قازاقستان پرەزيدەنتى ين يونگ ليمەن كەزدەسۋدە «Samsung Electronics» كومپانياسىنىڭ تسيفرلىق يننوۆاتسيالار سالاسىندا الەمدەگى جەتەكشى ورىندا ەكەنىن اتاپ ءوتىپ, تسيفرلاندىرۋ, يننوۆاتسيا مەن عىلىم ارقىلى تەحنولوگيالىق دامۋ تۋرالى ماسەلەلەرگە توقتالدى.
قاسىم-جومارت توقاەۆ ىنتىماقتاستىقتىڭ پەرسپەكتيۆالى باعىتتارى «اقىلدى قالالار» جۇيەسىن ەنگىزۋ ەكەنىن ايتىپ, قازاقستان كولىك قاتىناستارىن باسقارۋ, جول-كولىك وقيعالارىنىڭ الدىن الۋ, دەرەكتەردى قاشىقتان جىبەرۋ تەحنولوگيالارىن ەنگىزۋگە مۇددەلى دەدى.
بۇدان كەيىن مەملەكەت باسشىسى «Doosan Heavy Industries & Construction» پرەزيدەنتى يونگ ينگ چونگپەن كەزدەسىپ, قازاقستان ەكونوميكاسىنىڭ دامۋىنا قوسقان ۇلەسى ءۇشىن ريزاشىلىعىن ءبىلدىردى.
– اتىراۋ وبلىسىندا قۋاتى 310 مۆت گازتۋربينالىق ەلەكتر ستانساسىنىڭ قۇرىلىسىن ءساتتى جۇزەگە اسقان جوبا رەتىندە اتاپ وتكىم كەلەدى. وڭتۇستىك كورەيانىڭ جاسىل ەنەرگەتيكانى دامىتۋداعى الەمدىك كوشباسشىلاردىڭ ءبىرى بولۋعا ۇمتىلاتىن, سۋتەگى ءوندىرىسىنىڭ ايتارلىقتاي ۇلەسى بار جوسپارى تۋرالى جاقسى بىلەمىز. قازىرگى ۋاقىتتا كورەيانىڭ 3 قالاسىن سۋتەگى ەنەرگياسىنا كوشىرۋ جوسپارىنا دايىندالىپ جاتىرسىزدار. بۇگىندە قازاقستاندا دا بالامالى ەنەرگيا كوزدەرىن دامىتۋعا ەرەكشە كوڭىل بولىنۋدە. ءبىز 2030 جىلعا قاراي بالامالى ەنەرگيانىڭ 30 پايىزىنا قول جەتكىزۋدى جوسپارلاپ وتىرمىز, ونىڭ 15 پايىزى جاڭارتىلاتىن ەنەرگيا كوزدەرى بولماق.
وسى ماقساتتا جۋىق ارادا 3-4 گيگاۆاتت ەلەكتر ەنەرگياسىنا جاڭارتىلاتىن ەنەرگيا كوزدەرىنىڭ جوبالارىن جۇزەگە اسىرۋدى جوسپارلاپ وتىرمىز. سوندىقتان سىزدەردىڭ ۇسىنىستارىڭىز ءبىز ءۇشىن وتە پايدالى بولادى, – دەدى قازاقستان پرەزيدەنتى.
قاسىم-جومارت توقاەۆ كومپانيانىڭ ەنەرگەتيكالىق جوبالارداعى كوپ جىلدىق تاجىريبەسى مەن بىلىكتىلىگىن ەسكەرە وتىرىپ, ولاردى قازاقستاندىق جىلۋ-ەنەرگيا ورتالىقتارىن جاڭعىرتۋ جانە «قاراباتان» كەشەنىن كەڭەيتۋ بويىنشا ىنتىماقتاستىققا شاقىردى.
ءوز كەزەگىندە, كورەيلىك كومپانيا وكىلى بالامالى ەنەرگيا كوزدەرى بويىنشا ورتاق جوبالاردا جۇمىس ىستەۋگە دايىن ەكەنىن جەتكىزدى.
