بۇل تۋرالى Lada.kz باسىلىم مالىمدەدى.
نارەستەنىڭ اناسىنىڭ ايتۋىنشا, 26-شاعىن اۋداندا ورنالاسقان وبلىستىق بالالار اۋرۋحاناسىنىڭ مەدبيكەلەرى سۋرەتتە كورسەتىلگەندەي, 8 ايلىق بالانىڭ قولىن قالاي بولسا سولاي تاڭعان. سالدارىنان بالانىڭ قولى كوگەرىپ, قاناي باستاعان. بالانىڭ قولى كۇيىپ قالعان سوڭ, 3 تامىزدا ولار اۋرۋحاناعا ەكىنشى رەت تاڭۋ ءۇشىن كەلىپتى.
«ەكى مەدبيكە ۇلىمنىڭ سول قولىن تاڭىپ, بايلاپ بەردى. مەنى پروتسەدۋرالىق كابينەتكە كىرگىزبەدى. ودان كەيىن ءبىز ۇيگە كەتتىك. اۋرۋحانادان شىققان كەزدە, ۇلىمنىڭ قولى ازداپ قاناي باستادى. مەن جاڭا عانا تاڭىلعاندىقتان قاناعان شىعار دەپ ويلادىم. ۇيىقتار الدىندا ۇلىمنىڭ قولىن قايتا تاڭايىن دەپ ەدىم, بايلامدى وڭايلىقپەن شەشۋ مۇمكىن بولمادى. بالامنىڭ قولى كوگەرىپ كەتكەن جانە قاناعان ەكەن. مەن قاتتى قورقىپ كەتتىم. مەدبيكەلەر جاساپ بەرگەن تاڭعىشتىڭ سالدارىنان بالامنىڭ قولى وسىنداي كۇيگە جەتتى: كوگەرىپ, قاناپ, ءىسىپ كەتكەن», دەيدى انا.
جاس انانىڭ ايتۋىنشا, كەلەسى كۇنى تاڭەرتەڭ ول ايماقتىق دەنساۋلىق ساقتاۋ باسقارماسىنا شاعىمدانعان.
«باسقارمادا ءبىزدى تىڭدادى, سودان كەيىن ءبىز 26-شاعىن اۋدانداعى بالالار اۋرۋحاناسىنا بىرگە باردىق. سول جەردە ءبىز بالامنىڭ قولىن ءتۇسىرىپ العان فوتوسۋرەتتەر مەن ۆيدەولاردى كورسەتتىك. تاڭۋعا دەيىن بالامنىڭ قولى جاقسى كۇيدە ەدى. بىراق اۋرۋحانانىڭ تراۆماتولوگى مەدبيكەلەرى ءۇشىن كەشىرىم سۇراۋدىڭ ورنىنا ءوزىمىزدى ايىپتادى. بالانى دۇرىس قاراماي, كۇيدىردىڭدەر دەدى. ءوز مەدبيكەلەرىن قورعاپ, تاڭعىشتى تالاپتارعا ساي بايلاپ بەرگەنىن دالەلدەپ باقتى. مەنىڭ ويىمشا, ولار ءوز جۇمىسىن نەمقۇرايلى ورىندادى. بالانىڭ قولىنان ايىرىلىپ قالا جازداعانىن تۇسىنبەيدى», دەپ شاعىمداندى بالانىڭ اناسى.
ەندى جاس انا ايماقتىڭ دەنساۋلىق ساقتاۋ باسقارماسىنا ارىز جازىپ, مەدبيكەلەردى جاۋاپقا تارتۋدى سۇراپ وتىر. ونىڭ پىكىرىنشە, مۇنداي مەديتسينالىق قىزمەتكەرلەر بالالار ءۇشىن قاۋىپتى.
