ەكونوميكا • 01 تامىز، 2021

التىنمەن پارا-پار تاۋەكەل

58 رەت كورسەتىلدى

وتاندىق تاۋارلار مەن قىزمەتتەردىڭ ەكسپورتتىق جەلىسىن كەڭەيتۋ، ەكسپورتقا باعدارلانعان كاسىپورىنداردى قولداۋ – كەز كەلگەن دامۋشى ەل ءۇشىن ماڭىزدى مىندەت. ويتكەنى جاقىن بولاشاقتا قىزمەتتىك سەكتور الەمدىك تابىستىڭ جارتىسىنان كوبىن يەلەنۋى مۇمكىن.

سوندىقتان قىزمەت كورسەتۋ سالاسىنداعى وتاندىق كومپانيا­لار الەمدىك نارىقتارعا شىعۋى كەرەك. سوندا عانا نارىقتاعى بوس كەڭىستىككە تۋىڭدى تىگىپ، باسە­كەلەستىككە ۇمتىلۋعا بولادى. وكى­نىشكە قاراي، بۇل باعىتتا تۇرەن سالىپ جۇرگەن قازاقس­تان­دىق كوم­پانيالار اسا كوپ تە ەمەس. ازىرشە اۋىز تولتىرىپ ايتارىمىز AAEngineering Group كومپانياسى عانا.

ءيا، ينجەنەرلىك، جابدىقتاۋ جانە قۇرىلىس جۇمىستارىن قاتار اتقاراتىن وتاندىق EPC-مەردىگەر – AAEngineering Group جشس شەتەل نارىعىنا شىعىپ وتىر. الايدا بۇل وڭاي شارۋا بولعان جوق. ول ءۇشىن ءتيىستى دەڭگەيدە قولداۋ شارالارى كورسەتىلدى. سەرىكتەستىك ەۋرازيالىق ەكونوميكالىق وداق نارىعىنداعى قۇرىلىس قىز­مەتتەرى سالاسىنداعى بوس كەڭىس­تىك­تەن ورىن الۋعا ۇمتىلدى. ناتي­جە­سىز ەمەس. ءىرى وندىرىستىك نىسانداردى باستان-اياق جوبالاپ، قۇ­رى­لىسىمەن اينالىساتىن وتان­د­ىق جەتەكشى ينجينيرينگتىك جانە قۇرىلىس كومپانياسى قىرعىزستانداعى «دجەرۋي» كەن ورنىندا تالاس التىن كەنى كومبيناتىن سالۋعا تاپسىرىس قابىلدادى. بۇل – قازاقستان، قىرعىزستان جانە رەسەي مەملە­كەت­تەرىنىڭ حالىقارالىق جوباسى.

كومپانيا حالىقارالىق تاپ­­سىرىستى ورىنداۋعا 2018 جىلى كىرىستى. بيىل تولىق اياق­تا­ماق. جوبانى جۇزەگە اسىرۋ شەڭ­بە­رىن­دە قۋاتتىلىعى جىلىنا 1،3 ملن توننا كەن وندىرەتىن زاماناۋي التىن ءوندىرۋ فابريكاسى، ىلەسپە ينفراقۇرىلىم، سونداي-اق قالدىق شارۋاشىلىعى سالىندى. AAEngineering Group كومپانياسىنىڭ قارجى ديرەكتورى ءۋاليحان اتاگەلديەۆتىڭ حابارلاۋىنشا، جوبا تاۋ-كەن مەتاللۋرگيا نىساندارىن جوبالاۋ جانە سالۋ سالاسىنداعى الەمدىك ۇزدىك تاجىريبەلەرگە تولىق سايكەس كەلەدى. EPC-مەردىگەر قۇرىلىس پروتسەسىندە جاڭا تەحنولوگيالىق شەشىمدەردى، سونداي-اق ESG جانە قىرعىز رەسپۋبليكاسى زاڭ­نا­ما­سىنىڭ تالاپتارىنا جاۋاپ بە­رە­تىن ەكولوگيالىق قا­ۋىپ­سىزدىك جانە قورشاعان ورتانى قورعاۋ قاعيداتتارىن ەنگىزۋگە ەرەكشە نازار اۋدارعان.

– جوبا تەحنيكالىق تۇرعىدان العاندا كۇردەلى. سوندىقتان جىلدار بويى جيناقتالعان تاجىريبە مەن ءبىلىمدى ۇشتاستىرۋعا تۋرا كەلدى. جالپى، ءار جوبانىڭ جۇزەگە اسىرىلۋ ستراتەگياسى ءارتۇرلى بولادى. تاۋەكەلدەرى دە ءبىر-بىرى­نە ۇقسامايدى. جوبانىڭ تەح­ني­كالىق قۇرامداس بولىگىنەن بولەك، الەۋمەتتىك، ەكولوگيالىق اسپەكتىلەر مەن ەلدەر اراسىنداعى تاۋەكەلدەردى ەلەمەۋگە، ەسكەرمەۋگە بولمايدى. ماسەلەن، 2020 جىلدىڭ قازان ايىندا «دجەرۋي» جوباسى 97 پايىزعا اياقتالىپ، ىسكە قوسۋ-جوندەۋ جۇمىستارى باستالعان كەزدە قىرعىزستان اۋماعىندا جوبانى تاپسىرۋ مەرزىمىن ءماجبۇرلى تۇردە بۇزۋعا قاۋىپ توندىرەتىن فورس-ماجورلىق جاعدايلار تۋىن­دادى. الايدا ينۆەستور مەن مەر­دى­گەر كومپانيانىڭ بىرلەسكەن كۇش-جىگەرىنىڭ ناتيجەسىندە فاب­ريكانى قالپىنا كەلتىرۋ جۇ­مىستارى قىسقا مەرزىمدە اياق­تال­دى. ءسويتىپ وسى جىلدىڭ 21 اقپانىندا فابريكا العاشقى التىن قۇيمانى ءوندىردى، – دەيدى ۋ.اتاگەلديەۆ.

تاۋداعى قيىندىقتارعا، پان­دەميا مەن پروتسەسس كەزىندە تۋىن­­دايتىن ءتۇرلى جاعدايلارعا قارا­ماستان، AAEngineering Group FIDIC حالىقارالىق ستان­د­ار­­تىنا سايكەس جوبانى تابىستى اياقتادى. بۇل كوم­پانيانىڭ 12-ءشى جوباسى ەدى. وسى ورايدا «دجەرۋي» جوباسى قازاقستان دامۋ بانكىنىڭ تىكە­لەي قولداۋىمەن جۇزەگە اسى­رىل­عانىن بولە-جارا اتاپ وتۋگە ءتيىسپىز.

– كوممەرتسيالىق بانكتەر قىرعىزستانداعى ەلارالىق ءارى ساياسي تاۋەكەلى جوعارى جوبانى قارجىلاندىرۋعا ق ۇلىق تانىتپادى. تەك قازاقستان دامۋ بانكى قولداۋ ءبىلدىردى. البەتتە اتالعان قارجى ينستيتۋتىنىڭ نەگىزگى ماقساتىنىڭ ءبىرى – قا­زاق­ستاننىڭ شيكىزاتتىق ەمەس سەك­تورىن جانە ەكسپورتتىق الەۋە­­تىن دامىتۋ ەكەنى انىق. ءبىز ولار­دىڭ قولداۋىنسىز مۇن­داي ءىرى جوبانى ىسكە اسىرۋدا جە­تەكشى ينجينيرينگتىك جانە قۇ­رىلىس كومپانيالارىمەن باسەكەلەسە الماس ەدىك، – دەيدى ۋ.اتاگەلديەۆ.

تاۋەكەلدىڭ جوعارى ەكەنىن بىلە تۇرا، وتاندىق ەكسپورتتىق قىزمەتتىڭ بولاشاعىنا ءۇمىت ارت­قان قازاقستاننىڭ دامۋ بانكى AAEngineering Group كومپانيا­سى­نا 3 جىلعا 37،7 ملن دوللار كەپىلدىك بەردى. اتاپ وتەرلىگى، مۇنداي ءىرى جوبا قارجى ينستيتۋتى ءۇشىن قاناتقاقتى جوبا بولدى. قازاقستاننىڭ دامۋ بانكى العاش رەت ەكسپورتتىق قىزمەتكە قاتىستى بانك كەپىلدىگى قۇرالىن پايدالاندى.

– التىن ءوندىرۋ سالاسىنداعى وتاندىق كاسىپورىنداردىڭ تاجى­ري­بەسى مول. قازاقستان ال­تىن­نىڭ بارلانعان قورى بويىنشا الەمدەگى 15 ەلدىڭ قاتارىنا كىرەدى. بۇدان بولەك جىلدان-جىلعا جاڭا كەن ورىندارىن بارلاۋ جانە ەل ىشىندە باعالى مەتالل ءوندىرۋدى ۇلعايتۋ جۇمىستارى قارقىن الۋدا. شەتەلدىك تاپسىرىس بەرۋشىنىڭ وتاندىق كوم­پانيانى التىن شىعارۋ فاب­ريكاسىنىڭ قۇرىلىسىن جۇر­گى­زە­تىن باس مەردىگەر رەتىندە تاڭ­دا­ۋى – وسىنىڭ ايعاعى. بانك ءوز قۇزىرەتى اياسىندا العاش رەت قىزمەتتەر ەكسپورتىن جۇزەگە اسىراتىن وتاندىق كومپانياعا بانكتىك كەپىلدىك بەردى. قىزمەتتەر ەكسپورتى پاندەميانىڭ بەلەڭ العان كەزەڭىندە، جەتكىزۋدىڭ لو­گيس­تيكالىق تىزبەكتەرى بۇزى­لىپ، تولىق وقشاۋلاۋ رەجىمدەرى ەنگى­زى­ل­گەن كەزدە جۇزەگە اسىرىلعانىن اتاپ ءوتۋ كەرەك. قيىن شارتتارعا قاراماستان، قازاقستاندىق كومپانيا مىندەتتەمەنى ويداعىداي ورىندادى، – دەيدى «قازاقستان دامۋ بانكى» اق كليەنتتەرمەن جۇمىس جۇرگىزۋ ديرەكتسياسىنىڭ اعا بانكيرى ۆلاديمير لي.

وسىلايشا، قازاقستاندىق ين­جي­ني­رينگتىك كومپانيا «دجە­رۋي» جوباسىن ءساتتى اياق­تاپ، باعا جەتپەس تاجىريبە جينادى. كومپانيا الەمدىك نارىقتان ءالى دە بوس كەڭىستىكتەر ىزدەۋدى جال­­­عاستىرۋدا. بۇگىندە سەرىك­تەس­­تىك قىرعىزستان اۋما­عىن­دا «جامعىر» كەن ورنىندا التىن ءوندىرۋ فابريكاسىن سالۋ جوباسىن ىسكە اسىرۋدا. رەسەي فەدە­را­تسيا­سى مەن وزبەكستاننىڭ ءىرى جوبالارى دا پىسىقتالىپ جاتقان كورىنەدى.

 

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار