جاڭاشىلدىققا جول اشقان جاڭا ۇردىسكە ءبىز دە ۇلەسىمىزدى قوسۋدى كوزدەدىك. ءبىزدىڭ ماقساتىمىز – سايلاۋدىڭ اشىق, ءادىل ءوتۋىن قاداعالاۋ.
اتىراۋ قالاسى مەن التى اۋدانداعى 18 اۋىلدىق وكرۋگتىڭ اكىمى لاۋازىمى ءۇشىن 52 ۇمىتكەر دوداعا ءتۇستى. اكىم سايلاۋى 36 سايلاۋ ۋچاسكەسىندە ءوتتى. قوعامدىق بىرلەستىكتىڭ 150-گە جۋىق بايقاۋشىسى سايلاۋ ۋچاسكەلەرىنە تاڭعى ساعات 6:00-دەن باستاپ باردى. سايلاۋ ۇدەرىسىن قاداعالاۋ كەزىندە «قازاقستان رەسپۋبليكاسىنداعى سايلاۋ تۋرالى» زاڭ تالابىن بۇزۋشىلىق تىركەلگەن جوق.
سايلاۋ ۋچاسكەلەرىندە داۋىس بەرۋ سانيتارلىق نورمالارعا سايكەس ۇيىمداستىرىلدى. اۋىل تۇرعىندارىنىڭ بۇل سايلاۋعا قىزىعۋشىلىق تانىتىپ, بەلسەندىلىكپەن داۋىس بەرگەنىنەن بيلىك پەن بۇقارا اراسىنداعى بايلانىستىڭ نىعاياتىنىن بايقادىق. ءار تۇرعىن داۋىس بەرۋگە كەلىپ, ءوز تاڭداۋىن جاسادى. وسىلايشا, سايلاۋشىلار ەلىمىزدىڭ دەموكراتيالىق جولمەن وركەندەۋىنە ۇلەسىن قوستى.
ال اۋىل اكىمدەرى تۋرالى ايتاتىن بولساق, ەندى ولار ءوز مىندەتىنە جاۋاپكەرشىلىكپەن قارايتىن بولادى. ويتكەنى اكىم اۋىل تۇرعىندارىنىڭ كوپ داۋىسىن جيناۋ ءۇشىن سايلاۋالدى باعدارلاماسىن ۇسىندى. سايلاۋشىلاردىڭ سەنىمىن اقتاۋعا تىرىساتىن اكىم ءوزى ۇسىنعان باعدارلامانىڭ ناقتى ىسكە اسۋىنا مۇددەلىك تانىتادى.
داۋرەن سەيىتقاليەۆ,
«پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگى وبلىستىق فيليالىنىڭ جەتەكشىسى
اتىراۋ وبلىسى
