قازاقستاندىقتار ءۇشىن گرانتتاردى سلوۆاكيا, ءازىربايجان جانە ۆەتنام ەلدەرى بولەدى. وسىلايشا, ەگەر 2019 جىلى ءبىلىم بەرۋ سالاسىندا ۋاعدالاستىقتارى بار مەملەكەتتەر تىزىمىندە جەتى ەل بولسا, 2021 جىلى ولاردىڭ سانى 10-عا دەيىن ءوستى. ولاردىڭ اراسىندا ۆەنگريا, پولشا, قحر, ۋكراينا, بەلارۋس, قىرعىزستان جانە تاجىكستان بار.
وتكەن ەكى جىلدا مىڭعا جۋىق قازاقستاندىق وسى ەلدەردىڭ جەتەكشى جوعارى وقۋ ورىندارىندا تەگىن ءبىلىم الدى. بيىل قازاقستاندىقتارعا 500-گە جۋىق گرانت ءبولىندى. ۇكىمەتارالىق گرانتتار اياسىندا قازاقستاندىقتار باكالاۆريات, ماگيستراتۋرا, دوكتورانتۋرا جانە رەزيدەنتۋرا باعدارلامالارى بويىنشا وقىتۋدان وتە الادى.
«جوعارى ءبىلىم بەرۋ سالاسىنداعى حالىقارالىق ىنتىماقتاستىق كادرلىق الەۋەتكە جەمىستى اسەر ەتۋدە. وتاندىق جوعارى وقۋ ورىندارىندا ءبىلىم بەرۋ پروتسەسىنىڭ ساپاسىن كۇشەيتۋمەن قاتار, ازاماتتارىمىزدىڭ الەمنىڭ جەتەكشى جوعارى وقۋ ورىندارىندا ءبىلىم الۋ مۇمكىندىگىنە يە بولۋى ءۇشىن جاعداي جاساۋ قاجەت. ءبىز «بولاشاق» ستيپەنديالىق باعدارلاماسى بويىنشا عانا ەمەس, ۇكىمەتارالىق كەلىسىمدەر شەڭبەرىندە دە قازاقستاندىقتاردى تەگىن وقىتۋ ءۇشىن ەلدەردىڭ گەوگرافياسىن كەڭەيتۋدەمىز. وتانىنا ورالعاننان كەيىن ماماندار العان بىلىمدەرىن وزدەرى جۇمىس ىستەيتىن سالانى دامىتۋ ءۇشىن قولدانادى دەپ ۇمىتتەنەمىز», دەدى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
ايتا كەتسەك, 2019 جىلمەن سالىستىرعاندا كونكۋرستىق ىرىكتەۋگە قاتىسۋعا نيەت بىلدىرۋشىلەر سانى 15%-عا ءوستى. ۇمىتكەرلەردى ىرىكتەۋدى دەپۋتاتتاردان, ساراپشىلاردان, ينجەنەرلىك-تەحنيكالىق, مەديتسينالىق, گۋمانيتارلىق جانە جاراتىلىستانۋ عىلىمدارىنىڭ عالىم-دوكتورلارىنان تۇراتىن تاۋەلسىز كوميسسيا جۇرگىزەدى. ۇكىمەتارالىق كەلىسىمدەردىڭ وپەراتورى قر بعم حالىقارالىق باعدارلامالار ورتالىعى بولىپ تابىلادى.
