«توكيوداعى وليمپيادا ويىندارىنا قازاقستاننان 93 سپورتشى قاتىستى. جەڭىسكە دەگەن ەرىك-جىگەر مەن شەبەرلىكتى كورسەتكەن سپورتشىلارعا العىس ايتامىن. وليمپيادانىڭ قولا جۇلدەگەرلەرىن قۇتتىقتايمىن, بۇل ولاردىڭ كوپ كۇندىك قاجىرلى جاتتىعۋلارىنىڭ اسەرلى ناتيجەسى», دەپ جازدى مەملەكەت باسشىسى Twitter پاراقشاسىندا.
سونداي-اق, پرەزيدەنت ۇلتتىق كوماندانىڭ قورىتىندى ناتيجەسى – 8 قولا مەدال جانە جالپى كوماندالىق ەسەپتە 83-ءشى ورىن - قازاقستاننىڭ سپورتتىق الەۋەتىنە جانە مەملەكەت سپورتتى دامىتۋعا قوسقان قوماقتى قاراجاتىنا سايكەس كەلمەيتىنىن قوستى.
قاسىم-جومارت توقاەۆ پاريجدە وتەتىن كەلەسى ويىنداردا ازاماتتارىمىزدىڭ ءۇمىتىن اقتايتىن ناتيجەلەردى كورسەتۋ ءۇشىن توكيو وليمپياداسىنان دۇرىس ساباق الۋ قاجەتتىگىن اتاپ ءوتتى.
«ۇلتتىق قۇرامانىڭ وليمپيادادا ونەر كورسەتۋى سپورت سياقتى ماڭىزدى سالاداعى شۇعىل, ءتيىمدى رەفورمالاردىڭ پايداسىن كورسەتەدى. بۇقارالىق جانە بالالار سپورتىن دامىتۋعا نازار اۋدارىپ, وسى نەگىزدە الەمدىك ارەنادا كورنەكتى تابىستارعا جەتۋگە ۇمتىلۋ كەرەك», دەپ تۇيىندەدى پرەزيدەنت.
