تاعايىنداۋ • 02 تامىز، 2021

جامبىل وبلىسىنىڭ اكىمى باسقارماعا جاڭا باسشى تاعايىندادى

100 رەت كورسەتىلدى

جامبىل وبلىسى اكىمىنىڭ وكىمىمەن قايرات اسكەربەك ۇلى دوساەۆ جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى بولىپ تاعايىندالدى، دەپ حابارلايدى Egemen.kz اكىمدىكتىڭ رەسمي سايتىنا سىلتەمە جاساپ.

ول 1965 جىلى دۇنيەگە كەلگەن. ءبىلىمى - جوعارى. قازاقتىڭ ەڭبەك قىزىل تۋ وردەنى اۋىل شارۋاشىلىق ينستيتۋتىن «ينجەنەر-مەحانيك»، اباي اتىنداعى قازاق ۇلتتىق پەداگوگيكالىق ۋنيۆەرسيتەتىن «ەكونوميست» ماماندىقتارى بويىنشا بىتىرگەن.

قايرات دوساەۆ ەڭبەك جولىن 1987 جىلى عىلىمي-وندىرىستىك بىرلەستىكتىڭ ينجەنەرى بولىپ باستاعان.

ءار جىلدارى «التىن ديىرمەن» اق ينجەنەرى، الماتى قالالىق توتەنشە جاعدايلار باسقارماسىنىڭ توتەنشە جاعدايلار ءبولىمى باسشىسىنىڭ ورىنباسارى، سەكتور مەڭگەرشىسى، قر توتەنشە جاعدايلار اگەنتتىگى توراعاسىنىڭ كومەكشىسى، الماتى وبلىسى اكىمىنىڭ كومەكشىسى، تالدىقورعان قالاسى اكىمىنىڭ ورىنباسارى، الماتى وبلىسى قاراتال اۋدانى اكىمىنىڭ ورىنباسارى، الماتى وبلىسىنىڭ تابيعي مونوپوليالاردى رەتتەۋ جانە باسەلەستىكتى قورعاۋ باسقارماسىنىڭ باسشىسى، الماتى وبلىسىنىڭ تاريفتەر جونىندەگى باسقارماسىنىڭ باسشىسى، قر توتەنشە جاعدايلار ءمينيسترىنىڭ كومەكشىسى، «مەكەن» جشس ديرەكتورى، «2011 جىلعى 7-ءشى قىسقى ازيا ويىندارىن ۇيىمداستىرۋ كوميتەتىنىڭ اتقارۋشى ديرەكتسياسى» اكتسيونەرلىك قوعامىنىڭ الماتى فيليالىنىڭ ديرەكتورى، ۆيتسە – پرەزيدەنتى، دەپارتامەنت ديرەكتورى، «كازسپورتينۆەست» اق ۆيتسە-پرەزيدەنتى لاۋازىمدارىندا ەڭبەك ەتتى.

سونداي-اق، 2014-2017 جىلدارى جامبىل وبلىسى قورداي اۋدانىنىڭ اكىمى، 2017-2019 جىلدارى شۋ اۋدانىنىڭ اكىمى، 2019 جىلى تاراز قالاسىنىڭ اكىمى قىزمەتتەرىن اتقارعان.

2019 جىلدىڭ جەلتوقسانىنان باستاپ جامبىل وبلىسى اكىمدىگىنىڭ ەڭبەك ينسپەكتسياسى باسقارماسىنىڭ باسشىسى – باس مەملەكەتتىك ەڭبەك ينسپەكتورى رەتىندە جۇمىس جاساپ كەلدى.

سوڭعى جاڭالىقتار

ۇقساس جاڭالىقتار