ۇكىمەت • 03 تامىز، 2021

پيلوتتىق جوبا اۋىل تۇرعىندارىنىڭ تابىسىن ارتتىرادى

24 رەت كورسەتىلدى

قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ، ۇكىمەت وتىرىسىندا، جامبىل وبلىسىنداعى اۋىل تۇرعىندارىنىڭ تابىسىن ارتتىرۋ بويىنشا پيلوتتىق جوبانىڭ اۋقىمىن كەڭەيتۋ جايىن باياندادى، دەپ جازادى Egemen.kz.

ەڭبەكمينىنىڭ باسشىسى، سوڭعى 10 جىلدا حالىقتىڭ جان باسىنا شاققانداعى ورتاشا نومينالدى تابىسى 39 مىڭ تەڭگەدەن 115 مىڭ تەڭگەگە دەيىن، ياعني 3 ەسە وسكەنىن اتاپ ءوتتى. دەگەنمەن، 2020 جىلدىڭ قورىتىندىسىندا، اۋىلدارداعى ءۇي شارۋاشىلىقتىرىنىڭ تابىسى 52،4 مىڭ تەڭگەنى قۇرادى. بۇل ورتاشا رەسۋپۋبليكالىق كورسەتكىشتەن 15 پايىزعا (61،4 مىڭ تەڭگە)، قالالارداعى تابىس دەڭگەيىنەن 23 پايىزعا كەم (67،6 مىڭ تەڭگە).

«اۋىلدىق جەرلەردە كۇنكورىس دەڭگەيىنەن از تابىس الاتىنداردىڭ ۇلەسى قالالارمەن سالىستىرعاندا 2 ەسە كوپ. بىرىنشىدەن، بۇل، اۋىلداردا جۇمىس ورنىنىڭ تاپشىلىعىنا بايلانىستى بولىپ وتىر. 1،2 ملن ادام نەمەسە اۋىلدا جۇمىس ىستەيتىندەردىڭ 30%-دان استامى ءوزىن جۇمىسپەن قامتىعان حالىق ساناتىنا جاتادى (قالالاردا ءوزىن جۇمىسپەن قامتىعانداردىڭ ۇلەسى 16%). ەكىنشىدەن، وتكىزۋ نارىعى كولەمىنىڭ سالىستىرمالى تۇردە تومەن بولۋىنا بايلانىستى اۋىلدا قالامەن سالىستىرعاندا كاسىپكەرلىكپەن اينالىسۋ ءۇشىن مۇمكىندىك شەكتەۋلى»، دەدى سەرىك شاپكەنوۆ.

ءمينيستردىڭ ايتۋىنشا، جامبىل وبلىسىندا اۋىل حالقىنىڭ تابىسىن ارتتىرۋ جونىندەگى پيلوتتىق جوبا اياسىندا، وندىرۋشىلەر مەن ساتىپ الۋشىلاردى بايلانىستىرۋ جانە اۋىل تۇرعىندارىنان ءونىمدى كەپىلدى ساتىپ الۋ قامتاماسىز ەتىلدى.

«بۇل ءۇشىن «ەڭبەك» مەملەكەتتىك باعدارلاماسىنا پيلوتتىق جوباعا ەرەكشە شارتتاردى كوزدەيتىن وزگەرىستەر ەنگىزىلدى. اتاپ ايتاتىن بولساق: ميكروكرەديتتەر بويىنشا سىياقى مولشەرلەمەسى 2،5 پايىزدى قۇرادى; العاش رەت باعدارلاما بويىنشا ميكروكرەديتتەر سەنىم بىلدىرىلگەن اگەنت ارقىلى بەرىلدى; قايتارىلعان قاراجات ەسەبىنەن قوسىمشا ميكروكرەديتتەر بەرۋ تەتىگى قاراستىرىلدى. پيلوتتىق جوبا 10 اۋداننىڭ 11 اۋىلدىق وكرۋگىندە ىسكە اسىرىلدى. ناتيجەسىندە 2،5 مىڭ وتباسى نەمەسە 14 مىڭ ادام تۇراقتى تابىسپەن قامتاماسىز ەتىلدى; كاسىپكەرلەر سانى 966-دان 3248-گە دەيىن ءوستى، ياعني ءاربىر ءۇشىنشى ءۇي شارۋاشىلىعى كاسىپكەرلىكپەن اينالىسادى; جۇمىسسىزدار مەن اتاۋلى الەۋمەتتىك كومەك الۋشىلار سانى تيىسىنشە 2 جانە 3 ەسە قىسقاردى»، دەپ جەتكىزدى سەرىك شاپكەنوۆ.

ەڭبەكمينىنىڭ باسشىسى، كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسىن ازىرلەۋدە پيلوتتىق جوبانىڭ مۇمكىندىكتەرى ەسكەرىلگەنىن ايتتى. اۋىلدىق جەرلەردە كاسىپكەرلىكتى دامىتۋ ماقساتىندا ءۇي شارۋاشىلىعىن ساۋالناما جۇرگىزۋ ارقىلى زەرتتەۋ، الىنعان مالىمەتتەر نەگىزىندە تاۋارلار مەن قىزمەتتەرگە ناقتى سۇرانىس پەن ۇسىنىستى انىقتاۋ، اۋدانداردىڭ شەبەرلىك جوسپارىن ازىرلەۋ بويىنشا شارالار ىسكە اسىرىلاتىن بولادى.

سونىمەن بىرگە كەشەندى مەملەكەتتىك قولداۋ شارالارى ۇسىنىلادى: 

ءوندىرىستىڭ ناقتى كەيستارى، تەحنولوگيالىق كارتالار بويىنشا مودۋلدىك وقىتۋ;

- بيزنەس-جوcپار ازىرلەۋگە كومەكتەسۋ;  

- ميكروكرەديتتەر جانە گرانتتار بەرۋ;  

- ونىمدەر مەن قىزمەتتەردى ساتۋدى ۇيىمداستىرۋ (بۇل ءۇشىن ءىرى ساۋدا جەلىلەرىمەن، بازارلارمەن، دۇكەندەرمەن بايلانىس ورناتۋعا كومەك كورسەتىلەدى).

«كەلەسى جىلى كرەديتتەۋ جانە گرانتتىق قولداۋعا بيزنەس-جوبالاردى ىرىكتەۋ شەبەرلىك جوسپارىن ەسكەرە وتىرىپ جۇرگىزىلەدى. وتىنىمدەردى بەرۋ جانە قاراۋ ۇدەرىسىن بارىنشا اۆتوماتتاندىرۋ ءۇشىن ەڭبەك بيرجاسى بازاسىندا كاسىپكەرلىك باستامالاردى قولداۋدىڭ «بىرىڭعاي تەرەزەسى» ىسكە قوسىلادى»، دەدى مينيستر.

سەرىك شاپكەنوۆ بايانداماسىنىڭ سوڭىندا، جامبىل وبلىسىندا ىسكە اسىرىلعان جوبا ناتيجەسىن ەسكەرە وتىرىپ، اۋىل تۇرعىندارىنىڭ تابىسىن ارتتىرۋدا قول جەتكىزىلگەن مۇمكىندىكتەردى ىسكە اسىرۋدى ۇلتتىق جوبالار شەڭبەرىندە جالعاستىرۋدى ۇسىندى.

«جوبانى رەسپۋبليكا بويىنشا ىسكە اسىرۋ تابىسى كۇنكورىس دەڭگەيىنەن تومەن اۋىل تۇرعىندارىنىڭ ۇلەسىن 12 پايىزعا، جۇمىسپەن ناتيجەسىز قامتىلعاندار ۇلەسىن 9،7 پايىزعا دەيىن تومەندەتۋگە جانە ناقتى اقشالاي كىرىستەردىڭ 27،1%-عا، جەكە كاسىپكەرلەر سانىنىڭ 195 مىڭ ادامعا وسۋىنە ىقپال ەتەدى»، دەپ تۇجىرىمدادى ول.

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار