كومپانيانىڭ ينفراقۇرىلىمدىق جەلىسى كەڭ ەكەنى بەلگىلى. ولار شالعايداعى اۋدان ورتالىقتارى مەن اۋىلداردى دا قامتيدى. كومپانيانىڭ ءباسپاسوز قىزمەتى ۇسىنعان اقپاراتقا سەنسەك, اۋىل مەن اۋداندارداعى پوشتا بولىمشەلەرى 12 مىڭنان اسا مەملەكەتتىك جانە الەۋمەتتىك قىزمەت تۇرلەرىن ۇسىنعان. جاڭا قىزمەت ءتۇرى حالىق تاراپىنان ۇلكەن سۇرانىسقا يە. ونىڭ ىشىندە شىعىس قازاقستان مەن قىزىلوردا وبلىسى كوش باستاپ كەلەدى: تيىسىنشە 5,3 مىڭ جانە 2,8 مىڭ قىزمەت كورسەتىلدى.
بيىلعى كوكتەمدە قازپوشتا شىعىس قازاقستان وبلىسىندا «مەملەكەتتىك جانە الەۋمەتتىك قىزمەتتەر ۇسىناتىن امبەباپ اگەنت» قاناتقاقتى جوباسىن قولعا العان. وسى جوبا اياسىندا شىلدەنىڭ 1-ىنەن بەرى قازاقستاننىڭ بۇكىل اۋماعى بويىنشا تەست رەجىمىندە اۋىل مەن اۋدان تۇرعىندارىنا مەملەكەتتىك جانە الەۋمەتتىك قىزمەتتەر ەلەكتروندى فورماتتا ۇسىنىلىپ جاتىر. بۇل شالعايدا تۇراتىن جۇرتشىلىقتىڭ كوڭىلىن سەرپىلتكەن بولار. سەبەبى ۋاقىت پەن قارجىنى شىعىنداپ, قالاعا جول تارتۋ ەش قاجەت ەمەس.
«شىلدە ايىندا ەلدى مەكەن تۇرعىندارى ۇلتتىق پوشتا وپەراتورىنىڭ جاڭا قىزمەتىنە 6,5 مىڭ رەت جۇگىنگەن. شالعاي اۋىلدار مەن اۋدانداردىڭ تۇرعىندارى وبلىس ورتالىعىنا بارماي-اق, وزدەرىنە قاجەتتى قىزمەتتەردى جەرگىلىكتى پوشتا بولىمشەلەرىنەن الۋ مۇمكىندىگىنە يە بولدى», دەيدى قازپوشتا وكىلدەرى.
جالپى, قازپوشتا ۇلتتىق وپەراتور رەتىندە اۋىل تۇرعىندارىنا بارىنشا قولايلى جاعداي جاساۋ ءۇشىن ءدال وسى ىسپەتتى الەۋمەتتىك ماڭىزدى جوبانى قولعا العان. ەلدى مەكەندەردە قازپوشتا كوبىنە تۇرعىندارعا قىزمەت كورسەتەتىن جالعىز مەكەمە ەكەنى بەلگىلى. كومپانيانىڭ كەڭ فيليالدىق جەلىسى بار ەكەنىن ەسكەرە وتىرىپ, اۋىل تۇرعىندارىنا مەملەكەتتىك جانە الەۋمەتتىك قىزمەتتەرگە قولجەتىمدىلىكتى قامتاماسىز ەتۋ – ماڭىزدى الەۋمەتتىك مىندەت.
ەلىمىزدىڭ بارلىق وڭىرىندەگى پوشتا بولىمشەلەرىندە 628 مەملەكەتتىك جانە الەۋمەتتىك قىزمەتتى الۋعا بولادى. ونىڭ ىشىندە egov.kz پورتالى ارقىلى ەلەكتروندىق-ساندىق قولتاڭبا الۋ جانە ونلاين قىزمەتتەرگە (جۇمىسپەن قامتۋ, ءبىلىم, دەنساۋلىق, جىلجىمايتىن م ۇلىك جانە ت.ب. بويىنشا انىقتامالار, وتىنىشتەر) تاپسىرىس بەرۋ, كوپبالالى جانە از قامتىلعان وتباسىلاردىڭ 1-دەن 6 جاسقا دەيىنگى بالالارعا كەپىلدەندىرىلگەن الەۋمەتتىك پاكەتتى الۋعا, سونىمەن قاتار aleumet.egov.kz پورتالىندا مۇمكىندىگى شەكتەۋلى جاندار تاراپىنان وڭالتۋ بويىنشا تەحنيكالىق قۇرالداردى الۋعا جانە ساناتورلىق-كۋرورتتىق ەمدەلۋگە جولدامالاردى راسىمدەۋگە ءوتىنىش بەرۋ قاراستىرىلعان.
ۇلتتىق پوشتا وپەراتورىنىڭ جۇزەگە اسىراتىن جوبالارى اۋدان ورتالىقتارىندا جانە اۋىلداردا تۇراتىن جۇرتتىڭ قاجەتتىلىكتەرىن وتەۋگە باعىتتالعان. بۇگىندە ەلدى مەكەندەردەگى پوشتا بولىمشەلەرىندە دەپوزيتتەر مەن كرەديتتەر راسىمدەۋگە, كوممۋنالدىق تولەمدەردى تولەۋگە, تەمىر جول بيلەتتەرىن ساتىپ الۋعا, كوسمەتيكالىق بۇيىمدارعا تاپسىرىس بەرۋگە بولادى. سونداي-اق الداعى ۋاقىتتا سمارتفوندار مەن گادجەتتەردىڭ اقىسىن تولەۋ ءۇشىن قولما-قول اقشا جانە ءبولىپ تولەۋ مۇمكىندىگى ۇسىنىلادى. بۇل قىزمەتتەر اۋىل تۇرعىندارى تاراپىنان سۇرانىسقا يە جانە قالالارعا بارۋدى قاجەت ەتپەيدى.
