8-تامىز كۇنى اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەەۆتىڭ تاپسىرماسى بويىنشا الماتى وبلىسى بالقاش اۋدانى بالاتوپار اۋىلدىق وكرۋگىنە مينيسترلىك قىزمەتكەرلەرىنىڭ جۇمىس توبى جىبەرىلگەن.
ولار جەرگىلىكتى تۇرعىندارمەن جانە شارۋا قوجالىقتارىنىڭ باسشىلارىمەن كەزدەستى. كەزدەسۋ بارىسىندا جەرگىلىكتى تۇرعىندار مالدىڭ جاپپاي قىرىلعانىن راستاعان جوق جانە مال ازىعى تاپشىلىعى تۋرالى اقپاراتتى جوققا شىعاردى.
تۇرعىنداردىڭ ايتۋىنشا, شابىندىق جەردىڭ ءشوبى مالدى قىستان الىپ شىعۋعا تولىق جەتەدى. بۇدان بولەك, بالاتوپار اۋىلىنان 25-30 كم قاشىقتىقتا ورنالاسقان بالقاش كولىنىڭ جاعاسىنان قوسىمشا مال ازىعىن دايىنداۋعا بولادى.
سونىمەن قاتار مينيسترلىك وكىلدەرى جەتى ادامنان تۇراتىن بريگادا تراكتورلارىمەن ءشوپتى شاۋىپ, جيناپ جاتقان توپار جانە جەلتوراڭعى اۋىلدارىنىڭ شابىندىق جەرلەرىن ارالادى.
جالپى, بالاتوپار اۋىلدىق وكرۋگى مەن بالقاش اۋدانى اۋماعىندا قۇرعاقشىلىق جوق. ونىمەن قوسا, شابىندىق جەرلەر جامبىل جانە ىلە اۋداندارىنىڭ فەرمەرلەرىنە, سونداي-اق جامبىل وبلىسىنىڭ كورشىلەس اۋداندارىنا بەرىلەدى.
بالاتوپار اۋىلىندا جانە جالپى بالقاش اۋدانىندا قۇرعاقشىلىق سالدارىنان مال قىرىلدى, جەم-ءشوپ تاپشى دەگەن اقپارات جالعان.
«بۇقارالىق اقپارات قۇرالدارىندا جاريالانعان مالدىڭ جاپپاي قىرىلۋى تۋرالى اقپارات شىندىققا جاناسپايدى جانە وعان ەشقانداي نەگىز جوق», دەپ حابارلادى.
