سارىاعاش اۋداندىق پوليتسيا ءبولىمىنىڭ قىزمەتكەرلەرى جىبەك جولى – جەتىساي تاس جولىندا ورنالاسقان سارىاعاش قالاسىنىڭ عيماراتتارىنىڭ بىرىندە تاڭعى ساعات 4.00-دە جۇمىس ىستەگەن بۋكمەكەرلىك كەڭسەنى انىقتادى.
تەكسەرىس بارىسىندا كەڭسە عيماراتىندا قۇمار ويىندار وتكىزىلگەنى بەلگىلى بولدى. وقيعا ورنىنا اۋداندىق ءبولىمنىڭ جەدەل-تەرگەۋ توبى شاقىرىلدى. ويىن مەكەمەسىندە وپەراتور بولىپ سارىاعاش اۋدانىنىڭ تۇرعىنى, جاس ايەل جۇمىس ىستەگەن.
ءتىنتۋ كەزىندە جەدەل ۋاكىلدەر ەكى ويىن اۆتوماتىن, بەس جۇيەلىك بلوك پەن كاسسالىق ماشينانى تاركىلەدى. الىنعان زاتتاي دالەلدەمەلەرگە ساراپتاما تاعايىندالدى.
اتالعان فاكتى قر قك-ءنىڭ 307-بابى «زاڭسىز ويىن بيزنەسىن ۇيىمداستىرۋ» بويىنشا سدتبت-دە تىركەلدى. قازىرگى ۋاقىتتا وقيعانىڭ ءمان-جايى انىقتالۋدا.
ودان بولەك, بۋكمەكەرلىك كەڭسەنىڭ كارانتيندىك شەكتەۋ شارالارىنا قاراماستان كەلۋشىلەردى قابىلداعان قىزمەتكەرلەرىنە قاتىستى قر اقبتك-ءنىڭ 425-بابى «حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى زاڭناما تالاپتارىن, سونداي-اق گيگيەنالىق نورماتيۆتەردى بۇزۋ» بويىنشا ماتەريالدار جيناپ, زاڭدى شەشىم قابىلداۋ ءۇشىن اۋداندىق سەس-كە جىبەرىلدى.
