اتالعان توپتامانى ازىرلەۋ باعىتىنداعى كەشەندى شارالار وتكەن جىلدىڭ قىركۇيەك ايىندا باستالعان. مۇنداعى نەگىزگى ماقسات – وقۋلىقتارعا قويىلاتىن تالاپتاردى وتاندىق جانە الەمدىك تاجىريبەنى سالىستىرۋ جانە ءجىتى زەرتتەۋ ارقىلى قايتا قاراستىرۋ, زامان تالابىنا ساي ازىرلەۋ. سونداي-اق, ساراپتاما كەزەڭدەرى مەن رەتتىلىگىن تيىمدىلىك جانە قولدانبالىلىق تۇرعىسىنان قايتا قاراۋ, وقۋلىقتاردى زەردەلەۋ مەن بەكىتۋدىڭ ۇلتتىق جۇيەسىن نىعايتۋ كوزدەلدى. بۇل جونىندە رعپ ءبىلىم مازمۇنىن ساراپتاۋ ورتالىعىنىڭ ديرەكتورى ەلدوس نۇرلانوۆ ايتىپ بەردى.
«ازىرلەنگەن قۇجاتتاردا ساراپتامانى جۇرگىزۋگە, ساراپشىلاردى ىرىكتەۋگە, ورتا ءبىلىم مازمۇنىنىڭ ينۆاريانتتى بولىگىنە جاتاتىن 19 پانگە ارنالعان كريتەريلەرگە, جاڭا وقۋلىقتار مەن واك-گە جۇرگىزىلەتىن سىناقتان وتكىزۋ پروتسەسى مەن قوعامدىق تالقىلاۋ جۇمىسىن جۇرگىزۋگە قاتىستى نۇسقاۋلىقتار قامتىلعان. سونىمەن قاتار وقۋ باسىلىمدارىنىڭ اۆتورلارىنا, ساراپشىلاردىڭ جۇمىسىن باعالاۋعا باعىتتالعان ارنايى نۇسقاۋلىقتار دا بار», دەدى ورتالىق باسشىسى.
ەلدوس بولاتحان ۇلىنىڭ ايتۋىنشا, وقۋ ادەبيەتىن باعالاۋعا ارنالعان كريتەريلەردى 19 پانگە ءبولىپ قاراستىرۋ – ۇتىمدى تاجىريبە. بۇعان دەيىن وقۋ باسىلىمدارىن باعالاۋ جۇيەسىندە جالپى تالاپتارعا باسىمدىق بەرىلگەن. ەلىمىزدە وقۋلىققا ساراپتاما جۇرگىزۋدىڭ وزىندىك تاجىريبەسى بولعانىمەن, ءپان بويىنشا ەگجەي-تەگجەي جىكتەۋ بۇرىن-سوڭدى قولدانىلىپ كورمەگەن.
ءبىلىم جانە عىلىم مينيسترلىگى بۇل ماسەلەگە دەن قويىپ, دۇنيەجۇزىلىك بانكتىڭ «ورتا ءبىلىمدى جاڭعىرتۋ» جوباسى اياسىندا وسى باعىت بويىنشا كونسۋلتاتسيالىق, عىلىمي-زەرتتەۋ جۇمىستاردى جۇرگىزۋدى قولعا الدى.
جاڭارتىلعان كريتەريلەردە سوڭعى 5 جىلدا قولدانىسى قارقىندى تۇردە ارتقان عالام تورابى مەن الەۋمەتتىك جەلىنىڭ سىن-قاتەرلەرى ەسكەرىلگەن. ماسەلەن, مەملەكەت پەن قوعامنىڭ دامۋىنا كەرى اسەرىن تيگىزۋى مۇمكىن كەمسىتۋشىلىك, قۇقىقبۇزۋشىلىق, قاتىگەزدىك, ۇردىسشىلدىك, سۋيتسيد, لاڭكەستىك, وتباسى قۇندىلىقتارىنا قارسى مىنەز-ق ۇلىق, كوممەرتسيالىق جارناما, بەيرەسمي دەرەككوزدەردىڭ كورىنىس تابۋىنا جول بەرمەۋ ماسەلەسى كۇشەيتىلە تۇسكەن.
جاڭارتىلعان كريتەريلەر ءتيىستى راسىمدەردەن وتكەننەن كەيىن قولدانىسقا ەنگىزىلەدى.
