پارتيانىڭ ءباسپاسوز قىزمەتىنىڭ مالىمەتىنشە, وڭىرلەردە 4,6 ملن شارشى مەتر تۇرعىن ءۇي نەمەسە 37,6 مىڭ پاتەر سالىندى, سونداي-اق 8,4 مىڭ ورىندىق 25 مەكتەپ جانە 4 مىڭ ورىندىق 66 بالاباقشا, 800 كەلۋشىگە ارنالعان 9 مەديتسينالىق نىسان اشىلدى. 630 ملرد تەڭگە ينۆەستيتسيا تارتۋ ارقىلى 48 كاسىپورىن ىسكە قوسىلىپ, 107 مىڭنان استام ادام تۇراقتى جۇمىس ورىندارىنا ورنالاستىرىلدى.
سايلاۋالدى ۋادەلەردى ىسكە اسىرۋ اياسىندا اقتوبە وبلىسىندا 104 اۋىلدىق ەلدى مەكەن گازبەن قامتاماسىز ەتىلەدى. اتاپ ايتقاندا, مۇعالجار اۋدانىنىڭ جۇرىن اۋىلىندا قۇرىلىس جۇمىستارى باستالىپ كەتتى. جاقىندا بۇل ەلدى مەكەنگە تازا اۋىز سۋ جەتكىزىلدى, ەندى تۇرعىندار «كوگىلدىر وتىننىڭ» يگىلىگىن كورەتىن بولادى. ويتكەنى قاندىاعاش – جۇرىن – قاراكول باعىتى بويىنشا گاز قۇبىرىن سالۋعا وبلىستىق بيۋدجەتتەن 1 ملرد تەڭگەدەن استام قاراجات ءبولىندى.
شىمكەنت قالاسىندا 32 مەكتەپتىڭ قۇرىلىسى باستالدى. جاڭا وقۋ جىلىندا ءۇش اۋىسىمدا وقىتاتىن ورتا ءبىلىم بەرۋ ۇيىمدارىنىڭ سانى 14-تەن 9-عا دەيىن قىسقارۋعا ءتيىس.
قىزىلوردا وبلىسىندا جىل سوڭىنا دەيىن 5 اپاتتى كوپىردى جوندەۋ جوسپارلانعان. وڭىردە وبلىستىق ماڭىزى بار تاس جولداعى كوپىرلەردىڭ بىرىنە قايتا جوندەۋ جۇمىستارى جۇرگىزىلدى. 2018 جىلى كوكتەمگى سۋ تاسقىنى سالدارىنان جالاعاش اۋدانىندا وبلىستىق ماڭىزى بار «جالاعاش – جوسالى» اۆتوكولىك جولىن سۋ باسقان. جىل سايىن وبلىستىڭ جالاعاش, قارماقشى, قازالى, ارال اۋداندارىنىڭ 200 مىڭنان استام تۇرعىنى وبلىس ورتالىعىنا وسى تاس جول ارقىلى بارادى. بيىل بۇزىلعان ۋچاسكەلەردى قالپىنا كەلتىرۋگە 98,2 ملن تەڭگە ءبولىندى, 1 كيلومەتر تاس جول توسەلىپ, 4 سۋ وتكىزۋ قۇرىلعىسى ورناتىلدى.
الماتى وبلىسىندا پارتيالىق ۋادەگە ساي سارىباي بي, دولان جانە ەركىن اۋىلدارىندا ءۇش امبۋلاتوريا اشىلدى. ەركىن اۋىلىندا جالپى اۋماعى 1000 شارشى مەتردى قۇرايتىن جاڭا ەكى قاباتتى عيماراتتا ساپالى مەديتسينالىق كومەك كورسەتۋ ءۇشىن بارلىق جاعداي جاسالعان. جاڭا امبۋلاتوريادا ۋدز, ەكگ-دەن وتۋگە, سونداي-اق ءتىس دارىگەرىنىڭ قابىلداۋىنا كەلۋگە مۇمكىندىك بار. امبۋلاتوريا ەركىن جانە كوكتال اۋىلدارىنىڭ تۇرعىندارىن قوسا العاندا, بارلىعى 18 مىڭ ادامعا قىزمەت كورسەتەتىن بولادى.
دولان جانە سارىباي بي اۋىلدىق وكرۋگتەرىندەگى جاڭا امبۋلاتوريالاردا دارىگەرگە دەيىنگى جانە دارىگەرلىك قابىلداۋ, گينەكولوگ, ءتىس دارىگەرى, ەمشارا جانە فيزيوتەراپيالىق قابىلداۋ كابينەتتەرى, ەمشارا بولمەسى بار.
باتىس قازاقستان وبلىسىندا 2025 جىلعا دەيىن 8 مىڭعا جۋىق وتباسىنى تۇرعىن ۇيمەن قامتاماسىز ەتۋ جوسپارلانىپ وتىر. ورالدا 90 پاتەرلى تۇرعىن ءۇي پايدالانۋعا بەرىلدى. ودان بولەك, وبلىستىڭ ءاربىر اۋدانىندا جاڭا دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى باستالدى, ونىڭ ەكەۋى جالپاقتال جانە پودستەپنوە اۋىلدارىندا ماۋسىم ايىنىڭ باسىندا ەسىكتەرىن ايقارا اشتى. ولاردا كۇرەس, ۆولەيبول, فۋتبول, باسكەتبول سەكىلدى سپورت تۇرلەرىنە ارنالعان جاتتىعۋ زالدارى, 160 ورىندىق كورەرمەن زالى قاراستىرىلعان. نىساننىڭ اۋماعىندا شاعىن فۋتبول جانە جۇگىرۋ الاڭدارى سالىندى.
سونىمەن قاتار جىل باسىنان بەرى Nur Otan-نىڭ قوعامدىق قابىلداۋ بولمەلەرىندە دەپۋتاتتار, پارتيا مۇشەلەرى – مەملەكەتتىك ورگانداردىڭ باسشىلارى 14 مىڭنان استام قابىلداۋ وتكىزىپ, 74 مىڭنان استام قازاقستاندىقتى قابىلدادى. وتىنىشتەردىڭ 96 پايىزى بويىنشا وڭ شەشىمگە قول جەتكىزىلىپ, كونسۋلتاتيۆتىك, قۇقىقتىق جانە باسقا دا كومەك كورسەتىلدى. قالعان 4 پايىزى ورىندالۋ ۇستىندە.
وتكەن جىلدىڭ سوڭىندا ونلاين-رەجىمدە وتكەن قابىلداۋلاردىڭ بىرىندە پارتيا توراعاسىنىڭ ءبىرىنشى ورىنباسارى باۋىرجان بايبەك اقتوبە وبلىسىنىڭ 24 جاستاعى تۇرعىنى ايبەك قوسماعامبەتوۆتىڭ ءوتىنىشىن تىڭداعان بولاتىن. قوبدا اۋدانىنىڭ تالدىساي اۋىلىنىڭ تۇرعىنى سول كەزدە ەلدى مەكەندە جولدىڭ جوقتىعىن ايتىپ, شاعىمدانعان.
باۋىرجان بايبەك ءوز كەزەگىندە ايبەك قوسماعامبەتوۆكە دەپۋتاتتار تاياۋ ۋاقىتتا وتەتىن سەسسيادا ەلدى مەكەندەگى جولدى جوندەۋگە قاراجات ءبولۋ ماسەلەسىن قارايتىنىن ايتقان ەدى.
Nur Otan فراكتسياسىنىڭ دەپۋتاتتارى ءوتىنىشتى قاراعاننان كەيىن بيىل اۋىلداعى جالپى ۇزىندىعى 2,6 كم بولاتىن ەكى جولعا ورتاشا جوندەۋ جۇرگىزىلدى. ءا.مولداعۇلوۆا اتىنداعى كوشەنى جوندەۋگە وبلىستىق بيۋدجەتتەن 65,5 ملن تەڭگە, ال ابات بايتاق كوشەسىنە – 140,2 ملن تەڭگە بولىنگەن. بۇگىندە اسفالت توسەۋ جانە جۇرگىنشىلەر جولدارىن جايلاستىرۋ جۇمىستارى اتقارىلۋدا.
سونداي-اق Nur Otan-نىڭ ەلوردالىق فيليالىنا «قازاقاۋىل» شاعىن اۋدانىنىڭ تۇرعىنى گازداندىرۋ ماسەلەسىن شەشۋ تۋرالى ءوتىنىش ايتقان. ويتكەنى وسى اۋداننىڭ 150 ءۇيى گاز جەلىسىن تارتۋ جوباسىنا كىرمەي قالعان ەكەن. استانانى جانە ەل وڭىرلەرىن گازداندىرۋدىڭ اۋقىمدى جوباسىنا تۇڭعىش پرەزيدەنت – ەلباسى نۇرسۇلتان نازارباەۆتىڭ ءوزى باستاماشى بولعانىن ەسكەرە وتىرىپ, پارتيالىق باقىلاۋ كوميسسياسى ەلوردانىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى تولەگەن قۇلۇشەۆ پەن تۇرعىنداردىڭ كەزدەسۋىن ۇيىمداستىردى. ناتيجەسىندە «قازاقاۋىل» شاعىن اۋدانىن گازبەن قامتۋ جەلىسىن تارتۋ ءۇشىن جوبالىق-سمەتالىق قۇجاتتاما ازىرلەۋ جانە گازداندىرۋ جۇمىسىن بيىلعى ءتورتىنشى توقساندا باستاۋ ۇيعارىلدى.
باتىس قازاقستان وبلىسىندا نۇروتاندىقتار ورال قالاسىنان 140 شاقىرىم قاشىقتىقتا ورنالاسقان سىرىم اۋدانىنىڭ جىمپيتى اۋىلى تۇرعىندارىنىڭ كولىك ماسەلەسىن شەشۋگە كومەكتەستى. ولاردىڭ وتىنىشىنە وراي قازىر جىمپيتى – ورال باعىتىندا تۇراقتى اۆتوبۋس قاتىناي باستادى جانە مۇمكىندىگى شەكتەۋلى, تۇرمىسى تومەن وتباسىلاردىڭ بالالارى تەگىن تاسىمالداناتىن بولدى.
ماڭعىستاۋ وبلىسىنىڭ جاڭاوزەن قالاسىنداعى ۇيلەردىڭ ءبىرىنىڭ تۇرعىندارى جارتى عاسىردان بەرى تابيعي گاز تارتۋدى سۇراپ كەلگەن. عيمارات سوناۋ 1965 جىلى جاتاحقانا رەتىندە پايدالانۋعا بەرىلگەن, ال 90-جىلدارى تۇرعىندار پاتەرلەرىن جەكەشەلەندىرىپ العان. وسى ماسەلەنى شەشۋ ءۇشىن تۇرعىندار Nur Otan پارتياسىنىڭ جەرگىلىكتى فيليالىنا جۇگىندى. ناتيجەسىندە قالالىق بيۋدجەتتەن قاراجات ءبولىنىپ, بارلىق پاتەرگە گاز تارتىلدى.
Nur Otan پارتياسىنىڭ رەسپۋبليكالىق قوعامدىق قابىلداۋ بولمەسىنە كەلەسى بايلانىس ارنالارىنىڭ ءبىرى ارقىلى جۇگىنە الاسىز:
- Call-تسەنتر: 8 800 080 4441 (قازاقستان بويىنشا قوڭىراۋ شالۋ تەگىن);
- Whatsاpp: 8 700 800 4441
- E-mail: komek@nurotan.kz.
- وتباسى, ايەلدەر مەن بالالار ماسەلەلەرى, سونداي-اق وتباسىلىق-تۇرمىستىق زورلىق-زومبىلىققا قارسى ارەكەت بويىنشا «111 جەدەل قىزمەتى».
