ربك تاليبانداردىڭ اۋعانستانداعى پوزيتسياسىنىڭ كۇشەيۋى اياسىندا نورۆەگيا مەن دانيا كابۋلداعى ەلشىلىكتەرىن ۋاقىتشا جاۋىپ جاتقانىن جازادى.
نورۆەگيانىڭ سىرتقى ىستەر ءمينيسترى ينە ەريكسەن سەرەيدە ەلشىلىكتىڭ بارلىق قىزمەتكەرى نورۆەگياعا كوشىرىلەتىنىن ايتتى.
«بۇل جۇمىسشىلارعا دا, اۋعاندىقتارعا دا قاتىستى», دەدى ول.
4 تامىزدا نورۆەگيا بيلىگى ءوز ازاماتتارىن اۋعانستاننان كەتۋگە شاقىردى.
گەرمانيا الداعى بىرنەشە كۇن ىشىندە اۋعانستان استاناسىنداعى ەلشىلىگىنىڭ قىزمەتكەرلەرىن «ابسوليۋتتىك مينيمۋمعا» دەيىن قىسقارتاتىنىن حابارلادى. جۇمىسشىلار چارتەرلىك ۇشاقتارمەن شىعارىلادى. نەمىس ديپلوماتتارىمەن جۇمىس ىستەگەن اۋعاندىقتار دا ەۆاكۋاتسيالانۋدا. ۆيزاسى جوقتار ءۇشىن قاجەتتى قۇجاتتار گەرمانيادا بەرىلەدى.
اقش تا ديپلوماتتارىن قىسقارتادى. CNN اقش مەملەكەتتىك دەپارتامەنتىنىڭ وكىلى نەد پرايسقا سىلتەمە جاساي وتىرىپ, كابۋلداعى امەريكاندىق ديپلوماتتار مەن اقش ەلشىلىگى قىزمەتكەرلەرىن ەۆاكۋاتسيالاۋدى قامتاماسىز ەتۋ ءۇشىن 3 مىڭعا جۋىق امەريكاندىق اسكەر اۋعانستانعا جىبەرىلەتىنىن حابارلادى.
ۇلىبريتانيا اۋعانستانعا ەۆاكۋاتسياعا كومەكتەسۋ ءۇشىن 600-گە جۋىق اسكەر جىبەرەدى, دەپ حابارلايدى The Washington Post.
رەسەي ازىرگە ديپلوماتتاردى ەۆاكۋاتسيالاۋدى جوسپارلاپ وتىرعان جوق.
«ەلشىلىك ەۆاكۋاتسياعا دايىن ەمەس, مۇنداي مۇمكىندىك قازىر قاراستىرىلماعان», دەپ حابارلادى ديپلوماتيالىق وكىلدىگى تاسس-قا بەرگەن مالىمەتىندە.
تاجىكستان مازاري-شاريف, فايزاباد جانە باداحشان پروۆينتسيالارىنداعى كونسۋلدىقتاردى ۋاقىتشا جاپتى, ال كابۋلداعى ەلشىلىك جۇمىسىن جالعاستىرىپ جاتىر, دەپ جازادى Sputnik تاجىكستان.
قازاقستاننىڭ سىرتقى ىستەر مينيسترلىگى اۋعانستانداعى ديپلوماتيالىق ميسسيانىڭ جۇمىسى تۋرالى ءالى رەسمي مالىمدەمە جاساعان جوق.
امەريكا قۇراما شتاتتارى اسكەرىن شىعارا باستاعاننان كەيىن اۋعانستانداعى جاعداي ۋشىعىپ كەتتى. اقش پرەزيدەنتى دجو بايدەن ەلدەگى اسكەري ميسسيا 2021 جىلدىڭ 31 تامىزىندا اياقتالاتىنىن حابارلادى. وسى ۋاقىتتا تاليبان راديكالدى قوزعالىسى اۋقىمدى شابۋىل ۇيىمداستىرىپ, كوپتەگەن پروۆينتسيانى باسىپ الدى. ونىڭ قاتارىندا ەلدەگى اۋقىمى بويىنشا ەكىنشى ورىنداعى كانداگار قالاسىن, سونداي-اق ءۇشىنشى ورىنداعى گەرات قالاسى بار.
ايتا كەتەيىك, تاليبان ۇيىمىنا قازاقستاندا تىيىم سالىنعان.
