ەكولوگيا • 27 شىلدە، 2021

قايىرىمدى ىستەر مارافونى: ەلىمىزدىڭ 12 ايماعىندا ەكواكتسيا وتكىزىلدى

34 رەت كورسەتىلدى

19 بەن 25 شىلدە ارالىعىندا «قايىرىمدى ىستەر مارافونى» جالپىۇلتتىق جوباسىنىڭ قاتىسۋشىلارى جازعى قايىرىمدىلىق كۇنىن مەرەكەلەۋ اياسىندا ء«وز ەلىمدە ءىز قالدىرماي Sayahattime» اتتى اۋقىمدى اكتسياعا قاتىستى، دەپ حابارلايدى Egemen.kz qim.kz سايتىنا سىلتەمە جاساپ.

بوتاكوز باقبەرگەن

قايىرىمدى ىستەر مارافونى اياسىندا ۆولونتەرلەر مەن بەلسەندىلەر جارتاستارداعى ۆاندالدى جازبالاردى ءوشىرۋ، سۋ قويمالارى مەن تانىمال تۋريستىك باعدارلاردىڭ ماڭىن تازالاۋعا اتسالىستى. اكتسيانى جەرگىلىكتى اتقارۋشى ورگانداردىڭ، «Kazakh Tourism» كومپانياسىنىڭ، «Jana Dunie» قايىرىمدىلىق قورى قولداۋىمەن اقپارات جانە قوعامدىق دامۋ مينيسترلىگى ۇيىمداستىردى.

اتالمىش اكتسياعا ەلىمىزدىڭ 12 ايماعى: قاراعاندى، قىزىلوردا، اقمولا، پاۆلودار، شىعىس قازاقستان، اتىراۋ، ماڭعىستاۋ، سولتۇستىك قازاقستان، الماتى، اقتوبە، تۇركىستان وبلىستارىنىڭ، سونىمەن قاتار شىمكەنت قالاسىنىڭ بەلسەندىلەرى اتسالىستى.

«جازعى قايىرىمدىلىق كۇنى جانە وعان ارنالعان ەكواكتسيا – مارافون اياسىندا ءوتىپ جاتقان ەكىنشى ءىس-شارا. بۇدان بۇرىن ءبىز قاسيەتتى رامازان ايىنىڭ قۇرمەتىنە مۇقتاج جانداردى قولداۋعا ارنالعان اكتسيا وتكىزگەنبىز، وعان ءىرى سۋپەرماركەتتەر مەن دۇكەندەر قوسىلعان ەدى. ۇلتتىق قايىرىمدىلىق كۇنىن اتاپ ءوتۋ اياسىندا باسقا دا ءىس-شارالاردى ۇيىمداستىرۋدى كوزدەپ وتىرمىز. ول ەلدەگى مارافونعا قاتىسۋشىلاردىڭ ءبارىن بىرىكتىرەر ەدى»، دەپ جوسپارلارىمەن ءبولىستى «ازاماتتىق باستامالاردى قولداۋ ورتالىعى» كەاق باسقارما توراعاسى ليما دياس.

اۋماقتى قوقىستان، جارتاستاردى جازبالاردان، ال سۋ قويمالارىن پلاستيك بوتەلكەلەردەن تازارتۋ جۇمىستارىن بەلسەندىلەر ەلدەگى ەڭ تانىمال تۋريستىك ورىنداردا اتقاردى. اتاپ ايتقاندا: قوڭىر اۋليە ۇڭگىرى، سىبە كولدەرى، راحمان قاينارلارى، بولەكتاۋ تاۋى، شايتانكول كولى، ەم بۇلاق، كاسپي تەڭىزىنىڭ جاعالاۋى، يمانقارانىڭ تاۋلى اڭعارلارى مەن كەڭ بايتاق دالانىڭ باسقا دا ورىندارى تازارتىلدى.

«كەيبىر ايماقتاردا باستاماشىل توپتار ەكواكتسيانى وتكىزۋ ءۇشىن بىرنەشە لوكاتسيانى الۋدى ۇسىندى. ماسەلەن، قاراعاندى وبلىسىندا اۋماقتى تازارتۋ جۇمىستارى بىردەن ءۇش ورىندا، ال شىعىس قازاقستاندا ەكى ورىندا جۇرگىزىلدى. ء«وز ەلىمدە ءىز قالدىرماي Sayahattime» - ىلە-الاتاۋ نەمەسە قارقارالى ۇلتتىق پاركىندەگى جارتاستاردى تازالاۋ سەكىلدى ساناۋلى ءىس-شارالاردان باستالعان وسىناۋ اكتسيانىڭ رەسپۋبليكالىق اۋقىمداعى جوباعا اينالعانىنا قۋانىشتىمىز. سەبەبى وسىنىڭ ارقاسىندا قوعامنىڭ نازارىن ەكولوگيا، ءبىزدىڭ تابيعاتىمىزدى ساقتاپ، اۋەلگى قالپىن ساقتاۋ سەكىلدى ماڭىزدى ماسەلەلەرگە اۋدارتامىز»، دەپ اتاپ ءوتتى نۇر-سۇلتان قالاسىنداعى «Jana Dunie» قورىنىڭ ديرەكتورى اسەل اليەۆا.

جىل باسىنان بەرى ەكومارافونعا 2،5 ملن استام ادام قاتىسىپ، 167 مىڭ ادامعا ناقتى كومەك كورسەتىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز