«تاراپتار كورشى اۋعانستانداعى جاعدايدىڭ جۋىق اراداعى رەتتەلۋى ورتالىق ازياداعى قاۋىپسىزدىك پەن تۇراقتىلىقتى ساقتاۋ مەن نىعايتۋدىڭ ماڭىزدى فاكتورلارىنىڭ ءبىرى بولىپ تابىلاتىنىن راستايدى. وسىعان وراي, تاراپتار اۋعان قوعامىنداعى ازاماتتىق بەيبىتشىلىك پەن كەلىسىمگە جەدەل قول جەتكىزۋگە جان-جاقتى كومەك كورسەتۋگە دايىن ەكەندىكتەرىن ءبىلدىردى», دەلىنگەن مالىمدەمەدە.
پرەزيدەنتتەر ورتالىق ازياداعى, يادرولىق قارۋدان ازات ايماق تۋرالى شارتتى ىسكە اسىرۋ بويىنشا ءوڭىر مەملەكەتتەرىنىڭ بەلسەندى ىنتىماقتاستىعىن جالعاستىرۋعا دايىن ەكەندىكتەرىن ءبىلدىردى جانە يادرولىق قارۋسىزدانۋ مەن تاراتپاۋ ىسىندە كۇش-جىگەردى شوعىرلاندىرۋ ماقساتىندا باسقا دا يادرولىق قارۋسىز ايماقتارمەن ءوزارا ءىس-قيمىلدى جانداندىرۋ قاجەتتىگىن اتاپ ءوتتى.
مەملەكەت باسشىلارى جاھاندىق كليماتتىڭ وزگەرۋىنىڭ ورتالىق ازياداعى مۇزدىقتارعا تەرىس اسەرىن ەسكەرە وتىرىپ, تاجىكستان رەسپۋبليكاسى پرەزيدەنتىنىڭ 2025 جىلدى حالىقارالىق مۇزدىقتاردى ساقتاۋ جىلى دەپ جاريالاۋ جانە مۇزدىقتاردى قورعاۋ حالىقارالىق قورىن قۇرۋ تۋرالى ۇسىنىسىن قولدادى.
مەملەكەتتەر باسشىلارى تۇرىكمەنستان پرەزيدەنتىنىڭ تومەن كومىرتەكتى ەنەرگەتيكانى دامىتۋ جونىندەگى شارالاردى جۇزەگە اسىرۋعا باعىتتالعان بۇۇ ستراتەگياسىن ازىرلەۋ تۋرالى باستاماسىنا, سونداي-اق بۇۇ اياسىندا ەنەرگەتيكاداعى باسىم باعىتتاردىڭ ءبىرى رەتىندە سۋتەگىن دامىتۋ جونىندەگى حالىقارالىق «جول كارتاسىن» قۇرۋعا قولداۋ ءبىلدىردى.
مەملەكەتتەر باسشىلارى قازاقستان رەسپۋبليكاسى پرەزيدەنتىنىڭ بۇۇ اياسىندا اۋرۋلار جانە بيوقاۋىپسىزدىكتى باقىلاۋ جونىندەگى وڭىرلىك ورتالىقتار جەلىسىن قۇرۋ, سونداي-اق بۇۇ اياسىندا ارنايى كوپجاقتى ورگان – بۇۇ قاۋىپسىزدىك كەڭەسىنە ەسەپ بەرەتىن بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ تۋرالى باستاماسىنا قولداۋ ءبىلدىردى.
