بۇل جايىندا شىمكەنت قالاسى اكىمدىگىنىڭ ءباسپاسوز قىزمەتى ءمالىم ەتتى. دەنساۋلىعى سىر بەرگەن بالاقايدى دارىگەرلەر جانساقتاۋ بوىلىمنە شۇعىل جاتقىزىپ, تەكسەرۋ جۇرگىزگەن.
ناۋقاس بالادان الىنعان سىناما ناتيجەسىندە كاۆاساكي تارىزدەس سيندروم انىقتالعان.
قاۋىپتى ىندەت انىقتالعان بالاقايدىڭ جاعدايى العاشقى ءۇش كۇندە ناشارلاپ كەتكەن.
«تەك ءتورتىنشى تاۋلىكتە عانا ناۋقاس بالانىڭ دەنساۋلىق جاعدايى تۇراقتالعان» دەپ حابارلايدى دەنساۋلىق ساقتاۋ باسقارماسى.
ەمدەۋ شارالارىمەن قاتار ماماندار ينفەكتسياعا شالدىققان بالانىڭ اعزاسىنداعى وزگەرىستەردى دەر كەزىندە انىقتاپ, ومىرىنە تونگەن قاۋىپتى الدىن العان.
اتا-اناسىنىڭ سوزىنشە, بالاسىندا اۋرۋدىڭ العاشقى بەلگىلەرى بايقالعاندا, جەكەمەنشىك كلينيكادا ەم العان. بالادا اۋرۋ بەلگىلەرى باسىلعان سوڭ ۇيدەگى ۇلكەندەر سىرقاتىنا ءمان بەرمەپتى. الايدا اراعا ءبىر اپتا سالىپ, بالانىڭ جاعدايى كۇرت ناشارلاپ, جانساقتاۋ بولىمىنەن ءبىر-اق شىقتى.
«بۇل - بيىل تىركەلگەن كاۆاساكي تارىزدەس مۋلتيجۇيەلى قابىنۋ سيندرومىنا شالدىعۋدىڭ ەكىنشى جاعدايى. ال بىلتىر كاۆاساكي تارىزدەس مۋلتيجۇيەلى قابىنۋ سيندرومى ءتورت بالادان انىقتالعان», دەيدى قالالىق كلينيكالىق بالالار اۋرۋحاناسىنىڭ باس دارىگەرى دينارا جۋماديلوۆا. مەديتسينا ماماندارى بالانىڭ دەنە قىزۋى 38,5-تەن جوعارى بولسا, ءىش اۋىرۋى, قۇسۋ, جۇرەك اينۋى, دەنەدەگى بورتپە داق, جوتەل پايدا بولسا, مىندەتتى تۇردە دارىگەر شاقىرتۋ قاجەتتىگىن ەسكەرتەدى.
ويتكەنى, بۇلار – كاۆاساكي تارىزدەس مۋلتيجۇيەلى قابىنۋ سيندرومىنىڭ بەلگىلەرى.
دەر كەزىندە دارىگەرگە كورىنبەسە, سوڭى قايعىلى جاعدايعا الىپ كەلۋى دە ىقتيمال. ويتكەنى, اۋرۋ جۇرەك پەن وكپە, اسقازان, ىشەك جولى نەمەسە جۇيكە جۇيەسى سەكىلدى اعزانىڭ بىرنەشە جۇيەسىن بىردەن زاقىمدايدى.
اتالمىش اۋرۋدىڭ الدىن الۋ ءۇشىن ەرەسەكتەر بالانى كوروناۆيرۋستان ساقتاۋعا كۇش سالۋى كەرەك. ونىڭ بىردەن ءبىر جولى – ۆاكتسينا سالدىرۋ. سوندىقتان دارىگەرلەر ءار ادام ءوز وتباسىن قورعاۋ ماقساتىندا ەكپە سالدىرۋىنىڭ ماڭىزى زور ەكەنىن تاعى دا اتاپ ءوتتى.
