ايماقتار • 12 تامىز، 2021

قاراعاندى وبلىسىندا كوروناۆيرۋس جۇقتىرعاندار كوبەيدى

17 رەت كورسەتىلدى

قاراعاندى وبلىسىندا كوروناۆيرۋس ينفەكتسياسىن جۇقتىرىپ، اۋىر حالدە اۋرۋحانالارعا ءتۇسىپ جاتقاندار سانى كۇن وتكەن كوبەيىپ كەلەدى. مۇنداي مالىمدەمەنى وبلىستىق دەنساۋلىق ساقتاۋ باسقارماسىنىڭ باسشىسى گامال توقسامباەۆ وڭىرلىك كوممۋنيكاتسيالار قىزمەتى الاڭىندا وتكەن بريفينگتە جاسادى، دەپ حابارلايدى Egemen.kz.

ءوڭىردىڭ باس دارىگەرى جاعدايدىڭ بۇلايشا قالىپتاسۋىنىڭ بىرقاتار سەبەپتەرىن اتاپ كورسەتتى.

«وكىنىشكە قاراي، سوڭعى ۋاقىتتا بىزدە اۋىر ناۋقاستاردىڭ جۇقپالى اۋرۋلار اۋرۋحانالارىنا ءتۇسۋى جيىلەپ كەتتى.

ىقتيمال بايلانىستاردى تالداۋ كەزىندە ناۋقاستاردىڭ بۋراباي، باياناۋىل، بالقاش سياقتى جەرلەردەگى دەمالىس ورىندارىنان كەلگەنى نەمەسە ءتۇرلى مەرەكەلىك وتىرىستاردا  بولعانى انىقتالدى. بۇدان بولەك، ناۋقاستاردىڭ كوبى اۋىرعانىن سەزىنگەنمەن، ۇزاق ۋاقىت بويى مەديتسينالىق كومەككە جۇگىنبەي ءجۇرىپ الادى. اۋرۋحاناعا تىنىس الۋ جەتكىلىكسىزدىگى، السىزدىك، ايقىن ينتوكسيكاتسيا ورشىگەن كەزدە عانا كەلەدى»، دەدى باسقارما باسشىسى.

قازىرگى ۋاقىتتا وبلىستاعى ينفەكتسيالىق توسەكتەردىڭ 52،7%-ى بوس ەمەس ەكەن. ستاتسيونارلاردا جامان تۇماۋمەن اۋىراتىن ءۇش مىڭعا جۋىق ناۋقاس ەمدەلۋدە. جانساقتاۋ بولىمشەلەرىندەگى 163 اۋىر ناۋقاستىڭ 45-ءى وكپەنى جاساندى جەلدەتۋ ء(وجج) اپپاراتىنا قوسىلعان.

ىندەتتىڭ ورشۋىنە بايلانىستى، كەنشىلەر استاناسىندا مەديتسينالىق كومەك كورسەتۋ ءۇشىن قوسىمشا 380 توسەك-ورىن اشىلدى. قالا بويىنشا جالپى قۋاتتىلىق 2 971 توسەك-ورىنعا دەيىن ۇلعايتىلعان، ونىڭ 58%-ى قازىر جۇمىس ىستەپ تۇر.

گامال توقسامباەۆ جەدەل مەديتسينالىق جاردەم بريگادالارىنىڭ سانىن ارتتىرۋعا ءماجبۇر بولىپ وتىرعاندارىن اتاپ ءوتتى. نەگە دەسەڭىز، سوڭعى كەزدەرى تۇرعىندار تاراپىنان شاقىرۋلار تىم جيىلەپ كەتكەن. قازىر جەدەل مەديتسينالىق كومەكتىڭ 105 بريگاداسى حالىققا قىزمەت كورسەتىپ ءجۇر.

«قاجەتتىلىك بولسا، تاعى 20 بريگادانى جەلىگە شىعارا الامىز»، دەدى ۆەدومستۆو باسشىسى.

وكىنىشتىسى سول، قازىر كەيبىر تۇرعىندار كوروناۆيرۋس ينفەكتسياسىنىڭ العاشقى بەلگىلەرى پايدا بولا باستاعاندا بىردەن مەديتسينالىق كومەككە جۇگىنبەي، وزدەرى ۇيدە ءوز بەتتەرىمەن ەمدەلىپ، اۋرۋدى اسقىندىرىپ الادى ەكەن. بۇعان قوسا، تۇرعىنداردىڭ ۆاكتسينا سالدىرۋعا سالدىر-سالاق قاراۋى دا جاعدايدىڭ كۇردەلەن تۇسۋىنە زاردابىن تيگىزىپ جاتىر.

بريفينگ بارىسىندا وبلىستىق دەنساۋلىق ساقتاۋ باسقارماسىنىڭ باسشىسى پاندەميامەن كۇرەسۋدىڭ ەڭ ءتيىمدى امالى – ۆاكتسينا الۋ ەكەنىن جۇرتتىڭ ەسىنە تاعى ءبىر مارتە سالدى

ەسكە سالار بولساق، قاراعاندى وبلىسىندا پاندەميا باستالعاننان بەرى 70 مىڭعا جۋىق ادامنىڭ جامان تۇماۋمەن اۋىرعانى رەسمي تىركەلگەن. ونىڭ ىشىندە ناۋقاستاردىڭ 79%-ى جازىلىپ شىقتى. ال وتكەن تاۋلىكتە وبلىستىڭ 1127 تۇرعىنىنىڭ كوروناۆيرۋس ينفەكتسياسىن جۇقتىرعانى بەلگىلى بولدى. اتالعان سىرقاتتان 835 ادام ساۋىعىپ شىققان.

سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار