پرەزيدەنتتىك جاستار كادرلىق رەزەرۆىنىڭ ۇلتتىق كوميسسياسى بەكىتكەن جوسپارعا سايكەس ەكىنشى كەزەڭ رەزەرۆتەرىن ىرىكتەۋ 1 قىركۇيەكتەن باستالىپ, نيەت بىلدىرگەن جاستاردان قۇجاتتار قابىلداۋ ايدىڭ اياعىنا دەيىن جالعاسادى. قۇجاتتاردى قابىلداۋ جانە الەۋەتتى رەزەرۆشىلەردى ىرىكتەۋ مامانداندىرىلعان ونلاين پلاتفورمادا جۇرگىزىلەدى. ىرىكتەۋ ناتيجەسىندە مەملەكەتتىك سەكتور ءۇشىن 50 جاس رەزەرۆشى تاڭداپ الىنباق.
بريفينگ بارىسىندا اگەنتتتىك باسشىسى كانديداتتارعا قويىلاتىن نەگىزگى تالاپتاردىڭ وزگەرىسسىز قالعانىن ايتىپ ءوتتى.
«كانديداتتارعا قويىلاتىن نەگىزگى تالاپتار بۇرىنعىداي. ياعني كادر رەزەرۆىنە ۇمىتكەرلەر قازاقستان ازاماتى بولۋى ءتيىس, جاسى 35-تەن اسپاۋى كەرەك, جوعارى ءبىلىمى بار جانە ەڭبەك ءوتىلى 5 جىلدان كەم بولماۋى قاجەت. بۇل جولعى ۇمىتكەرلەردىڭ ءبىلىمى مەن داعدىدان بولەك, قوعامداعى ماسەلەلەردەن حاباردار بولىپ, ونى شەشۋگە قىزىعۋشىلىق تانىتۋى جوعارى باعالانادى», دەگەن سپيكەر ىرىكتەۋ كەزىندە كانديداتتارعا قوسىمشا ارنايى تاپسىرمالار بەرىلىپ, سول ارقىلى ولاردىڭ ءبىلىم-بىلىكتىلىگى جاڭاشا باعالاناتىنىن حابارلادى. بۇل جولعى ىرىكتەۋدىڭ الدىڭعىسىنان باستى ايىرماشىلىعى دا – وسىندا. ىرىكتەۋ كەزەڭدەرىندە كانديداتتاردىڭ شىنايى ۋاجدەرى مەن ولاردىڭ قۇندىلىق باعدارلارىن باعالاۋعا باسىمدىق بەرىلەدى.
سپيكەر ىرىكتەۋ بارىسىندا ۇمىتكەرلەردىڭ كۇردەلى ماتىندىك, ساندىق اقپاراتپەن جۇمىس ىستەۋ قابىلەتى, احۋالدىق ەسەپتەر تۇرىندە جاسالعان ناقتى ماسەلەلەردى شەشۋ بىلىكتىلىگى ساراپقا سالىناتىنىن اتاپ ءوتتى.
«بۇدان بولەك, كانديداتتاردىڭ اسسەسمەنت ورتالىق ارقىلى ستراتەگيالىق ويلاۋ, پرواكتيۆتىلىك, قىزمەتتى باسقارۋ, كوماندالىق كوشباسشىلىق, سەنىمدىلىك سياقتى جاڭا فورماتسياداعى كوشباسشىلارعا ءتان قۇزىرەتتەرى انىقتالىپ, باعالانادى», دەپ اتاپ ءوتتى اگەنتتىك باسشىسى.
سونىمەن قاتار پرەزيدەنت تاعايىنداعان لاۋازىم يەلەرى, ساياسي مەملەكەتتىك قىزمەتشىلەر, اكىمشىلىك مەملەكەتتىك قىزمەتشىلەر, «ا» كورپۋسى جانە پرەزيدەنتتىك جاستار كادرلىق رەزەرۆىندەگى ادامدار ىرىكتەۋگە قاتىسا المايدى. پرەزيدەنتتىك رەزەرۆتەن ءارتۇرلى مەملەكەتتىك لاۋازىمدارعا, اكىمشىلىك لاۋازىمدارعا, «ا» كورپۋسىنا جانە «ب» كورپۋسىنىڭ باسشى لاۋازىمدارىنا تاعايىنداۋ قاراستىرىلعان.
ا.جايىلعانوۆانىڭ حابارلاۋىنشا, ىرىكتەۋدەن وتكەندەر پرەزيدەنتتىك جاستار كادرلىق رەزەرۆىندە 3 جىلعا دەيىن بولا الادى. سونىمەن قاتار ىرىكتەۋدەن وتكەن ماماندار مەملەكەتتىك قىزمەتكە زاڭ اياسىندا سايلانادى, نەمەسە تاعايىندالادى. «ەگەر كەز كەلگەن مەملەكەتتىك قىزمەتكە جاستار كادرلىق رەزەرۆىندە جوق ماماننىڭ كانديتاتۋراسى كەلىپ تۇرسا, ول قىزمەتكە جاستار كادرلىق رەزەرۆىندەگى ماماندى تاعايىنداۋ مىندەتتى ەمەس», دەدى ول.
بيىلعى ىرىكتەۋگە ەنگىزىلگەن جاڭا تالاپتىڭ تاعى ءبىرى – پرەزيدەنتتىك جاستار كادرلىق رەزەرۆىنە ۇمىتكەرلەر مەملەكەتتىك ءتىلدى ءبىلۋى كەرەك. سول سەبەپتى دە ەكىنشى ىرىكتەۋ كەزەڭىندە ولاردان قازاق ءتىلىن ءبىلۋ دەڭگەيىن راستايتىن قۇجات تالاپ ەتىلەدى. ىرىكتەۋگە ەنگىزىلگەن بۇل جاڭاشىلدىق جونىندە پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل جان-جاقتى ءتۇسىندىرىپ ءوتتى.
«Qaztest وفلاين فورماتتا ءوتۋدى قاجەت ەتسە, Qazaq Resmi Test-ءتى ۇمىتكەرلەر وزدەرىنە ىڭعايلى ۋاقىتتا ونلاين تاپسىرا الادى. ول ءۇشىن ۆەب-كامەراسى, ميكروفونى جانە ينتەرنەتى بار كومپيۋتەر بولۋى كەرەك. ۇمىتكەرلەر مەملەكەتتىك باسقارۋ اكادەمياسىندا Qazaq Resmi Test-ءتى تاپسىرۋعا باعىتتالعان ارنايى دايىندىق كۋرسىنان دا وتە الادى», دەدى ە.ءابىل.
بۇگىندە پرەزيدەنتتىك جاستار كادرلىق رەزەرۆىنە مۇشە 300 جاستىڭ 184-ءى جاۋاپتى قىزمەتكە ورنالاسقان. رەزەرۆشىلەردىڭ قالعاندارى بيزنەس سالاسىندا, كۆازيمەملەكەتتىك سەكتوردا جۇمىس ىستەيدى.
