مەديتسينا • 11 تامىز، 2021

امسق دارىگەرلەرگە ۇستەمەاقى تولەۋ ءۇشىن 18،3 ملرد تەڭگە ءبولدى

بۇل مالىمەتتەردى الماتى قالالىق الەۋمەتتىك مەديتسينالىق ساقتاندىرۋ قورىنىڭ ديرەكتورى تىلەۋحان ابىلداەۆ بۇگىنگى وڭىرلىك كوممۋنيكاتسيالار قىزمەتىندە وتكەن ءباسپاسوز ماجىلىسىندە مالىمدەدى، دەپ حابارلايدى Egemen.kz.

ايناش ەسالى

ول ەلدە مەديتسينالىق ساقتاندىرۋ جۇيەسىن قۇرۋ پاندەميامەن قاتار كەلگەنىن، سوندىقتان بارلىق مەديتسينالىق كومەك، ونىڭ ىشىندە كوروناۆيرۋستىڭ تارالۋىن بولدىرماۋ قىزمەتتەرىن ساقتاندىرۋ مارتەبەسىنە قاراماستان مىندەتتى مەديتسينالىق ساقتاندىرۋ جۇيەسى ەسەبىنەن جۇرگىزىلگەنىن ەسكە سالدى.

«پاندەميا باستالعالى بەرى 2020 جىلدىڭ ناۋرىزىنان باستاپ مەديتسينالىق ساقتاندىرۋ قورى كوروناۆيرۋس پەن پنەۆمونيامەن كۇرەسۋ شارالارى ءۇشىن اقى تولەۋدى، ونىڭ ىشىندە مەديتسينا قىزمەتكەرلەرىنە ۇستەمەاقى تولەۋدى قاراستىردى. 2021 جىلدىڭ ءبىرىنشى جارتىجىلدىعىندا الماتى قالاسىندا ەپيدەمياعا قارسى شارالارعا قاتىسقان 42 559 دارىگەر 18،3 ملرد تەڭگە كولەمىندە ۇستەماقى الدى»، دەدى ت.ابىلداەۆ.

جالپى سومادان ءبىرىنشى جارتىجىلدىقتا تولەنگەنى:

- 1-ءشى تاۋەكەل توبى - 12،6 ملرد تەڭگە (20 069 ادام);

- 2-ءشى تاۋەكەل توبى - 4،1 ملرد تەڭگە (12 480 ادام);

- 3-ءشى تاۋەكەل توبى - 1،6 ملرد تەڭگە (10 010 ادام).

بارلىعى 2021 جىلدىڭ ءبىرىنشى جارتىجىلدىعىندا الماتىدا كوروناۆيرۋستىق ينفەكتسيامەن اۋىراتىن پاتسيەنتتەردى ەمدەۋگە مەديتسينالىق قىزمەت كورسەتۋگە 15،8 ملرد تەڭگە تولەنىپ، ال پتر-تەستتەردەن 2،5 ملرد تەڭگەگە 313 مىڭنان استام ازامات وتكەن.

ت. ابىلداەۆ قازاقستاندىقتاردىڭ ساقتاندىرۋ مارتەبەسىنە قاراماستان كوروناۆيرۋستىق ينفەكتسيا مەن پنەۆمونياعا قارسى مەديتسينالىق كومەك تەگىن الاتىنىن ەسكە سالدى. ۇيدەگى ءموبيلدى توپتار مەن اۋرۋحانالاردىڭ قىزمەتتەرى COVID-19 جۇقتىرعاندارعا جانە COVID-19 كۇدىگى بار ناۋقاستارعا كورسەتىلەدى. بيىل ءموبيلدى توپتار شامامەن 119 مىڭ شاقىرتۋلارعا قىزمەت كورسەتتى، 681،6 ملن تولەندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز