بۇگىندە قاراعاندى وبلىسىنداعى ەپيدەميالىق جاعداي مىڭ قۇبىلىپ تۇر. وڭىردەگى قالالار مەن اۋدانداردا «جامان تۇماۋدىڭ» جوعارى كورسەتكىشى بايقالادى. ماسەلەن, وبلىس بويىنشا كوروناۆيرۋس ينفەكتسياسىنىڭ زەرتحانالىق نەگىزدە راستالعان 55 مىڭنان اسا جاعدايى تىركەلگەن. مىنە, جاعدايدىڭ وسىلاي بولىپ قالىپتاسۋىنا بايلانىستى, باس سانيتارلىق دارىگەردىڭ شەشىمىمەن Ashyq باعدارلاماسىنا قاتىسپايتىن بارلىق كاسىپورىندار مەن ۇيىمداردىڭ قىزمەتى توقتاتىلاتىن بولدى.
ايتا كەتۋ كەرەك, بۇل تىزىمگە ورتالىق مەملەكەتتىك ورگاندار, اكىمدىكتەر, قۇقىق قورعاۋ ورگاندارى, دەنساۋلىق ساقتاۋ ۇيىمدارى, باق, ازىق-ت ۇلىك دۇكەندەرى, ءدارىحانالار جانە تىرشىلىكتى قامتاماسىز ەتۋ ۇيىمدارى ەنبەيدى. بۇدان بولەك قۇرىلىس جۇمىستارىن جۇرگىزۋ ءۇشىن, ونەركاسىپتىك كاسىپورىندار, جەكەلەگەن قىزمەت تۇرلەرى بار بيزنەس-ورتالىقتار ءۇشىن Ashyq قوسىمشاسىنسىز قىزمەت ەتۋگە رۇقسات بەرىلگەن. بۇل رەتتە Ashyq قوسىمشاسىنىڭ كوشباسشىلارى جۇمىس رەجىمىن 22.00-گە دەيىن سوزا الادى.
Ashyq رەجىمىن بۇزعان ۇيىمدارعا قولدانىلاتىن شارالاردىڭ دا قاتاڭ بولاتىنىن ايتا كەتۋ كەرەك. ماسەلەن, ونداي جاعدايدا ولاردىڭ قىزمەتى ەسكەرتۋسىز ءبىر اي مەرزىمگە شەكتەلەدى. ال Ashyq باعدارلاماسى بويىنشا قالعان كاسىپورىندار دەمالىس كۇندەرىن قوسپاعاندا, ساعات 10.00-دەن 20.00-گە دەيىن جۇمىس ىستەي الادى. بۇل ساناتقا مونشالار, ساۋنالار, سپا-ورتالىقتار, باسسەيندەر, فيتنەس-كلۋبتار, فيتنەس-ورتالىقتار, سونىڭ ىشىندە يوگا-ورتالىقتار, تەاترلار, كونتسەرت زالدارى, فيلارمونيالار, كينوتەاترلار جاتادى.
سونىمەن قاتار ءدارىحانالاردىڭ, سۋپەرماركەتتەر مەن ازىق-ت ۇلىك پاۆيلوندارىنىڭ ىشىندە ورنالاسقاندارىن قوسپاعاندا, ساۋدا ورتالىقتارى, ساۋدا ۇيلەرى, ازىق-ت ۇلىككە جاتپايتىن تاۋارلاردى وتكىزەتىن ساۋدا جەلىلەرى, كوتەرمە-تاراتۋ ورتالىقتارى, ساۋدا-فەرمەر ورتالىقتارى, اۋدانى 1 مىڭنان 2 مىڭ شارشى مەترگە دەيىنگى ازىق-ت ۇلىك ەمەس دۇكەندەر دە ورتاق تارتىپكە باعىنادى.
سونداي-اق Ashyq باعدارلاماسى بويىنشا دەمالىس كۇندەرىن قوسپاعاندا, جابىق جانە اشىق بازارلار (ازىق-ت ۇلىك جانە ءونىم ەمەس) ساعات 09:00-دەن 17:00-گە دەيىن جۇمىس ىستەيتىن بولادى. دەمالىس كۇندەرى قالا ىشىندەگى تۇراقتى مارشرۋتتىق اۆتوبۋستار مەن شاعىن اۆتوبۋستاردىڭ قوزعالىسى توقتاتىلادى.
وبلىستىڭ باس سانيتارلىق دارىگەرى يۋري زالىگين بۇل شەكتەۋ شارالارىنىڭ كارانتيندىك رەجىمدى ۋاقىتشا قامتاماسىز ەتۋ جانە حالىقتىڭ قاۋىپسىزدىگى ءۇشىن ەنگىزىلگەنىن ايتادى. بۇيتپەسە, كوروناۆيرۋس ينفەكتسياسى بويىنشا جاعدايدى تۇراقتاندىرۋ مۇمكىن بولمايتىن ءتۇرى بار.
– ەپيدەميالىق احۋال جاقسارعان جاعدايدا عانا بۇل شەكتەۋلەر قايتا قارالاتىن بولادى. بارلىق كارانتين شارالارىن قاتاڭ ساقتاۋعا, ۆاكتسينالاۋدىڭ تولىق كۋرسىنان وتۋگە جانە ءوزىن ءوزى ەمدەمەۋگە شاقىرامىن, – دەدى يۋ.زالىگين.
ۆاكتسينا دەمەكشى, وبلىستا 30 شىلدەدەگى جاعداي بويىنشا كوروناۆيرۋس ينفەكتسياسىنا قارسى ەكپەنىڭ ءبىرىنشى كومپونەنتىن 380 793 ادام العان ەكەن. ال ەكى كومپونەنتتى تولىعىمەن العانداردىڭ سانى 255 934 ادامعا جەتكەن. بۇگىندە وڭىردە تۇرعىنداردى ۆاكتسينالاۋ جۇمىستارى بەلسەندى تۇردە جۇرگىزىلۋدە.
قازىرگى ۋاقىتتا وبلىستىڭ قالالارى مەن اۋداندارىندا وتكىزۋ قابىلەتى تاۋلىگىنە 8 مىڭنان اسا ادامدى قۇرايتىن 115 ەكپە كابينەتى جۇمىس ىستەپ تۇر. ءموبيلدى مەديتسينالىق بريگادالار كاسىپورىندار مەن ۇيىمدارعا بارادى. وبلىستىق دەنساۋلىق ساقتاۋ باسقارماسىنىڭ باسشىسى گامال توقسامباەۆ وڭىردە ۆاكتسينانىڭ ءۇش ءتۇرى – سپۋتنيك V, QazVac جانە CoronaVac پرەپاراتتارىنىڭ جەتكىلىكتى ەكەنىن ايتادى.
ال دەنساۋلىق ساقتاۋ باسقارماسى باسشىسىنىڭ ورىنباسارى بيبىگۇل تولەگەنوۆا ەكپە الۋ بويىنشا كوش باسىندا كۇشتىك قۇرىلىمداردىڭ تۇرعانىن ءمالىم ەتتى. بۇل سالاداعى قىزمەتكەرلەر تۇگەلگە دەرلىك ۆاكتسينالانعان ەكەن. ودان كەيىنگى ورىنداردا مەديتسينا سالاسىنىڭ, ونەركاسىپتىك كاسىپورىنداردىڭ قىزمەتكەرلەرى كەلەدى.
وسى ورايدا بيبىگۇل تولەگەنوۆا ۆاكتسينا العان ادامدار اراسىندا دا اۋىرىپ جاتقانداردىڭ بار ەكەنىن ايتتى. ماسەلەن, بۇگىندە ەكپە سالدىرعان 206 ادام سىرقاتقا شالدىققان. بۇل جەردە ولاردىڭ 73%-نىڭ تەك ءبىرىنشى كومپونەنتتى العانىن اتاپ ءوتۋ كەرەك. ال قالعانى ەكىنشى كومپونەنتتى العاننان كەيىن ەكى اپتاعا جەتپەي اۋىرعان. ياعني ولاردىڭ اعزالارىندا ءتيىستى يممۋنيتەت قالىپتاسىپ ۇلگەرمەگەن بولسا كەرەك.
قازىرگى تاڭدا وبلىستا «جامان تۇماۋمەن» اۋىرعان ناۋقاستارعا ارنالعان 5 679 توسەكتىك ورىن بار ەكەن. جالپى العاندا جۇكتەمە 52,3%-دى قۇرايدى.
وبلىستىڭ باس دارىگەرى وڭىردە مەديتسينالىق ۇيىمداردىڭ ماتەريالدىق-تەحنيكالىق بازاسىنىڭ نىعايتىلعانىن ايتادى. بۇگىندە 26 كومپيۋتەرلىك توموگراف جۇمىس ىستەپ تۇر, ونىڭ ىشىندە 22-ءسى كۆي بار پاتسيەنتتەردىڭ وكپە جۇيەسىنىڭ زاقىمدانۋىن دياگنوستيكالاۋعا قاتىسادى. سونىمەن قاتار 40 ساندىق رەنتگەن-قوندىرعى, 364 ءوجج اپپاراتى بار. 25 اۋرۋحانادا مەديتسينالىق گاز تاراتۋدىڭ ورتالىقتاندىرىلعان جۇيەسى جۇمىس ىستەيدى. تاۋلىگىنە 15,6 مىڭ سىنامانىڭ تاۋلىكتىك قۋاتى بار 10 پتر-زەرتحانانىڭ جۇمىسى قامتاماسىز ەتىلگەن. قوردا قوسىمشا 140 مىڭ تەست بار ەكەن.
بۇدان بولەك پاتسيەنتتەرگە ۇيدە قىزمەت كورسەتۋ ءۇشىن سانيتارلىق اۆتوكولىكپەن قامتاماسىز ەتىلگەن 329 ەمحانالىق ءموبيلدى بريگادا جۇمىس ىستەيدى. جەدەل مەديتسينالىق كومەكتى 105 بريگادا كورسەتەدى. ەپيدەميالىق جاعداي ناشارلاعان جاعدايدا, مارشرۋتقا تاعى 20 قوسىمشا بريگادا شىعارىلادى. مەديتسينالىق ۇيىمداردا ءدارى-دارمەكتەر مەن جەكە قورعانۋ قۇرالدارىنىڭ ءۇش ايعا جەتەتىن قورى بار.
قاراعاندى وبلىسى
