فوتو: Polisia.kz
پاۆلودار قالاسى ەمحانالارىنىڭ بىرىندە ءتورت مەديتسينا قىزمەتكەرى ەلەكتروندىق بازاعا جالعان مالىمەتتەر ەنگىزۋ ارقىلى ۆاكتسينا پاسپورتىن قولدان جاساعانى انىقتالدى. ءىس-شارا بارىسىندا 200-دەن استام جالعان پاسپورت تاركىلەندى.
اتالعان فاكتى بويىنشا قر قك 385-بابىنىڭ 2-ءبولىمى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قاتىسۋشىلاردىڭ ۇيالى تەلەفونى الىندى, سونداي-اق جۇمىس ورنىندا ءتىنتۋ جۇرگىزىلدى. ناتيجەسىندە تەحنيكالار مەن قۇجاتتامالار تاركىلەنىپ, ءتيىستى ساراپتاما تاعايىندالدى.
«قازىرگى ۋاقىتتا پاۆلودار وبلىسىنىڭ پوليتسيا دەپارتامەنتى COVID-19 ۆاكتسيناتسياسىنىڭ جالعان پاسپورتىن ساتىپ العان جانە ودان ءارى پايدالانعان ادامداردى انىقتاپ جاتىر. ولارعا قاتىستى ءتيىستى تەرگەۋ امالدارى جۇرگىزىلىپ, قر قىلمىستىق كودەكسى 385-بابىنىڭ 3-ءبولىمى بويىنشا جالعان قۇجاتتى پايدالانعانى ءۇشىن قىلمىستىق جاۋاپكەرشىلىككە تارتۋ قاراستىرىلادى», دەپ حابارلادى وبلىستىق پوليتسيا دەپارتامەنتىنىڭ باستىعى نۇرلان ءماسىموۆ.
