الەم • 05 تامىز، 2021

بەيرۋتتەگى ازا تۇتۋ كۇنى قاقتىعىسقا ۇلاستى

19 رەت كورسەتىلدى

ليۆاننىڭ بەيرۋت قالاسىنداعى جارىلىس سالدارىنان قازا تاپقاندارعا ارنالعان ازا تۇتۋ كۇنىنىڭ سوڭى قاقتىعىستار مەن تارتىپسىزدىككە ۇلاستى، دەپ حابارلايدى Egemen.kz BBC-گە سىلتەمە جاساپ.

باسىلىمنىڭ مالىمەتىنشە، الدىمەن دەمونستراتسيا بەيبىت سيپاتتا بولدى. ادامدار قالا كوشەلەرىمەن قولىندا قايتىس بولعان تۋىستارىنىڭ سۋرەتتەرىمەن شەرۋگە شىقتى. كەشكە قاراي پارلامەنت پەن ەكونوميكا مينيسترلىگى عيماراتىنىڭ جانىندا دەمونسترانتتاردىڭ پوليتسيامەن قاقتىعىستارى باستالدى. ادامدار تەرگەۋ ناتيجەلەرىنە نارازىلىقتارىن ءبىلدىردى.

ولار ءتارتىپ ساقشىلارىنا تاستار مەن بوتەلكەلەردى لاقتىرا باستادى. جاۋاپ رەتىندە پوليتسەيلەر كوزدەن جاس اعىزاتىن گاز بەن سۋ قۇبىرلارىن قولدانۋعا ءماجبۇر بولدى.

ازا تۇتۋ راسىمىنە قاتىسۋشىلار ۇكىمەتكە قارسى ۇران ايتىپ، ساياسي كوشباسشىلاردىڭ وتستاۆكاعا كەتۋىن تالاپ ەتتى.

اتىس كەزىندە 20-عا جۋىق ادام زارداپ شەكتى.

ەسكە سالساق، 2020 جىلدىڭ 4 تامىزىندا بەيرۋت پورتىندا جارىلىس بولدى. جارىلىس سالدارىنان قالاداعى عيماراتتاردىڭ جارتىسى بۇزىلدى. جارىلىس 158 ادامنىڭ ءومىرىن قيىپ، 6 مىڭنان استام ادام جاراقات الدى دەپ حابارلانعان. شامامەن 300 مىڭ ادام باسپاناسىز قالدى.

جەرگىلىكتى بيلىكتىڭ مالىمەتىنشە، جارىلىستىڭ سەبەبى 2014 جىلى كەدەن قىزمەتتەرى تاركىلەگەن قويمادا ساقتالعان 2750 توننا اممياك سەليتراسىنىڭ جارىلۋى بولدى.

وسىدان كەيىن قالادا ۇكىمەتكە قارسى جاپپاي نارازىلىقتار باستالدى. 10 تامىزدا ليۆان مينيسترلەر كابينەتىنىڭ ەكى مۇشەسى اقپارات ءمينيسترى مانال ابدەل ساماد جانە قورشاعان ورتا جانە اكىمشىلىك دامۋ ءمينيسترى داميانوس كاتتار بىردەن وتستاۆكاعا كەتتى.

سوڭعى جاڭالىقتار

ۇقساس جاڭالىقتار