كورنەكى سۋرەت: livejournal.com
اقتوبە وبلىسىنىڭ اكىمى وڭداسىن ورازالين تاريح عىلىمدارىنىڭ دوكتورى, شىعىس ەلدەرى ساۋلەتى حالىقارالىق اكادەمياسىنىڭ كوررەسپوندەنت-مۇشەسى سەرىك اجىعالي, تاريح عىلىمدارىنىڭ كانديداتى, ءا.ح.مارعۇلان اتىنداعى ارحەولوگيا ينستيتۋتىنىڭ باس ديرەكتورى مىندەتىن اتقارۋشى تالعات مامىروۆپەن كەزدەستى.
عالىمدار وبلىس اكىمىنە مۇعالجار اۋدانى اۋماعىنداعى جاعابۇلاق قورىمىنان ءبىر اي شاماسىندا تابىلعان بىرەگەي ولجا – تاستان جاسالعان قۇربان شالىناتىن ورىن مەن التىنمەن قاپتالعان كورنەكتى سەمسەردى كورسەتتى.
ايتا كەتەيىك, قورىمنىڭ ءوزى بۇرىنعى تەمىر داۋىرىنە ءتان. مۇندا سونداي-اق قولا اينالار, التىن توعا جانە ت.ب. ەجەلگى زاتتار تابىلدى. ارحەولوگيالىق ەسكەرتكىشتى زەرتتەۋ جۇمىستارى ءالى دە جالعاسۋدا.
سونىمەن بىرگە, قارعالى اۋدانىندا قولا ءداۋىرىنىڭ قونىس مەكەنى تابىلدى. سول اۋماقتان مەتال پەش تابىلعان. بۇل قازىرگى اقتوبە وبلىسىنىڭ اۋماعىن قولا داۋىرىندە مەكەندەگەن تايپالاردىڭ مەتال وندىرىسىمەن اينالىسقانىن دالەلدەيدى.
جۋىردا وڭىردە ەدىگە باتىر مەن يساتاي تايمان ۇلىنىڭ جەرلەنگەن ورنىن ىزدەۋ جۇمىستارى باستالدى. قۇرامىنا ارحيتەكتور, ەتنوگراف, ارحەولوگتار مەن ارابيستەر كىرگەن ەتنوگرافيالىق ەكسپەديتسيانى اتاقتى عالىم, پروفەسسور سەرىك اجىعالي باسقاردى.
