9 تامىزدا سەمەيدەگى ەسكى كوپىردىڭ جاياۋ جۇرگىنشىلەرگە ارنالعان بولىگى وپىرىلىپ تۇسكەن. اياق استىنان دەيىن دەسەك, انەۋگۇنى تىرەۋى اجىراپ كەتكەن. ول تۋرالى الەۋمەتتىك جەلىدە جەرگىلىكتى جۇرت جارىسا جازىسقان. ءتىپتى فوتوسۋرەتىنە دەيىن جۇكتەگەن. الايدا جۇرتتىڭ دابىلىنا قۇلاق تۇرگەن ءبىر باسشى بولمادى. سول كەزدە كوزدەرىن شۇقىپ تۇرىپ كورسەتكەن اقاۋعا باسشىلاردىڭ ءبىرى ءمان بەرسە, مىناۋ ۇقساپ وپىرىلىپ جاتپاس ەدى. ابىروي بولعاندا, بالا-شاعا ءوتىپ بارا جاتقاندا قۇلاماعان. ايتپەسە, قاۋساپ تۇرعان كوپىردىڭ ۇستىنەن ادام اياعى ۇزىلمەيدى. ارى-بەرى سابىلىسقان كولىك تە كوپ. ايتپاقشى, باياعىدا دا بەتكى جابىندىسى ويىلىپ كەتىپ, اۆتوبۋستىڭ دوڭگەلەگى ءتۇسىپ كەتكەن ەكەن.
سەمەيدەگى قوعام بەلسەندىلەرىنىڭ ايتۋىنشا, كوپىر 1997 جىلدان بەرى اپاتتىق جاعدايدا تۇر ەكەن. ول ۋاقىتتا وڭ جاعالاۋ مەن جاڭا سەمەيدى جالعاپ جاتقان جالعىز كوپىر-تۇعىن. كەيىن 2001 جىلى جاڭا اسپالى كوپىر ءتۇسىپ, ەسكى كوپىرگە تۇسەتىن سالماق ازايدى. دەسە دە, ەلۋ جىلعى ەسكى وتكەل ەلگە قاۋىپ توندىرمەي تۇرعان جوق.
وسى جولى كوپىر وپىرىلىپ تۇسە سالا قالا باسشىلىعى وقيعا ورنىنا جەتكەن. كوپىردىڭ قاڭقاسى ءبۇتىن دەگەندەي پىكىرگە كەلگەن ولار, قاۋىپسىزدىك ءۇشىن كوپىردى ۋاقىتشا جاپقان. الداعى كۇندەرى ارنايى ماماندار كوپىردى تولىقتاي تەكسەرىپ, ءبىر قورىتىندىعا كەلەدى. دۇرىسى, جازاتايىم جاعداي بولماي تۇرعاندا, كۇردەلى جوندەۋ كەرەك شىعار.
