قازاقستان • 05 تامىز، 2021

ەلوردادا تالعات بيگەلدينوۆتى ەسكە الۋ ءراسىمى ءوتتى

17 رەت كورسەتىلدى

ەكى مارتە كەڭەس وداعىنىڭ باتىرى تالعات بيگەلدينوۆتىڭ تۋعانىنا 99 جىل تولۋ قۇرمەتىنە نۇر-سۇلتان قالاسىندا داڭقتى ۇشقىشتىڭ ەسكەرتكىشىنە گۇل شوقتارىن قويۋ ءراسىمى ءوتتى، دەپ حابارلايدى Egemen.kz قر قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.

ەسكە الۋ راسىمىنە حالىق قاھارمانى ارميا گەنەرالى مۇحتار التىنباەۆ، اۋە قورعانىسى كۇشتەرىنىڭ باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆ، قازاقستان اسكەري-اۋە كۇشتەرىنىڭ ارداگەرلەرى مەن وفيتسەرلەرى قاتىستى.

«بۇگىن ءبىز تالعات جاقىپبەك ۇلىنىڭ ەرلىگىنە تاعزىم ەتىپ، قۇرمەت كورسەتۋ ءۇشىن جينالىپ وتىرمىز. لايىقتى ءىزباسارلاردى، تاۋەلسىز قازاقستاننىڭ اسكەري ۇشقىشتارىن، وتان قورعاۋشىلارىن دايارلايتىن اۋە قورعانىسى كۇشتەرىنىڭ اسكەري ينستيتۋتى باتىردىڭ ەسىمىن ماقتانىشپەن الىپ ءجۇر. ءبىزدىڭ جۇرەگىمىزدە داڭقتى باتىر تۋرالى جارقىن ەستەلىكتەر ماڭگى ساقتالادى. باتىردىڭ «وقىڭىز. ۇيرەنىڭىز. جان-ءتانى ساۋ مىقتى ازامات بولىڭىز. ءوزىڭىزدى قيىندىققا توزە بىلۋگە ۇيرەتىڭىز. كەز كەلگەن جاعدايدا، كەز كەلگەن قيىندىقتا رۋحى مىقتى ادام عانا جەڭىمپاز بولادى. اعا بۋىننىڭ جاۋىنگەرلىك داستۇرلەرىن، ەڭبەكقورلىعىن ۇستاناتىن ادال مۇراگەرى بولىڭىز» دەگەن وسيەتىن ارقاشان ۇستانامىز»، دەدى اۆياتسيا گەنەرال-لەيتەنانتى نۇرلان ورمانبەتوۆ.

بيگەلدينوۆ

تالعات بيگەلدينوۆ بالاشوۆسكي اۆياتسيالىق ۋچيليششەسىنىڭ كۋرسانتىنان باستاپ ءبىرىنشى ۋكراينا مايدانى قۇرامىنداعى 144-ءشى گۆارديالىق اۆياتسيالىق پولكتىڭ ەسكادريليا كومانديرىنە دەيىنگى ەڭبەك جولىنان ءجۇرىپ ءوتتى.

سوعىس كەزىندە ول يل-2 شابۋىلداۋشى ۇشاعىندا 305 رەت ۇشىپ، باتىرلىق، ۇشۋدا شەبەرلىك تانىتىپ، ەڭ جاۋاپتى تاپسىرمالاردى ءساتتى ورىندادى.

تالعات بيگەلدينوۆ ەرلىگى ءۇشىن لەنين، قىزىل تۋ، الەكساندر نەۆسكي، قىزىل جۇلدىز، III دارەجەلى داڭق، I جانە II دارەجەلى وتان سوعىسى وردەندەرىمەن ناگرادتالدى، ەكى رەت كەڭەس وداعىنىڭ باتىرى اتاعىنا يە بولدى.

سوعىستان كەيىنگى جىلدارى تالعات بيگەلدينوۆ اسكەري جانە ازاماتتىق اۆياتسيادا قىزمەت ەتىپ، قوعامدىق جۇمىسپەن اينالىستى.

تالعات جاقىپبەك ۇلى بيگەلدينوۆ 2014 جىلعى 10 قاراشادا قايتىس بولدى.

سوڭعى جاڭالىقتار

ۇقساس جاڭالىقتار