ايماقتار • 16 تامىز، 2021

توي تىيىلماي، ىندەت جۇقتىرۋشىلار ازايمايدى

2022 رەت كورسەتىلدى

بۇگىندە الەمدى ابىگەرگە سالىپ وتىرعان كوروناۆيرۋس ىندەتىمەن كۇرەس مەيلىنشە قارقىندى جۇرگىزىلۋدە. ەلىمىزدە دە ءتيىستى شارالار قابىلدانىپ، جۇزەگە اسىرىلۋدا. جامبىل وبلىسىندا كارانتين تالاپتارى ەنگىزىلىپ، مونيتورينگتىك توپ مۇشەلەرى كۇندەلىكتى باقىلاۋ جۇرگىزۋدە.

دەگەنمەن وڭىردە كارانتين تالاپتارىن قاساقانا بۇزۋ تىيىلماي تۇر. اسىرەسە مەيرامحانالاردا توي جاساۋ، ءتۇرلى وتباسىلىق شارالار وتكىزۋ سياقتى جيىندار كۇن سايىن جالعاسۋدا. وزگە تۇگىل، ءوزىنىڭ دە قامىن ويلاماعان قاراپايىم حالىق تا، مەيرامحانا يەلەرى دە كارانتينگە كوز جۇمىپ قاراپ وتىر.

بۇگىندە جامبىل وبلىسىندا قاۋىپتى ىندەتتى جۇقتىرۋدىڭ دەرەگى كۇن ساناپ ارتىپ بارادى. وكىنىشكە قاراي، كوروناۆيرۋستان كوز جۇمعاندار دا بار. وبلىس بو­يىنشا سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىن­باسارى باعلان قىدىرباەۆتىڭ ايتۋىنشا، قازىرگى كەزدە وڭىردە 2 259 ناۋ­قاس اۋرۋحاناعا جاتقىزىلىپ، ايماق­تا اۋرۋحانالاردىڭ توسەكتىك ورىنمەن قام­تىلۋى 63 پايىزدى قۇراعان. سونىمەن قاتار ول اۋرۋدىڭ جوعارى دەڭگەيى وبلىس­تىڭ بارلىق قالالارى مەن اۋداندارىندا دا بايقالاتىنىن اتاپ ءوتتى.

«بيىل 1 قاڭتاردان باستاپ مو­ني­تو­رينگتىك توپتار مۇشەلەرى ءتيىستى ءتار­تىپتى ساقتاماعان 836 نىساندى انىقتا­دى. نىسانداردىڭ باسشىلارىنا ءتۇسىن­دىرۋ جۇمىستارى جۇرگىزىلدى، ەسكەرتۋلەر بەرىلدى. تەكسەرۋ ماتەريالدارى مەن مونيتورينگتىك توپتاردىڭ سانيتارلىق-ەپيدەميالىق قىزمەتكە بەرگەن ماتەريالدارى نەگىزىندە 83 ملن تەڭگەدەن اسا سوماعا 705 ايىپپۇل سالىندى»، دەيدى ب.قىدىرباەۆ.

بۇگىنگە دەيىن جامبىل وبلىسىنىڭ 71 كاسىپكەرلىك نىسانىندا كارانتيندىك شارالاردى قاساقانا بۇزۋ فاكتىلەرى انىقتالعان. تەكسەرۋ ناتيجەلەرى بويىنشا جالپى كولەمى 59 ملن تەڭگەدەن اساتىن ايىپپۇل سالۋ ارقىلى 262 تۇلعا اكىمشىلىك جاۋاپكەرشىلىككە تارتىلعان. نەگىزگى قۇقىق بۇزۋشى نىسانداردىڭ ساندىق ستاتيستيكاسى دا بەلگىلى. ولاردىڭ قاتارىندا 64 قوعامدىق تاماقتانۋ ورنى، ياعني مەيرامحانالار، كافەلەر، بانكەت زالدارى، كافە-بارلار بار. سونداي-اق 3 كومپيۋتەرلىك كلۋب، 2 ساۋدا نىسانى، 1 لوتو كلۋبى جانە 1 بالالار ويىن-ساۋىق ورتالىعى دا «قارا» تىزىمدە.

قازىرگى كەزدە قاۋىپتى ىندەتتىڭ ءورشۋى بىرقاتار اۋدانمەن قاتار، تاراز قالاسىندا دا بايقالادى. وبلىس ورتالىعىندا جىل باسىنان بەرى 10 143 جاعداي تىركەلگەن. ءتىپتى وسى جىلدىڭ شىلدە، تامىز ايلارىندا كوروناۆيرۋس جۇقتىرۋدىڭ دەرەگى الدىڭعى ايلارمەن سالىستىرعاندا ارتا تۇسكەن. بۇگىنگى تاڭدا تاراز قالاسىندا ناۋقاس ازاماتتاردى ەمدەۋگە ارنالعان 4 ينفەكتسيالىق ستاتسيونار جۇمىس ىستەيدى. قازىر ينفەكتسيالىق ستاتسيونارلاردا 1 434 ناۋقاس ەم قابىلداۋدا.

تاراز قالاسى اكىمىنىڭ ورىنباسارى الماس سادۋباەۆتىڭ ايتۋىنشا، اكىمدىك تاراپىنان قۇرىلعان مونيتورينگتىك توپ قالادا ورنالاسقان كاسىپكەرلىك سۋبەك­تىلەرىنە كۇندەلىكتى رەيدتەر جۇر­گىزۋدە. كارانتيندىك شەكتەۋ شارالارى باستالعاننان بەرى 473 اكىمشىلىك-قۇقىق بۇزۋشىلىق تۋرالى حاتتاما تولتىرىلىپ، كاسىپكەرلەرگە 91 ملن 213 مىڭ 815 تەڭگە كولەمىندە ايىپپۇل سالىنعان. ال بيىلدىڭ وزىندە 288 اكىمشىلىك-قۇقىق بۇزۋشىلىق تۋرالى حاتتاما تولتىرىلىپ، 49 ملن 318 مىڭ 575 تەڭگە ايىپپۇل سالىنعان. سونداي-اق 21 تالاپ-ارىز ماتەريالى بىرقاتار نىساننىڭ قىزمەتىن توقتاتۋ ءۇشىن اۋدانارالىق ەكونوميكالىق سوتقا جىبەرىلگەن. ناتيجەسىندە، 15 نى­سان­عا قاتىستى شەشىم شىقسا، 4 ءىس-قۇ­جات قاراۋسىز قالدىرىلىپ، 2 ءىس-قۇ­جات­تى قاراۋ توقتاتىلعان. قازىرگى كەزدە وبلىس ورتالىعىندا ورنالاسقان 15 نىسان ءوز جۇمىسىن توقتاتىپ وتىر.

قايتكەن كۇندە دە قاۋىپتى ىندەت بوي بەرەتىن ەمەس. كوروناۆيرۋس كۇن سايىن كۇش الۋدا. ساقتىق شارالارىن مەيلىنشە ساقتاۋ كەرەك دەگەنمەن، بۇل ورىندالماي وتىر. وسىعان بايلانىستى قازىرگى تاڭدا وڭىردەگى موبيلدىك توپتاردىڭ جۇمىسى كۇشەيتىلگەن. تامىز ايى باستالعالى بەرى 73 حاتتامالىق اكتى تولتىرىلعان. رەيد جۇرگىزۋ بارىسىندا تاراز قالاسىنداعى Taraz Hall، Imperial، Grand Royal جانە Zaravshan مەيرامحانالارىندا ءبىر كۇندە 3 توي وتكىزىلگەندىكتەن، ولارعا دا جەكە-جەكە حاتتامالىق اكتى تولتىرىلعان. تاراز قالاسى اكىمدىگىنىڭ بەرگەن مالىمەتىندە «مونيتورينگتىك توپتاردىڭ جۇمىسى كۇشەيتىلدى. وسىلايشا، 31 شىلدەدە تارازدا 25 توي توقتاتىلىپ، حاتتاما تولتىرىلدى. ايتا كەتەرلىگى، تۇرعىندار ءوز ءىس-شارالارىنىڭ شىرقىن بۇزباۋ، توقتاتپاۋ ءۇشىن ءتۇرلى ارەكەتتەرگە بارادى. قارسىلىق كورسەتەدى. ءتىپتى توپ مۇشەلەرىنە بەيادەپ سوزدەر ايتىپ، قول كوتەرۋ، قوقان-لوقى كورسەتۋ جاعدايلارى دا بولعان. وعان قاتىستى مونيتورينگتىك توپ مۇشەلەرى تاراپىنان قۇقىق قورعاۋ ورگاندارىنا ارىز ءتۇسىپ، سوتتىڭ شەشىمى دە شىقتى»، دەلىنگەن.

كۇندەلىكتى رەيدتىك جۇمىستاردىڭ مالى­مەتتەرىن قاراپ وتىرساق، وبلىس ور­تا­­لىعىندا توي-جيىنعا ءالى دە توق­تام بولماي وتىرعانىن كورەمىز. بۇل بىرىن­شى­دەن مەيرامحانا يەلەرىنىڭ تارتىپكە باعىنباي وتىرعانىن كورسەتسە، ەكىنشىدەن كوپشىلىكتىڭ دە تالاپقا كوندىككىسى كەل­مە­گە­نىن بىلدىرەدى. جۋىردا عانا الەۋمەتتىك جەلىلەردە «اي جۇلدىز» مەيرامحاناسىنا تويدى توقتاتۋ ءۇشىن مونيتورينگتىك توپ مۇشەلەرىنىڭ بارعانى، الايدا ولاردىڭ بۇل تالاپقا كونبەگەنى، كەيىننەن توپ مۇشەلەرى ارىپتەستەرىن كومەككە شاقىرعانى، سول ءۇشىن توپ مۇشەلەرىنىڭ ءزابىر كورگەنى، ونى كورە تۇرا اكىمدىك قىزمەتكەرلەرىنىڭ ەشقانداي ارەكەت جاساماعانى تۋرالى جاريالانعان بولاتىن.

اتالعان وقيعانىڭ انىق-قانىعىن بىلمەك ماقساتتا تاراز قالالىق اكىمدىگىنە حابارلاسىپ، ءتيىستى جاۋاپتى الدىق. شاھار اكىمشىلىگى بەرگەن اقپاراتتا «1 تامىز كۇنگى رەيدتىك جۇمىستار بارىسىندا قالا اۋماعىندا بارلىعى 13 كاسىپكەرلىك نىسانعا اكتى تولتىرىلدى. «اي جۇلدىز» مەيرامحاناسىنا №2 مونيتورينگتىك توپ كەزەكتى رەيدكە شىققان. توي يەلەرىنىڭ تويدى توقتاتۋعا قارسىلىق ءبىلدىرىپ، قاۋ­لى­نى ورىنداۋدان باس تارتۋىنا بايلانىستى توپ مۇشەلەرى ءوز ارىپتەستەرىن كومەككە شاقىرعان. وسى كەزدە باسقا مەيرامحانادا ءتۇسىندىرۋ جۇمىستارىمەن جۇرگەن اكىمدىك قىزمەتكەرلەرى «اي جۇلدىز» مەيرامحاناسىنا بارىپ، توي توقتاتىلادى. كارانتين تالاپتارىن ساقتاماي، وتباسىلىق ءىس-شارا جۇرگىزگەن «اي جۇلدىز» مەيرامحاناسىنا №2 ءموبيلدى توپ مۇشەلەرى س.سۇلتانوۆ پەن ن.امانمۇراتتىڭ تاراپىنان حاتتامالىق اكتى تولتىرىلعان. اكتىگە مەيرامحانا قوجايىنى ز.تامتىباەۆ تانىستىم دەپ قول قويىپ بەرگەن. مەيرامحاناعا اكىمدىك قىزمەتكەرلەرى كەلگەن ۋاقىتتا مونيتورينگتىك توپ مۇشەلەرىنە قاتىستى قوقان-لوقى كورسەتۋ ءىس-ارەكەتى ورىن الماعان. مونيتورينگتىك توپ مۇشەلەرى تاراپىنان قۇقىق قورعاۋ ورگاندارىنا ارىز تۇسپەدى»، دەلىنگەن. مۇنىڭ الدىندا دا تويدى توقتاتۋ ءۇشىن بارعان وبلىس اكىمىنىڭ ورىنباسارى داۋلەت كارىبەك باستاعان مونيتورينگتىك توپ مۇشەلەرى قارسىلىققا ۇشىراعان بولاتىن. كۇن سايىن حاتتاما تولتىرىلىپ، ءتارتىپ بۇز­عان­دارعا ايىپپۇل سالىنعانىمەن، توي-جيىندى توقتاتۋ قيىنعا سوعىپ تۇر. وسى ۋاقىتقا دەيىن تاراز قالاسىنىڭ وزىندە 25 تويدىڭ توقتاتىلعانى، بىرقاتار مەي­رامحانانىڭ ءبىر كۇندە ءۇش رەت توي وتكىزگەنى تۋرالى سياقتى جاعدايلار بول­عان ەدى. ال جەرگىلىكتى بيلىكتىڭ توي وتكىزۋدى تولىق توقتاتۋعا شاماسى كەلمەي وتىر.

سوڭعى جاڭالىقتار

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار