شايماردان اعامىز بەينەلەۋ ونەرىنە وتكەن عاسىردىڭ الپىسىنشى جىلدارى كەلگەن تالانتتى تولقىننىڭ وكىلى. وسى بۋىندى ونەرتانۋشىلار «قاتاڭ ستيل وكىلدەرى» دەپ ايتادى. ويتكەنى ولاردىڭ شىعارمالارى ەپيكالىق سارىنمەن, تاريحي تاقىرىپتارعا بارعان باتىلدىعىمەن جانە كومپوزيتسيالىق قۇرىلىمىمەن جۇرتشىلىقتى جالت قاراتتى. وسى بۋىننىڭ اراسىنان ساريەۆ ءوزىنىڭ ەشكىمگە ۇقسامايتىن دارىنىمەن دارالاندى.
ايتالىق, سۋرەتشىنىڭ فورما مەن ءتۇستىڭ ۇيلەسىمىن ۇندەستىرە بىلگەن «ارال بالىقشىلارى», «مۇنايشىلار», «اسان قايعى» اتتى كارتينالارىنان ۇلتتىق بوياۋعا تولى ەرەكشەلىكتى كورەسىز. ءبىر عانا «شوپان» تۋىندىسىنداعى شوپاننىڭ الاقانىمەن جاس ءتولدى مەيىرلەنە ۇستاعان ءساتىن قانداي بەينەلى جەتكىزگەن. اۆتور وسى ەڭبەگى ارقىلى قازاقتىڭ مەيىرىمدىلىگى مەن تىنىس-تىرشىلىگىن تازا بەدەرلەگەن.
ونەرتانۋشى ساندۋعاش مىرزابەكوۆا ساريەۆ شىعارماشىلىعىندا تۇستەردىڭ قايتالانباس قۋاتى مەن اسەرى ەرەكشە ەكەندىگىن ايتادى. «سۋرەتشىنىڭ پەيزاجدارى مەن ناتيۋرمورتتارىنا قاراساڭىز تىلسىم تابيعات الەمىمەن استاسقان سىرلى ساز بەن دالا ءۇنىن بىردەن بايقايمىز. ول كەڭىستىك پەن ءتۇستىڭ زاڭدىلىقتارىن جەتىك مەڭگەرگەن شەبەر», دەيدى.
قىلقالام شەبەرى پورترەت جانرىندا دا ءونىمدى ەڭبەك ەتىپ, تاماشا تۋىندىلاردى ومىرگە اكەلدى. ايتالىق, «لەبىز ۇلىنىڭ پورترەتى» (1987), «قۇلپىتاس پورترەتى» (1986), «شوپاننىڭ ايەلى» (1980), «تۇراردىڭ پورترەتى» (1967), «ايەلدىڭ پورترەتى» (1968), «اۆتوپورترەت» (1986) جانە تاعى باسقا ەڭبەكتەرىندە ءار قىرىنان الىنعان جەكە بەينەلەردىڭ وبرازى ارقىلى ادامنىڭ جان-دۇنيەسىن بوياۋ سىرىمەن شىنايى اشا بىلگەن. بۇلاردى بەينەلەۋ ونەرىمىزدىڭ قازىناسىنا قوسىلعان سۇبەلى دۇنيەلەر دەپ ايتۋعا بولادى.
شايماردان ساريەۆ – اتىراۋ ولكەسىندە ومىرگە كەلىپ, ورتا مەكتەپتى تامامداعاننان كەيىن جولدامامەن قاراعاندىعا كەلىپ, شاحتادا جۇمىس ىستەگەن. Cودان سوڭ الماتى كوركەم سۋرەت ۋچيليششەسىندە ءبىلىم الىپ, حاركوۆتەگى سۋرەتشىلەر ينستيتۋتىنا وقۋعا تۇسەدى. ودان كەيىن سۋرەتشىنىڭ شىعارماشىلىق جولى, تالاي تالانتتار توعىسقان الماتىدا جالعاسادى. «جازۋشى», «جالىن» باسپاسىندا قىزمەت اتقارىپ, كىتاپ كوركەمدەۋدىڭ مايتالمانىنا اينالدى. 1982 جىلى «ونەر» باسپاسىنان «تابيعات اياسىندا» اتتى كىتابى جارىق كوردى. ەلىمىزدەن باسقا, وزبەكستان, رەسەي, ۋكراينا جانە ت.ب. ەلدەردە وتكەن كورمەلەرگە جۇمىستارى قويىلدى.
جالپى, تالانتتى تۇلعانىڭ جولى ومىردە جەڭىل بولىپ كورگەن ەمەس. شايماردان اعا دا تىرشىلىكتە ءبىراز تەپەرىش كوردى. ول جايىندا قازاقستان سۋرەتشىلەر وداعىنىڭ مۇشەسى مالىك قايداروۆ: «تىرشىلىكتىڭ ۇلى كەڭىستىگىندە ماڭدايىنا جازىلعان تالانتتى, جۇرەگىن شىمىرلاتىپ, جان-دۇنيەسىن وكسىتكەن مۇڭدى ەنشىلەپ, ءوزىنىڭ انتەك, ولشەمگە سىيمايتىن مىنەزىمەن, ءپىشىم قالپىمەن عۇمىر كەشكەن سۋرەتشى ءومىردى, ءومىردىڭ شىنشىل شىرايىن, تىنىسىن تىلسىمى بولەك بوياۋلاردان تاپتى. بۇل – شىن مانىندە سۋرەتشىنىڭ شارق ۇرىپ ىزدەپ, كەدەرگى, توسقاۋىلداردان تايساقتاماي ءوتىپ, ومىردەن, ونەردەن ءوزىن ءوزى تابۋى ەدى. سوندىقتان دا بولار, جىلدار بويى سەزىم زەردەسىندە ويانىپ, قيالىن تەربەپ, كوڭىل سارايىندا جيناقتالعان وي ۇشقىندارىنىڭ توپتاماسىنا – «سۋرەت تۋرالى تولعانىستارىنا» ول ۇلى پيكاسسونىڭ: «مەن ىزدەيمىن, تابامىن!» دەگەن ايگىلى ءسوزىن ەپيگراف ەتىپ العان», دەپ جازادى.
دارىندى سۋرەتكەر 1988 جىلى تۋعان جەرىندە اۋىر ناۋقاستان قايتىس بولدى. قازىر اتىراۋداعى وبلىستىق كوركەمسۋرەت جانە قولدانبالى-ساندىك ونەر مۋزەيى شايماردان ساريەۆتىڭ ەسىمىمەن اتالادى.
