2021 جىلدىڭ قاڭتار-مامىر ارالىعىندا قازاقستاننىڭ ورتالىق ازيا ەلدەرىمەن تاۋار اينالىمى 2,3 ملرد دوللاردى قۇراپ, بىلتىرمەن سالىستىرعاندا بىردەن 34,7%-عا وسكەن, دەپ حابارلايدى finprom.kz رەسۋرسى. ال وسى ەلدەردىڭ سىرتقى ساۋداداعى ۇلەسى 4,7%-دان 6,3%-عا ارتقان.
قازاقتاردىڭ اسىرەسە, وزبەكتەرمەن ساۋداسى قىزىپ تۇر. دەرەكتەردى سويلەتسەك, قازاقستان مەن وزبەكستان اراسىنداعى تاۋار اينالىمى 2019 جىلعى قاڭتار-شىلدە ايلارىندا 11,1% ۇلعايعان جانە 1,6 ملرد دوللاردى قۇراپتى. ال بيىلعى العاشقى جارتىجىلدىقتا ەكى ەلدىڭ تاۋار اينالىمى بىلتىرعى وسى كەزەڭمەن سالىستىرعاندا 46%-عا ءوسىپ, 1,5 ملرد دوللارعا جەتكەن. وزبەكستاننىڭ ەلىمىزدەگى جالپى تاۋار اينالىمىنداعى ۇلەسى بۇگىندە 4,1% پايىزدى قۇرايدى.
ودان كەيىن قازاقستاننىڭ تاۋار اينالىمىنا تاجىكستان ۇلەس قوسىپ وتىر: 426,1 ملن دوللار, ءبىر جىلدا 22,9%-عا ارتقان, سودان كەيىنگى كەزەكتە – قىرعىزستان (328,7 ملن دوللار, ءبىر جىلدا +8,2%).
ال ەلىمىزدىڭ تۇرىكمەنستانمەن تاۋار اينالىمى 74,6 ملن دوللاردى قۇراعان, بۇل دا ءبىر جىل بۇرىنعى كورسەتكىشتەن 49%-عا ارتىق. ەلىمىزدىڭ تۇرعىندارى تۇرىكمەندەردىڭ ماتالارىن, كورپە-جاستىعىن كوبىرەك تاسىمالداي باستاعان. بۇل سول ەلدەگى باعانىڭ ارزاندىعىنان بولسا كەرەك.
ەندى قازاقستاننىڭ ورتالىق ازيا مەملەكەتتەرىنە ەكسپورتىن سارالاساق, بۇل كورسەتكىش 2021 جىلدىڭ قاڭتار-مامىر ايىندا 1,7 ملرد دوللاردان اسقان. مۇنى دا بىلتىرعىعا قاراعاندا, جوعارى كورسەتكىش دەپ باعالاۋعا بولادى. بۇل سالادا دا باسقالاردان قاراعاندا قازاق پەن وزبەكتىڭ الىس-بەرىسى كوبىرەك ەكەنى بايقالدى. سىرتقا جىبەرىلگەن تاۋاردىڭ 65,9%-ى وزبەكستانعا جونەلتىلگەن. اقشامەن ەسەپتەسەك, وسى ەلگە ەكسپورت كولەمى 1,1 ملرد دوللاردى قۇراعان. بۇل دا وتكەن جىلمەن سالىستىرعاندا 58,4%-عا ارتىق.
تاجىكستانعا جالپى سوماسى 297,1 ملن دوللاردىڭ تاۋارىن جىبەرىپپىز. ال قىرعىزستانعا – 227,2 ملن دوللار, تۇرىكمەنستانعا 48,6 ملن دوللار كولەمىندەگى تاۋار تاسىمالدانعان.
جالپى العاندا, قازاقستاننان ورتالىق ازيا مەملەكەتتەرىنە جونەلتكەن تاۋارلارى سىرتقى نارىققا شىعاتىن جالپى ەكسپورتتىڭ 7,7%-ىن قۇرايدى ەكەن. ال ورتالىق ازيا مەملەكەتتەرىنەن ەلىمىزگە كەلەتىن تاۋار كولەمى جالپى يمپورتتىڭ 4,2%-نا جەتكەن. ايتالىق, جىل باسىنان بەرى ورتالىق ازيادان قازاقستانعا 624,2 ملن دوللاردى قۇرايتىن تاۋار اكەلىنىپتى. بۇل – بىلتىرعىدان 33%-عا كوپ. سونىڭ ىشىندە وزبەكستاننان كەلەتىن يمپورت 367,7 ملن دوللاردى قۇراسا, تاجىكستاندىكى بىردەن 2,4 ەسە ۇلعايىپ, 129 ملن دوللارعا جەتكەن.
بيىلعى العاشقى بەس ايداعى قازاقستاننىڭ ەكسپورت كولەمى ورتالىق ازيا مەملەكەتتەرىنە جىبەرىلەتىن يمپورتتان 2,7 ەسە اسىپ تۇسكەن.
