«قازاقستان عارىش ساپارى» ۇك» اق ءباسپاسوز قىزمەتىنىڭ اقپاراتىنا سايكەس, OneWeb الەمدى ساپالى ينتەرنەتپەن قامتىپ, مالىمەتتەردى جوعارى جىلدامدىقپەن تاراتۋ ماقساتىندا تومەن وربيتالىق سپۋتنيكتىك جۇيەسىنىڭ جاھاندىق جەلىسىن قۇرۋدى كوزدەپ وتىرعان جەتەكشى كومپانيالاردىڭ ءبىرى سانالادى.
بيىل ساۋىردە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن حالىقارالىق كورپوراتسيانىڭ اراسىندا سپۋتنيكتىك بايلانىس سالاسىندا ىنتىماقتاستىق تۋرالى مەموراندۋمعا قول قويىلعان ەدى. ۆەدومستۆو باسشىسى باعدات مۋسين بۇل ۋاعدالاستىق قازاقستاننىڭ شالعاي وڭىرلەرىندە ورنالاسقان ەلدى مەكەندەردى OneWeb-تىڭ سپۋتنيكتەرى ارقىلى كەڭ جولاقتى ينتەرنەتپەن قامتۋعا مۇمكىندىك بەرەتىنىن ايتقان.
كەزدەسۋ بارىسىندا كورپوراتسيا وكىلدەرىمەن OneWebDemo جوباسىن ىسكە اسىرۋ, سپۋتنيك ەلەمەنتتەرىنىڭ ءوندىرىسىن وقشاۋلاۋ, سول سەكىلدى Ghalam كاسىپورنىنىڭ وندىرىستىك بازاسى مەن عارىش اپپاراتتارىن قۇراستىرۋ-سىناق كەشەنىندە ەكىنشى بۋىنداعى OneWeb دەمو-سپۋتنيكتەرى جانە فازالىق انتەننالىق تور تەحنولوگياسىن پايدالانىپ, ەلەكتروندى تۇردە باسقارىلاتىن انتەننالاردى سىناقتان وتكىزۋ ماسەلەلەرى پىسىقتالدى.
بۇعان قوسا, تاراپتار ۇلتتىق عارىش ورتالىعىندا OneWeb سپۋتنيكتىك توپتاماسىن پايدالانۋ ارقىلى فازالىق انتەننالىق تور جۇيەلەرىنە تەستىلىك سىناق جۇرگىزىلەتىنىنە ۋاعدالاستى. اتالعان سىناقتار OneWeb Demo جوباسىمەن بىرگە, تۇتاستاي قازاقستاندا OneWeb يننوۆاتسيالىق تومەن وربيتالىق سپۋتنيكتىك جۇيەنى پايدالانۋعا بايلانىستى ايماقتىق ساراپتاما ورتالىعىن قالىپتاستىرۋعا باعىتتالادى.
