التىن مەدال يەگەرى رۋستام ۆالەەۆ.
ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا وليمپيادا جۇلدەگەرلەرىن لايىقتى جەڭىسىمەن قۇتتىقتادى.
«وليمپيادا جۇلدەگەرلەرىن جوعارى ناتيجەلەرىمەن قۇتتىقتايمىن! بۇل – سىزدەردىڭ قاجىرلى ەڭبەكتەرىڭىز بەن بىلىمدەرىڭىزدىڭ جانە وزدەرىڭىزگە دەگەن سەنىمدىلىكتىڭ ناتيجەسى. سىزدەرگە قولداۋ كورسەتكەن مۇعالىمدەر مەن جاتتىقتىرۋشىلارعا جانە اتا-انالارعا العىس ايتامىن. سىزدەر ەلىمىزدىڭ نامىسىن حالىقارالىق دەڭگەيدە لايىقتى قورعادىڭىزدار. ءبىز ءوز تاراپىمىزدان مەدالداردىڭ سانى جىل سايىن ۇلعايۋى ءۇشىن جاعداي جاساۋدى جالعاستىرامىز», دەپ جازدى مينيستر.
سونداي-اق اسحات ايماعامبەتوۆ مەملەكەت باسشىسى قاسىم-جومارت توقاەۆتىڭ حالىقارالىق وليمپيادا جەڭىمپازدارىن قولداۋ بويىنشا كەشەندى شارالار قابىلداۋدى تاپسىرعانىن اتاپ ءوتتى. وسى تاپسىرمانى ورىنداۋ اياسىندا مينيسترلىك زاڭنامالىق وزگەرىستەر دايىندادى.
