تاراتا ايتار بولساق, 2021 جىلدىڭ 10 تامىزىندا جەرگىلىكتى ۋاقىت بويىنشا 00.40-تا جەتىباي مەن بوزاشى كەن ورىندارىندا اۋىسىم جۇمىسشىلارى كاسىپورىن باسشىلىعىنان جالاقىنى جانە باسقا دا ىنتالاندىرۋ تولەمدەرىن كوتەرۋدى تالاپ ەتىپ, جۇمىستى توقتاتقان بولاتىن.
«م-تەحسەرۆيس» جشس-ءنىڭ ماڭعىستاۋ فيليالى – ماڭعىستاۋ وبلىسى اۋماعىندا ۇڭعىمالاردى جوندەۋ جانە كۇردەلى جوندەۋ بويىنشا ءىس-شارالاردى جۇزەگە اسىراتىن كاسىپورىن. جۇمىسشىلاردىڭ ورتاشا جالاقىسى – 158 مىڭنان 315 مىڭ تەڭگە ارالىعىندا.
ايتا كەتەرلىگى, بۇعان دەيىن 19 جانە 26 شىلدەدە مۇنايشىلار كومپانيا باسشىلىعىنا ماتەريالدىق تولەمدەردى ۇلعايتۋ تۋرالى بىرقاتار تالابى كورسەتىلگەن ۇجىمدىق حاتپەن جۇگىنگەن-ءتىن.
27 شىلدەدە قۇرىلعان كەلىسىم كوميسسياسى شەڭبەرىندە تاراپتار جۇمىسشىلاردىڭ تالاپتارىن تولىق ورىنداۋ بويىنشا ءوزارا كەلىسىمگە كەلمەدى.
10 تامىزدا جۇمىس توقتاتىلعان ساتتە الەۋمەتتىك ارىپتەستەرمەن كەلىسسوزدەر جۇرگىزۋ ءۇشىن كەن ورنىنا YNTYMAQ سالالىق كاسىپوداق ۇيىمىنىڭ توراعاسى قايراقباي جاڭابەكوۆ, ماڭعىستاۋ وبلىسى كاسىپوداقتار ورتالىعىنىڭ توراعاسى شادراح ەرمەكباي ۇلى, سونداي-اق ماڭعىستاۋ وبلىسى بويىنشا مەملەكەتتىك ەڭبەك ينسپەكتسياسى باسقارماسىنىڭ وكىلدەرى مەن «م-تەحسەرۆيس» جشس ماڭعىستاۋ فيليالىنىڭ باسشىلىعى كەلدى.
ەڭبەك داۋىن شەشۋ ءۇشىن پروتسەدۋراعا سايكەس ەڭبەك اربيتراجى قۇرىلدى. ونى YNTYMAQ كاسىپوداعىنىڭ توراعاسى قايراقباي جاڭابەكوۆ باسقاردى. ماڭعىستاۋ وبلىسى كاسىپوداقتار ورتالىعىنىڭ توراعاسى شادراح ەرمەكباي ۇلى كەلىسسوزدەر پروتسەسىنىڭ باقىلاۋشىسى بولدى.
كەلىسسوزدەر ناتيجەسىندە تاراپتار ىمىراعا كەلدى. ەڭبەك اربيتراجى جۇمىسشىلاردىڭ تالاپتارىن قاناعاتتاندىرۋ تۋرالى شەشىم شىعاردى.
«2021 جىلدىڭ 1 تامىزىنان باستاپ «م-تەحسەرۆيس» جشس ماڭعىستاۋ فيليالى قىزمەتكەرلەرىنىڭ جالاقىسى 50 پايىزعا كوتەرىلسىن; قازاقستان رەسپۋبليكاسىنىڭ تاۋەلسىزدىك كۇنىنە دەيىن بارلىق قىزمەتكەرگە 20 اەك مولشەرىندە بىرجولعى سىياقى تولەنسىن; مۇنايشىلار كۇنىنە جانە ناۋرىز مەرەكەسىنە سىياقى 10 اەك -تەن 20 اەك-كە دەيىن ۇلعايتىلسىن», دەپ كورسەتىلگەن ەڭبەك اربيتراجى حاتتاماسىنىڭ ماتىنىندە.
سونىمەن قاتار تاراپتار ەڭبەك اربيتراجىنىڭ شەشىمى ورىندالعان كۇننەن باستاپ ءۇش جىل ىشىندە كەن ورنىندا ەڭبەك داۋلارىنا موراتوري ەنگىزۋگە ۋاعدالاستى.
ەڭبەك اربيتراجىنىڭ شەشىمىنە سايكەس جۇمىسشىلاردىڭ ەرەۋىلى توقتاتىلدى.
قازاقستان رەسپۋبليكاسى ەڭبەك كودەكسىنىڭ 166-بابىنا سايكەس ەڭبەك اربيتراجىنىڭ شەشىمى ۇجىمدىق ەڭبەك داۋى تاراپتارى ءۇشىن مىندەتتى بولىپ تابىلاتىنىن اتاپ وتكەن ءجون.
«كەلىسسوزدەر ارقىلى عانا ىمىراعا كەلۋگە بولادى. كاسىپوداقتار فەدەراتسياسى وكىلدەرىنىڭ كەلىسسوز پروتسەستەرىنە قاتىسۋ تاجىريبەسى, ەگەر كاسىپورىندا كاسىپوداق ۇيىمى بولسا, كۇردەلى ەڭبەك داۋلارى جەدەل تۇردە ەڭبەك ۇجىمى جۇمىسشىلارىنىڭ پايداسىنا شەشىلەدى دەپ ايتۋعا بولادى», دەيدى قايراقباي جاڭابەكوۆ.
ەستەرىڭىزگە سالا كەتەيىك, YNTYMAQ سالالىق كاسىپوداعى مەن ماڭعىستاۋ وبلىسى كاسىپوداقتار ورتالىعىنىڭ بەلسەندى قاتىسۋىمەن بيىلعى 6 جانە 9 تامىزدا جاڭاوزەندەگى «ترۋبرەمورتالىق» جشس مەن «وزەنپرومگەوفيزيكا» اق-تاعى ەڭبەك داۋلارى شەشىلدى. ەكى كومپانيادا دا كەلىسىم كوميسسياسى شەڭبەرىندە جۇرگىزىلگەن كەلىسسوزدەر ناتيجەسىندە جۇمىسشىلاردىڭ ۇجىمدىق تالاپتارى قاناعاتتاندىرىلدى.
جىل باسىنان بەرى قازاقستان كاسىپوداقتار فەدەراتسياسىنا مۇشە ۇيىمداردىڭ قاتىسۋىمەن قازاقستاندىق كاسىپورىنداردا 50-دەن استام ەڭبەك داۋى شەشىمىن تاپتى. ولاردىڭ باسىم بولىگى ەلىمىزدىڭ باتىس ايماقتارىندا تىركەلگەن.
