بەينەۋ اۋدانىنا ارنايى بارعان سەناتورلار جەرگىلىكتى ورتا مەكتەپتىڭ جاڭا كورپۋسىنىڭ قۇرىلىس جۇمىستارىنا نازار اۋداردى. جاڭا نىسان ءبىلىم ورداسىنىڭ سىيىمدىلىعىن تاعى 312 ورىنعا كوبەيتەدى. دەپۋتاتتار بۇل جۇمىستىڭ ماڭىزدىلىعىن اتاپ ءوتىپ, جاڭا كورپۋس ءۇش اۋىسىممەن وقىتۋدى جويۋعا مۇمكىندىك بەرەتىنىن, ياعني مۇعالىمدەر مەن وقۋشىلار ءۇشىن ءبىلىم بەرۋ پروتسەسى نەعۇرلىم ىڭعايلى بولاتىنىن ايتتى.
سونىمەن قاتار سەناتورلار اۋداندىق ەمحانادا بولىپ, مەديتسينا قىزمەتكەرلەرىمەن كەزدەستى. قازىرگى تاڭدا ەمحانا جۇكتەمەسىنىڭ شامادان تىس كوپ بولۋى اۋدانداعى ماڭىزدى ماسەلەلەردىڭ ءبىرى بولىپ وتىر. ناقتى ايتقاندا, باستاپقىدا ءتورت مىڭ ادامعا ەسەپتەلگەن ەمحانا قازىر ون بەس مىڭنان استام ناۋقاسقا قىزمەت كورسەتەدى. سوندىقتان كەزدەسۋ بارىسىندا تاعى ءبىر ەمحانا سالۋ ماسەلەسى كوتەرىلدى. دەپۋتاتتار قازىرگى قالىپتاسقان جاعدايدا اۋدان تۇرعىندارى دا, دارىگەرلەردىڭ وزدەرى دە زارداپ شەگەتىنىنە نازار اۋدارىپ, ايماق باسشىلىعىنا اتالعان تۇيتكىلدى تەز ارادا شەشۋدى قولعا الۋ قاجەتتىگىن ايتتى.
سونداي-اق سۇيىندىك الداشەۆ پەن باقتىباي شەلپەكوۆ جەرگىلىكتى ءسۇت كومبيناتىنا باردى. بۇگىندە اتالعان كاسىپورىندا جىلىنا 430 ميلليون تەكشە مەتر ءسۇت ونىمدەرى وندىرىلەدى. الداعى ۋاقىتتا 1 ملرد تەڭگە ينۆەستيتسيالاۋ ارقىلى كومبيناتتىڭ وندىرىستىك قۋاتىن ارتتىرۋ جوسپارلانىپ
وتىر.
