– توكيو وليمپياداسى جوعارى دەڭگەيدە وتۋدە. ۇيىمداستىرۋشىلاردىڭ تىڭعىلىقتى دايىندالعانى كورىنىپ تۇر. الايدا پاندەمياعا بايلانىستى بۇرىن بولماعان شەكتەۋلەر وتە كوپ جانە دە كۇن سايىن پتر-تەست تاپسىرۋ دا ىڭعايسىزدىق تۋدىرادى, – دەگەن د.كارپوۆ پاندەميا وليمپياداعا دايىندالۋ ءۇشىن اجەپتەۋىر كەدەرگى كەلتىرگەنىن العا تارتتى. – 2020 جىلى تەك قازاقستاننىڭ ەمەس, بۇكىل الەم سپورتشىلارىنىڭ دايىندىق كەزەڭى بۇزىلدى. سونىڭ سالدارىنان توكيو وليمپياداسى ءبىر جىلعا شەگەرىلدى. كارانتينگە بايلانىستى سپورتشىلارىمىز ءۇي كارانتينىندە بولدى. جوسپارلانعان قۇراما جاتتىعۋلارى, جارىستار دەر كەزىندە وتپەگەندىكتەن, توكيو وليمپياداسىندا سپورتشىلارىمىزدىڭ قانداي جۇلدە الاتىنىن بولجاۋ مۇمكىن ەمەس ەدى.
ءوز كەزەگىندە ولگا رىپاكوۆا پاندەميا جاعدايىندا جارىستىڭ كورەرمەنسىز ءوتۋى, ءساتسىز ونەر كورسەتۋ مەن الداعى جوسپارىمەن ءبولىستى.
– بۇگىنگى جارىسقا باعا بەرۋ قيىن. ءتورتىنشى وليمپيادام ەكەنىن بىلەسىزدەر. ادەتتە, ستاديونداعى اتموسفەرادان, تريبۋناداعى قايناعان ەنەرگەتيكادان قۋات الاتىنمىن. بىراق مەنىڭ كورسەتكىشىمە كورەرمەندەردىڭ جوقتىعى اسەر ەتتى دەپ ايتۋعا بولمايدى. مەن بار كۇشىمدى كورسەتەمىن, بار مۇمكىندىگىمدى جۇزەگە اسىرامىن دەپ ماقسات قويدىم. ءوزىمدى جاقسى سەزىندىم. دايىندىق وڭاي بولعان جوق. جاسىڭنىڭ ۇلعايعانى دا اسەر ەتپەي قويمايدى ەكەن. جىل وتكەن سايىن ناتيجە دە تومەندەي بەرەدى. ال دايىندىق كەزىندە ەسكى جاراقاتتار سىر بەرەدى نەمەسە باسقا دا كەدەرگىلەر كەزدەسەدى. وتكەن جىلى سىنعا تۇسەمىز دەپ ويلادىم. بىراق ءوزىم وليمپيادانىڭ كەيىنگە شەگەرىلگەنىن قۇپ كوردىم, قوسىمشا ۋاقىتتا ەمدەلىپ, دايىندالۋدى كوزدەدىم, – دەگەن و.رىپاكوۆا قولداۋ كورسەتكەن جاندارعا العىسىن ايتتى. – ال موتيۆاتسيا تۋرالى ايتاتىن بولسا, ءوزىڭ اينالىساتىن سپورتتى جانىڭمەن ءسۇيۋ كەرەك. سول كەزدە جانكۇيەردى قۋانتۋ ءۇشىن جۇمىس ىستەيسىڭ. ولاردىڭ قۋانىشىن كورىپ, ودان ءارى شىڭدالا تۇسەسىڭ. باسقاشا بولۋى مۇمكىن ەمەس. ازىرگە, نە بولعانىن باعالاۋ قيىن. كەيىنىرەك باپكەرمەن سويلەسىپ, ءوز ونەرىمدى قايتا ساراپتاپ, بايقايتىن شىعارمىن. ايتەۋىر, ءبىر نارسە بوگەت بولدى. مۇمكىن, ەسكى جاراقاتتار شىعار. الايدا ايتارلىقتاي قيىندىق بولعان جوق. وسىلاي بولۋى كەرەك ەدى. ماعان قولداۋ كورسەتىپ, جانكۇيەر بولعان بارلىق جەرلەستەرىمە راحمەت. سىزدەردىڭ قولداۋلارىڭىزدى سەزىندىم. العىسىم زور, – دەدى و.رىپاكوۆا.
سونداي-اق ولگا الەۋمەتتىك جەلىدەگى تانىمالدىلىعى مەن 2024 جىلعى پاريج وليمپياداسىنا قاتىستى ويىن ءبولىستى.
– اشىلۋ سالتاناتىنان كەيىنگى تانىمالدىلىققا كەلەر بولسام, ءوزىمدى بارلىعىنان وقشاۋلاۋعا تىرىستىم. ويتكەنى جارىس الدىندا وزىمە ارتىق نازار اۋعانىن قالامادىم, الەۋمەتتىك جەلىگە دە ەشتەڭە جاريالاماي, ءوزىمنىڭ كىشكەنتاي الەمىمدە ءومىر سۇرۋگە ۇمتىلدىم. الاڭسىز جارىسقا دايىندالۋدى ءجون كوردىم. دەسە دە, اشىلۋ سالتاناتىندا ءوز جانكۇيەرلەرىمدى قۋانتىپ, تىلەۋلەس جانداردىڭ سانىن ودان ءارى ارتتىرعانىما قۋانىشتىمىن. وسى وبرازدى دايىنداۋ جولىندا كۇش سالعان ۇلتتىق وليمپيادالىق كوميتەت پەن ديزاينەرلەرگە كوپ راحمەت! ەڭبەكتىڭ ءبارى سول كىسىلەردىكى, مەن دايىن كيىمدى كيىپ, الەمگە كورسەتتىم. ءبارى وسىلاي ءساتتى بولعانىنا قۋانىشتىمىن. ال پاريج وليمپياداسىنا كەلەر بولساق, بۇل وتە قيىن سۇراق. قاتىسامىن دەپ ۋادە بەرە المايمىن. قىزىم دا ءوسىپ كەلەدى, مۇمكىن, بولاشاقتا ونىڭ جەتىستىكتەرىن كورەتىن شىعارمىز. بىراق اسىعۋدىڭ قاجەتى جوق. ول كاسىبي سپورتقا بەيىمدەلىپ كەلەدى. ەگەر ونىڭ تالپىنىسى بولسا, ءبىز تەك قولدايمىز. الداعى ۋاقىتتا نەمەن اينالىساتىنىمدى ءالى شەشكەن جوقپىن. سپورتقا قاتىستى ويلارىم بار. مەن جەڭىل اتلەتيكانىڭ جانكۇيەرىمىن. بۇل سپورت پاديشاسىنىڭ قازاقستاندا دا قاناتىن جايا تۇسكەنىن قالايمىن. كەيىنگى بۋىندى ءوسىرۋ ءۇشىن ءوز ۇلەسىمدى قوسقىم كەلەدى, – دەدى رىپاكوۆا.
ايتا كەتەلىك, جارىسقا قاتىسۋشىلارعا ءۇش مۇمكىندىك بەرىلەدى. ال فينالدىق سىنعا 12 سپورتشى جولداما الادى. ول ءۇشىن 14,40 مەتردى باعىندىرۋ كەرەك. و.رىپاكوۆا ءوزىنىڭ ەڭ ۇزدىك مۇمكىندىگىندە 13,69 مەترگە سەكىردى. بۇل فينالعا ءوتۋ ءۇشىن جەتكىلىكسىز ەدى.
سونداي-اق ىرىكتەۋ كەزەڭىندە ماريا وۆچيننيكوۆا مەن يرينا ەكتوۆا دا سىنعا تۇكەن بولاتىن. ولار جارىستىڭ ءبىرىنشى اينالىمىنان اسا الماي, 26 جانە 31-ورىن الدى.
