توتەنشە جاعدايلار دەپارتامەنتىنىڭ مالىمەتىنشە, شىعىس قازاقستان وبلىسى سەيسميكالىق ايماققا جاتادى.
مۇندا جىل سايىن 2-دەن 6 بالعا دەيىن جەر سىلكىنىسى بولىپ تۇرادى. سوڭعى 10 جىلدا ءوڭىر اۋماعىندا 20-دان استام جەر سىلكىنىسى تىركەلگەن. قۇربان بولعاندار مەن قيراعان عيماراتتار جوق. وبلىستاعى 17 اۋداندا (وسكەمەن, ريددەر, سەمەي قالالارى, التاي, اياگوز, اباي, بورودۋليحا, گلۋبوكوە, زايسان, كاتونقاراعاي, كوكپەكتى, كۇرشىم, تارباعاتاي, ۇلان, ءۇرجار, شەمونايحا, جارما اۋداندارى) 127 سەيسميكالىق قاۋىپتى ەلدى مەكەن ورنالاسقان. قاۋىپسىزدىك ماقساتىندا جىل سايىن توتەنشە جاعدايلار جونىندەگى كوميسسيا وتىرىستارىندا سەيسميكا سالاسىنداعى ماسەلەلەر كوتەرىلەدى. «دەپارتامەنت ماماندارىنىڭ كومەگىمەن سەيسمولوگيا ينستيتۋتى 2020-2023 جىلدارعا ارنالعان «قازاقستاننىڭ وبلىستارى مەن قالالارى اۋماقتارىنىڭ سەيسميكالىق قاۋىپتىلىگىن قازىرگى زامانعى عىلىمي-ادىستەمەلىك نەگىزدە باعالاۋ» اتتى باعدارلاما قۇرعان بولاتىن.
وسى باعدارلاما شەڭبەرىندە ەل وڭىرلەرى ءۇشىن, ونىڭ ىشىندە شىعىس قازاقستان وبلىسىندا سەيسميكالىق اۋداندار كارتاسىن ازىرلەۋ كوزدەلگەن. وسىعان بايلانىستى ماماندارىمىز «سەيسمولوگيا ينستيتۋتى» جشس وكىلدەرىمەن كەزدەسۋ وتكىزدى.
كەزدەسۋ بارىسىندا شىعىس قازاقستان وبلىسىندا كەڭ جولاقتى سەيسموداتچيكتەردى باقىلايتىن 5 ستانتسيا ورنى انىقتالدى. سەيسموداتچيك – بۇل جەر قوزعالىسىن ولشەنەتىن ەلەكتروندى سيگنالعا اينالدىرىپ, سول ارقىلى تەربەلىستەردى ولشەۋ ءۇشىن قولدانىلاتىن قۇرىلعى», دەدى شقو تجد باستىعىنىڭ ورىنباسارى دميتري تيتوۆ.
