قازاقتىڭ كورنەكتى جازۋشىسى عابيت مۇسىرەپوۆ: ء«بىر ايتاتىن نارسە – جازۋشى ءۇشىن كىتاپ وقۋ مەن شىعارما جازۋدىڭ ارا سالماعىن تەڭ ۇستاۋ كەرەك-اۋ دەيمىن. بىرەۋلەر توپەپ, باستىرمالاتىپ, باس-كوزگە قاراماي جازا بەرەدى دەسەدى. وسىنى ءوز باسىم تۇسىنبەيمىن. وقىماعان ادام قالاي ويلانۋى مۇمكىن, «وقىماسا وي توقىرايدى» دەگەن ءسوز وتە ورىندى. ال تەك وقي بەرىپ, جازۋدى مۇلدە ىسىرىپ قويۋ دا كەمشىلىك بولسا كەرەك», دەپ ايتقان ەكەن.
ءوز باسىم كىتاپ وقۋعا كوپ ۋاقىت بولەم. جۋىردا مۇحتار ماعاۋيننىڭ سوناۋ 1990 جىلى «جازۋشى» باسپاسىنان جارىق كورگەن ەكى تومدىق تاڭدامالى شىعارمالارىن قايتالاپ وقىدىم. تالانتتى سۋرەتكەردىڭ وسىدان 35-40 جىل بۇرىن جازعان «تازىنىڭ ءولىمى», «قارا قىز», ء«بىر اتانىڭ بالالارى», ء«ومىر جىرى», «جىلاندى جاز», «كوك بالاق», «جۇيرىك» حيكاياتتارى كەرەمەت, جان-دۇنيەمدى ەرەكشە كۇيگە بولەدى. سودان كەيىن ءابىش كەكىلباي ۇلى اعامىزدان باستاپ, يۋكيو ميسيمانى, ستەفان تسۆەيگتى, مارك تۆەندى, بەكەن ىبىرايىمدى, عابيدەن قۇلاحمەتتى, راحىمجان وتارباەۆ شىعارمالارىن وقىپ شىقتىم...
قالىپتاسقان داعدىم بويىنشا, جازۋدى ساعىنىپ, اڭساپ بارىپ وتىرام, سوندايدا العاشقى تۋىندىمدى اق قاعازعا تۇسىرگەندەي اسەرلەنەم, جازعانىمدى اياماي سىزام, شيمايلايمىن, سىنايمىن, سودان سوڭ عانا كوڭىلىم جايلاناتىنى بار...
بيىل ەرەسەكتەرگە ارناپ ءتورت, بالالارعا بەس اڭگىمە, ءۇش ەرتەگى جازدىم. «جۇلدىز» جۋرنالىندا (№7, 2021) ءبىر توپ اڭگىمەلەرىم جارىق كوردى. «بالدىرعاننىڭ» №8 سانىنداعى «ايجاناردىڭ ارمانى» اتتى ەرتەگى-اڭگىمەم دە جاس وقىرماندى بەيجاي قالدىرا قويماس دەگەن ويدامىن. ونشاقتى كۇننەن بەرى ءبىرازدان باسىمدا ء«پىسىپ» جاتقان, بالالارعا ارنالعان جاڭا ەرتەگى-پوۆەسىمنىڭ كىلتى تابىلا كەتىپ, سوعان كىرىستىم. وندا بۇگىنگى قالا بالاسىنىڭ كەسكىن-كەلبەتى, تىنىس-تىرشىلىگى, ارمان-ماقساتى, ت.ب. دۇنيەلەر قامتىلادى.
