بيىلعى ماۋسىم ايىندا استاناداعى ارداقتى اقىن اتىنداعى مۋزەيدىڭ ديرەكتورى, مەملەكەتتىك سىيلىقتىڭ لاۋرەاتى نەسىپبەك ايت ۇلى, وسى ولكەنىڭ تۋماسى, پارلامەنت سەناتىنىڭ دەپۋتاتى التىنبەك نۇح ۇلى ەكەۋى بارىپ, ساكەنتاۋىن ءوز كوزىمەن كورىپ قايتادى.
نەسىپبەك ايت ۇلىنىڭ ايتۋىنشا, ساكەن اتامىز 1918 جىلعى اقمولاداعى اقتار توڭكەرىسىنەن سوڭ تۇتقىندالىپ, 1919 جىلى پەتروپاۆل تۇرمەسىنە جىبەرىلگەنى بەلگىلى. سودان ول 47 كۇن بويى اتامان اننەنكوۆتىڭ «اجال پويىزىمەن» ومبىعا بارعاندا كولچاك تۇرمەسىنەن قاشىپ, تۋعان اۋىلىنا كەلە جاتقاندا باياناۋىلعا توقتاپ, ايالداعان.
− بىراق اقىننىڭ باياناۋىلعا كەلگەنىن اقتىڭ ادامدارى ءبىلىپ قالىپ, ونىڭ ىزىنە تۇسەدى. الايدا ەل ازاماتتارى تۇعىرلى تۇلعانى وسى تاۋعا اپارىپ, ءبىراز كۇن باعىپ-قاعادى. ساكەن اعامىز باياناۋىلعا بەكەر كەلمەگەن, اقىننىڭ اناسى – وسى جەردىڭ قىزى. سوندىقتان ول كىسى ناعاشىلارىن ساعالاپ كەلسە كەرەك. اتالعان تاۋ اتاقتى سۇلتانماحمۇت اۋىلىنىڭ ىرگەسىندە, تورايعىر كولىنىڭ جاعاسىندا تۇر. ءبىر قاراعاندا, كيىز ءۇي سەكىلدى كوزگە ەرەكشە كورىنەدى. سونى جەرگىلىكتى جۇرت اقىننىڭ قۇرمەتىنە «ساكەنتاۋ» دەپ اتاپ كەتكەن, − دەيدى نەسىپبەك اعا.
