شەتەلدەگى قازاق جاستارى جولداۋعا قاتىستى وي-پىكىرلەرىمەن ءبولىستى. بۇل تۋرالى «24 kz» حابارلادى.
مەملەكەت باسشىسىنىڭ قازاقستان حالقىنا ارناعان جولداۋى تىكەلەي ەفيردەن تاڭعى مەزگىلدە بەرىلگەنىنە قاراماستان, لوندوندا ءبىلىم الىپ جاتقان جاستار كوپتەپ جينالدى. شارانى لوندونداعى قازاقستان ەلشىلىگىنىڭ قولداۋىمەن ستۋدەنتتىك قوزعالىستىڭ بەلسەندى وكىلدەرى ۇيىمداستىرعان.
ءارتۇرلى تاقىرىپتا وتكەن قىزۋ پىكىرتالاستان جاستاردىڭ ەل بولاشاعىنا بەي-جاي قاراماعانى اڭعارىلدى. لوندون ۋنيۆەرسيتەت كوللەدجىندە قارجىگەر ماماندىعى بويىنشا ءبىلىم الىپ جاتقان راۆيل ارىستانبەكوۆ قوعامنىڭ شەشۋشى قۇندىلىقتارىن بەكىتەتىن «ماڭگىلىك ەلدى» تاريحي قۇجات دەپ باعالادى. «ءبىز – مىڭ ءولىپ, مىڭ تىرىلگەن قازاقپىز. بۇل – ءبىزدىڭ عاسىرلار بويى ارمانداعان اسىل مۇراتىمىز. ەندى وسى ۇلتتىق يدەيانى باسشىلىققا الىپ, جارقىن بولاشاققا ۇمتىلاتىن بولامىز», - دەدى ول وسى ورايدا.
لوندون ەكونوميكا مەكتەبىنىڭ ماگيسترانتى الدان سەرىكباي جولداۋداعى الەۋمەتتىك سالاعا قاتىستى ايتىلعان باستامالاردىڭ ۇلكەن جاۋاپكەرشىلىك جۇكتەيتىنىن اتاپ ءوتتى. ونىڭ پىكىرىنشە, ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, كوممۋنالدىق قىزمەت كورسەتۋ, كولىك جانە بايلانىس ساپاسىنىڭ جاقسارۋى – ءومىر ءسۇرۋ دەڭگەيىنىڭ باستى كورسەتكىشتەرى. ال Brunel ۋنيۆەرسيتەتىنىڭ ستۋدەنتى نۇرلان وتەشەۆ قازاقستاننىڭ بۇگىنگى جەتىستىگىن جولداۋداعى ۇزاق مەرزىمدى جوسپارلارمەن بايلانىستىردى. سونىڭ بىرەگەيى «قازاقستان-2030» ستراتەگياسى ەل دامۋىنا تىڭ سەرپىلىس بەرگەنىن ايرىقشا اتاپ ءوتتى.
جالپى, دەرەككە جۇگىنسەك, لوندوندا 4,5 مىڭنان استام ەلىمىز جاستارى ءبىلىم الۋدا. ونىڭ نەگىزىن قالاعان «بولاشاق» باعدارلاماسى ەكەنى انىق. بۇل باستاما دا مەملەكەت باسشىسى نۇرسۇلتان نازارباەۆتىڭ قامقورلىعىمەن ىسكە اسىرىلعان بولاتىن. سوندىقتان جاستار وقۋىن تامامداعاننان كەيىن ەل يگىلىگىنە ۇلەس قوسۋدى ماقسات تۇتىپ وتىر.
دايىنداعان: ءامىرحان الماعانبەتوۆ.
دەرەككوز: «24 kz»
فوتو: «24 kz».
