بۇعان دەيىن سەرىك ساپيەۆ وليمپيادا ويىندارىن تاراتۋ بويىنشا قۇقىق يەلەنۋشى كومپانيا قازاقستاننان وتە ۇلكەن سوما سۇراعانى تۋرالى ايتقان.
«كورشى رەسپۋبليكالار ترانسلياتسيا ءۇشىن تولەگەن سومانى ءبىلدىم, الدەقايدا تومەن بولدى. مىسالى, قىرعىزستان اقپاراتى بويىنشا, ولار بار بولعانى 100 مىڭ دوللار تولەگەن. باق-تا وزبەكستان 800 مىڭ دوللار تولەگەنى تۋرالى اقپاراتتى كوردىم. بۇل باعالاردى سالىستىرامىز. ارينە, قازاقستانداعى وليمپيادا ويىندارىنىڭ ترانسلياتسياسى ءۇشىن ارتىق تولەگىمىز كەلمەيدى. سوندىقتان قازاقستاندىق تەلەارنالاردا ترانسلياتسيا بولماۋى مۇمكىن دەگەن ماسەلە تۋىندادى», دەگەن ەدى
قازاقستاندىق تەلەارنالار وليمپيادا ويىندارىن كورسەتپەۋى مۇمكىن دەگەن حاباردان سوڭ وتانداستارىمىز الەۋمەتتىك جەلىدە نارازىلىقتارىن بىلدىرە باستادى. ولاردىڭ ىشىندە جوعارىدا اتالعان ماسەلەگە كونبىستىك تانىتقاندار دا بولدى.
بىراق سپورت كوميتەتىنىڭ باسشىسى رەسپۋبليكالىق 7 ارناعا بەرگەن سۇحباتىندا ءالى ناقتى شەشىم قابىلدانباعىن جەتكىزدى.
«قازاقستاندىقتار وليمپيادا ويىندارىن وتاندىق ارنالاردان تىكەلەي ەفيردە تاماشالاۋى مۇمكىن. ءبىز قازىر اقپارات جانە قوعامدىق دامۋ مينيسترلىگىمەن بىرگە كەلىسسوزدەر جۇرگىزىپ جاتىرمىز. جاقىن ارالىقتا ناقتى شەشىمى بەلگىلى بولادى», دەدى ول.
ايتا كەتەيىك, وليمپيادا ويىندارىن ترانسلياتسيالاۋ تۋرالى كەلىسسوزدەردى «قازاقستان» كورپوراتسياسى مەن «حابار» اق جۇرگىزگەن. بۇعان دەيىن تاراپتار ءالى كەلىسىمگە كەلە الماعانى حابارلانعان بولاتىن.
ال وليمپيادا ويىندارى توكيودا 23 شىلدە مەن 8 تامىز ارالىعىندا وتەدى. قازاقستاندا 27 سپورت ءتۇرى بويىنشا 97 ليتسەنزيا بار.
