ەرلان تۇرعىمباەۆتىڭ ايتۋىنشا, ۆەدومستۆو قىلمىستىڭ كوپتەگەن تۇرلەرىن اشۋ كورسەتكىشتەرىن جاقسارتقان. كىسى ءولتىرۋ, توناۋ, بۇزاقىلىق, ۇرلىق, سونداي-اق كامەلەتتىك جاسقا تولماعاندار جاساعان قۇقىق بۇزۋشىلىقتار سانى ازايعان. قوعامدىق ورىندار مەن كوشەدەگى قاۋىپسىزدىك دەڭگەيى جوعارىلاعان. الايدا, ينتەرنەت جەلىسىن پايدالانۋ ارقىلى جاسالاتىن الاياقتىق قىلمىستار سانى ارتقان. بۇعان پاندەميا كەزىندەگى ونلاين-قىزمەتتەردىڭ ءوسۋى ىقپال ەتتى.
مەملەكەت باسشىسىنا ۆاكتسينا العاندىعى جونىندە جالعان قۇجاتتار تاراتۋدىڭ جولىن كەسۋ بويىنشا قابىلدانىپ جاتقان شارالار تۋرالى ايتىلدى. جىل باسىنان بەرى پوليتسيا ورگاندارى 50-ءى جالعان ۆاكتسيناتسيا پاسپورتتارىن جانە 60-ى جالعان پتر-انىقتامالارىن جاساعانى ءۇشىن 110 قىلمىستىق ءىس قوزعاعان.
مينيستر ءىىم بولىمشەلەرىندەگى جەكە قۇرام قىزمەتكەرلەرىنىڭ 96 پايىزى ەكپە العانىن جەتكىزدى.
كەزدەسۋ قورىتىندىسى بويىنشا قاسىم-جومارت توقاەۆ مينيسترلىككە باسقا مەملەكەتتىك ورگاندارمەن بىرلەسىپ, كارانتيندىك شارالاردى قامتاماسىز ەتۋگە ەرەكشە كوڭىل ءبولۋدى, سونداي-اق كامەلەتكە تولماعاندارعا قارسى قىلمىستاردىڭ, تۇرمىس سالاسىنداعى قۇقىق بۇزۋشىلىقتاردىڭ الدىن الۋ جانە جول قاۋىپسىزدىگىن قامتاماسىز ەتۋ جونىندەگى جۇمىستى جانداندىرۋدى تاپسىردى.
