نوسەرلەپ قۇيعان جاۋىن سالدارىنان كوپىر قۇلاپ, اۋىل تۇرعىندارى جارىقسىز قالعان. TRT Haber ارناسىنىڭ حابارلاۋىنشا, بارتين پروۆينتسياسىندا ءبىر ادام تاسقىننان كەيىن جۇرەك تالماسىنان قايتىس بولىپتى. بۇدان بولەك, كاستامونۋ ايماعىندا 4 ادام باقيعا اتتانىپ, ءبىر ادام حابار-وشارسىز كەتكەن.
سۋ تاسقىنى سينوپ, بارتىن, قارابيۋك جانە كاستامونۋ پروۆينتسيالارىنا زيانىن تيگىزدى. توتەنشە جاعداي سالدارىنان 13 ادام زارداپ شەككەن. قۇتقارۋ قىزمەتكەرلەرى جوعالعان 80 جاستاعى ايەلدى ىزدەستىرىپ جاتىر.
پرەمەر‐مينيستر جانىنداعى توتەنشە جاعدايلار جانە اپاتتار باسقارماسى (AFAD) مالىمەتىنە سۇيەنسەك, 12 اۋىلدا ەلەكتر جارىعى سونگەن. سونداي-اق عيماراتتاردىڭ ءبىرىنشى قاباتتارى سۋ استىندا قالعان.
بارتىننان 240 شاقىرىم جەردە ورنالاسقان سينوپ پروۆينتسياسىندا سۋ تاسقىنى سالدارىنان ءبىر ءۇي قۇلاعان. وڭىردە كوپتەگەن تۇرعىن ءۇي مەن كاسىپورىندى سۋ باسقان. ايماقتاعى مەملەكەتتىك اۋرۋحانا ساقتىق جاساۋ ماقساتىندا باسقا جەرگە كوشىرىلگەن.
سينوپتيكتەر نوسەر جاۋىن ءالى دە جالعاسا بەرۋى مۇمكىن ەكەنىن ايتىپ وتىر. سونىمەن قاتار جاڭبىردىڭ توقتاۋسىز جاۋعانىنىڭ كەسىرىنەن كاستامونۋ پروۆينتسياسىنداعى وزەن ارناسىنان تاسىپ, جاقىن ماڭداعى ەلدى مەكەندەرگە قاۋىپ توندىرگەن. ماسەلەن, TRT ارناسى تاراتقان بەينەجازبادا لاي سۋدىڭ كولىكتەر مەن قوقىستى جوڭكىلتە اكەتىپ بارا جاتقانى ايقىن كورىنەدى.
بۇدان بولەك, نوسەردىڭ كەسىرىنەن سۋ ەلەكتر ستانساسى دا تاسقىن استىندا قالدى. بۇل ماڭداعى تۇرعىنداردى قۇتقارۋ جۇمىستارى جالعاسىپ جاتىر. جەرگىلىكتى بيلىك تاسقىننان قاشىپ, ءۇيدىڭ توبەسىنە ورمەلەگەن ادامداردى قۇتقارۋ ماقساتىندا تىكۇشاقتىڭ كومەگىنە جۇگىنگەن.
«مەتەورولوگيالىق تۇرعىدان العاندا, 50, ءتىپتى 100 جىلدا كەزدەسپەگەن اپاتقا تاپ بولىپ وتىرمىز», دەيدى اۋىل شارۋاشىلىعى جانە ورمان شارۋاشىلىعى ءمينيسترى بەكير پاكدەميرلي.
سۋ تاسقىنىنان كاستامونۋ قالاسى ەڭ كوپ زارداپ شەكتى. ايماقتاعى بوزكۋرت قالاسى سۋ استىندا قالدى, ونداعان كولىكتى تاسقىن الىپ كەتتى. كاستامونۋ گۋبەرناتورلىعىنىڭ حابارلاۋىنشا, الەۋمەتتىك جەلىدەگى سۋ تاسقىنىنا بوگەتتىڭ جارىلۋى سەبەپ بولدى دەگەن اقپارات شىندىققا جاناسپايدى. ازىرگە بۇل وڭىردە زارداپ شەككەندەر تۋرالى حابار جوق.
سۋ تاسقىنى جەرگىلىكتى تۇرعىنداردى تاڭعالدىرىپ وتىر. The Guardian اگەنتتىگىنە پىكىر بىلدىرگەن, وسى ايماقتا مەيرامحانا قىزمەتىمەن اينالىساتىن نۋري ەرسوز تاسقىنعا كۋا بولعانىن, 10 مينۋتتىڭ ىشىندە لاي سۋ ءبارىن قوپارىپ كەتكەنىن جەتكىزدى. ول نەمەرە اعاسىنىڭ جاعدايىنا الاڭدايتىنىن ايتادى.
كاستامونۋعا بارعان ىشكى ىستەر ءمينيسترى سۇلەيمان سويلۋ سۋ تاسقىنىنان زارداپ شەككەن كەيبىر اۋدانداردا سۋ دەڭگەيى ء«ۇش-ءتورت مەترگە كوتەرىلگەنىن» العا تارتىپ, كوپتەگەن ادام شاتىرعا شىعىپ, قۇتقارۋشىلاردى كۇتىپ وتىرعانىن ايتتى.
«ەۆاكۋاتسيا جانە ىزدەستىرۋ-قۇتقارۋ جۇمىستارى جالعاسادى. جاندارمەريا, ساربازدار بۇكىل كۇش-جىگەرىن سالىپ, ايماقتاعى بارلىق تىكۇشاقتار قۇتقارۋ ىسىنە جۇمىلدىرىلادى», دەيدى س.سويلۋ.
تۇركيا كەيىنگى ايلاردا تابيعات اپاتىنا ءجيى ۇشىراپ وتىر. بۇعان دەيىن شىلدە ايىنىڭ سوڭىنان باستاپ ورماننان شىققان ورتپەن كۇرەسكەن ەدى. ءتىلسىز جاۋ ەلدى مەكەندەردى شارپىپ, ەندى ۇلكەن كۋرورتتارعا جەتكەن. ەل بيلىگى ازاماتتاردى ەۆاكۋاتسيالاۋعا ءماجبۇر بولعان.
قاتتى جەلدىڭ اسەرى مەن اۋا تەمپەراتۋراسىنىڭ جوعارىلاۋىنان ءتىلسىز جاۋدىڭ باقىلاۋعا كونۋى قيىنعا سوقتى. ماناۆگات قالاسىندا 5 كىسى, ال مارماريستە 1 ادامدى ورتكە كۇيىپ ولگەن. ەكى قالا دا – جەرورتا تەڭىزىنە جاقىن ورنالاسقان تۋريستىك مەكەندەر.
دەنساۋلىق ساقتاۋ ءمينيسترى فاحرەتتين كوجا ءبىر عانا ماناۆگاتتاعى ورتتەن 400 ادام زارداپ شەكتى دەپ حابارلادى. ولاردىڭ 10-ى ءالى دە ەم قابىلداپ جاتىر. ال مارماريستە 159 ادامنىڭ دەنساۋلىعىنا زاقىم كەلگەن. 1 ادامدى كۇيىك شالىپ, اۋرۋحاناعا جاتقىزىلعان.
ەستەرىڭىزگە سالساق, شىلدەنىڭ سوڭىنان باستاپ تۇركيادا ورمان ورتتەرى ءورشىپ تۇر. تانىمال كۋرورتتار 13 پروۆينتسياداعى ورمان ءورتى سالدارىنان تۋريستىك ماۋسىمنىڭ ورتاسىندا وت پەن تۇتىنگە وراندى. كەيبىر جەرلەردە جالىن تۇرعىن ۇيلەر مەن قوناقۇيلەرگە جاقىندادى, تۋريستەر مەن جەرگىلىكتى تۇرعىندار ەۆاكۋاتسيالاندى.
وسى وقيعاعا بايلانىستى قازاقستان تۇركياعا ءورت سوندىرەتىن ەكى تىكۇشاق پەن 16 قۇتقارۋشى جىبەردى. قازاقستان باسشىسى قاسىم-جومارت توقاەۆ تۇركيادا بولعان الاپات ءورت سالدارىنان ەلدىڭ ەكونوميكاسى مەن تۋريستىك بازاسىنا وراسان زور شىعىن كەلگەنىنە جانە ازاماتتاردىڭ دەنساۋلىعىنا اۋىر زاردابىن تيگىزگەنىنە بايلانىستى تۇركيا پرەزيدەنتى رەجەپ تايپ ەردوعانعا نيەتتەستىك بىلدىرگەن جەدەلحاتىن جولدادى. سونىمەن قاتار باۋىرلاس حالىققا گۋمانيتارلىق كومەك كورسەتۋگە دايىن ەكەنىن اتاپ ءوتتى.
