GDL كاسىپوداعىنىڭ باسشىسى كلاۋس ۆەسەلسكيدىڭ ايتۋىنشا, ەرەۋىلگە العاش بولىپ بۇكىل جۇك پويىزدارىنىڭ قىزمەتكەرلەرى شىقپاق. ولار سەيسەنبى كۇنى كەشكى 17:00-دەن باستاپ شەرۋلەتەدى. سودان كەيىن, سارسەنبى كۇنى ولارعا جولاۋشىلار پويىزدارىنىڭ قىزمەتكەرلەرى قوسىلادى. جاپپاي ەرەۋىل جۇماعا دەيىن سوزىلادى.
كاسىپوداق جالاقىنى 3,2 پايىزعا كوتەرۋدى جانە 600 ەۋرو كولەمىندە ءبىر رەتتىك «كوروناۆيرۋس بونۋسىن» تولەۋدى تالاپ ەتىپ وتىر. گەرمانياداعى تەمىرجولعا جاۋاپتى Deutsche Bahn وپەراتورى مۇنى قابىلداعان جوق. كومپانيا پاندەميا باستالعالى بەرى ميللياردتاعان شىعىنعا ۇشىرادى. بۇعان تاياۋدا بولعان سۋ تاسقىنىن قوسىڭىز. قىسقاسى, Deutsche Bahn-نىڭ شىعىنى شاش-ەتەكتەن.
Deutsche Bahn قالاارالىق پويىزداردىڭ تورتتەن ءبىر بولىگى عانا سارسەنبى مەن بەيسەنبىدە جۇرەتىنىن, بەرلين مەن باتىستاعى قالالارمەن, سونداي-اق گامبۋرگ پەن فرانكفۋرت اراسىنداعى بايلانىستارعا باسىمدىق بەرىلەتىنىن حابارلادى.
كومپانيا جولاۋشىلاردى قاجەتسىز ساياحاتتان باس تارتۋعا شاقىردى جانە ءار ورىنعا تاپسىرىس بەرۋ ءۇشىن كوروناۆيرۋسقا بايلانىستى شەكتەۋلەردى الىپ تاستايتىنىن ايتتى.
گەرمانيا اۋماقتارى قازىر جازعى دەمالىستا. سوندىقتان ساياحاتشىلار پويىز قىزمەتىنە ءجيى جۇگىنەدى. بىراق الداعى ەكى كۇندە تەمىر جول قىزمەتى باسەڭدەپ قالاتىندىقتان, جولاۋشىلار ساتىپ العان بيلەتىنىڭ قۇنىن قايتارۋدى تالاپ ەتۋى مۇمكىن.
وسىلايشا, GDL كاسىپوداعى ءوز ماقساتىنا جەتۋى ىقتيمال. ۇيىمعا 35000 جۇمىسكەر مۇشە. بۇعان دەيىن كاسىپوداق 2014 جانە 2015 جىلدارى سەگىز رەت جالپىۇلتتىق ەرەۋىلگە شىعىپ, ءوز تالاپتارىن ورىنداتقان.
