يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ پەن رف ونەركاسىپ جانە ساۋدا ءمينيسترىنىڭ ورىنباسارى ولەگ بوچاروۆتىڭ قاتىسۋىمەن «قازاقستاندىق اۆياتسيالىق يندۋستريا» جشس-ءنىڭ (قاي) «ورال ازاماتتىق اۆياتسيا زاۋىتى» اق ەنشىلەس كومپانياسى «بايكال-ينجينيرينگ» جشق-عا قاتىسۋ ۇلەسىن ساتىپ الۋى تۋرالى كەلىسىمشارتقا قول قويىلدى.
قازاقستان تاراپى بۇل جوباعا 1 ملرد رۋبل كولەمىندە ينۆەستيتسيا سالىپ, جوباداعى مينوريتارلىق ۇلەسكە يە بولادى جانە وسى ۇشاقتاردى وندىرۋگە ليتسەنزيا الادى. كەلىسىم 2024 جىلدان باستاپ قاي بازاسىندا «بايكال» تۇرىندەگى ۇشاقتار ءوندىرىسىن ۇيىمداستىرۋدى كوزدەيدى. ءوندىرىستىڭ قۋاتى – جىلىنا 30-50 ۇشاق. قازاقستاندىق كاسىپورىن ءۇشىنشى ەلدەرگە ارناپ ەكسپورتتىق نۇسقادا «بايكال» ۇشاقتارىن ليتسەنزيالىق ءوندىرۋ قۇقىعىنا يە بولدى.
سونداي-اق قازاقستاننىڭ اۆياتسيالىق اكىمشىلىگى جانە روساۆياتسيا اراسىندا ۇشۋ جارامدىلىعى بويىنشا جۇمىس كەلىسىمىنە قول قويىلدى. كەلىسىم ۇشۋ جارامدىلىعى سەرتيفيكاتتارىن, ۇلگىلىك سەرتيفيكاتتاردى جانە اۋە تەحنيكاسىنىڭ بولشەكتەرى مەن جيىنتىقتاۋىشتارىن, ونىڭ ىشىندە ۇشقىشسىز اۋە جۇيەلەرىن باعالاۋدى, سىناۋدى جانە تەكسەرۋدى قايتالاماي پايدالانۋعا رۇقسات بەرۋ ءتارتىبىن وڭايلاتۋعا باعىتتالعان. كەلىسىم وزگەرىستەردى, موديفيكاتسيالاردى ءوزارا ماقۇلداۋعا, اۋە تەحنيكالارىن جانە ونىڭ جيناقتاۋىشتارىن جوندەۋدى دامىتۋعا, سونداي-اق ازاماتتىق اۋە تەحنيكاسىنىڭ ۇلگىلىك كونسترۋكتسياسىن ماقۇلداۋدىڭ (ۆاليداتسيالاۋدىڭ) وڭايلاتىلعان ءتارتىبى ءۇشىن قولايلى جاعدايلار جاساۋدى كوزدەيدى.
بۇعان قوسا «جۋكوۆسكي اتىنداعى ينستيتۋت» عزو-مەن عىلىمي-تەحنيكالىق ىنتىماقتاستىق تۋرالى كەلىسىم جاسالدى. پروفەسسور ن.ە.جۋكوۆسكي اتىنداعى ورتالىق اەروگيدروديناميكالىق ينستيتۋت (واگي) قازاقستاندىق «قاي» جشس-مەن كەلىسىمگە قول قويدى.
بىرلەسكەن قىزمەت باعىتتارى ىشىندە «واگي» فگۋپ عىلىمي-سىناق بازاسىن پايدالانا وتىرىپ, زەرتتەۋ جوبالارىنا, ۇشقىشسىز ۇشاتىن اپپاراتتاردى (ۇۇا), ۇشۋ ترەناجەرلارىن ازىرلەۋگە قاتىسۋ بار.
Kazakhstan Gharysh Sapary ۇلتتىق كومپانياسى اۆياتسيالىق عىلىم ورتالىعىمەن عارىش سالاسىندا بىرلەسكەن قازاقستان-رەسەي باعدارلامالارى تۋرالى كەلىسىم جاساستى.
«روسكوسموس» مك, «روسوبورونەكسپورت» اق, فسۆتس, «الماز-انتەي» اۋە شابۋىلىنا قارسى قورعانىس كونتسەرنى» ااق جانە «رەسەي تىكۇشاقتارى» اق باسشىلىعىمەن عارىش سالاسىنداعى جانە قورعانىس-ونەركاسىپ كەشەنىندەگى ىنتىماقتاستىق ماسەلەلەرى بويىنشا جۇمىس كەزدەسۋلەرى ءوتتى.
سونىمەن قاتار مينيستر بەيبىت اتامقۇلوۆ Airbus توبىنىڭ شىعىس ەۋروپا, كاۆكاز جانە ورتالىق ازيا ەلدەرىندەگى ۆيتسە-پرەزيدەنتى جاك گارريگپەن جانە بەلارۋس رەسپۋبليكاسىنىڭ مەملەكەتتىك اسكەري-ونەركاسىپتىك كوميتەتىنىڭ توراعاسى دميتري پانتۋسپەن كەلىسسوزدەر جۇرگىزدى. بەلارۋستىق سەرىكتەستەر ارنايى ماقساتتاعى ونىمدەردى ءوندىرۋ بويىنشا تەحنولوگيالار ترانسفەرتىنە قىزىعۋشىلىق ءبىلدىردى.
كەزدەسۋلەردىڭ بارلىق قاتىسۋشىسى قازاقستان باسشىلىعىنىڭ ەكىجاقتى قارىم-قاتىناستار مەن ونەركاسىپتىك كووپەراتسيانى دامىتۋداعى زور ەڭبەگىن اتاپ ءوتتى.
