‒ الەمدىك رەيتينگتە ۇزدىك تورتتىكتە تۇرعان بوكسشىلاردى جارتىلاي فينالعا دەيىن كەزدەسپەيتىندەي ەتىپ جەرەبە تارتىلدى. ءبىزدىڭ قۇرامادان 81 كيلودا بەكزات نۇرداۋلەتوۆ, 91 كيلودا ۆاسيلي لەۆيت جانە اسا اۋىر سالماقتاعى قامشىبەك قوڭقاباەۆتار ۇزدىكتەر قاتارىندا بولعاندىقتان ولار وليمپيادادا نەگىزگى قارسىلاستارىمەن جارتىلاي فينالعا دەيىن كەزدەسە المايدى. بىراق مىقتى دەگەن بوكسشىلاردىڭ بارلىعىنا جەرەبە ءساتتى بولدى دەي المايمىن. سەبەبى, ۆاسيلي لەۆيت يسپانيانىڭ اتىنان شىعاتىن كۋبالىق بوكسشىمەن كەزدەسەدى. ال ودان ءارى وتسە, 81 كيلودا ريو وليمپياداسىنىڭ چەمپيونى اتانعان لا كرۋزبەن كەزدەسۋى مۇمكىن. جالپى, ازيا چەمپيوناتىنان كەيىن ءۆاسيليدىڭ كەم-كەتىكتەرىمەن جۇمىس ىستەدىك. دۇرىس-بۇرىس دايىندالعانىن رينگ كورسەتەدى.
‒ قوڭقاباەۆ پەن جالولوۆ اراسىنداعى سوڭعى كەزدەسۋلەر وزبەك بوكسشىسىنىڭ پايداسىنا شەشىلىپ جاتىر. بۇل تۋرالى نە ايتاسىز؟
‒ ارينە, بۇل سۇراق ءالى تالاي قويىلا بەرەدى. قوڭقاباەۆ پەن جالولوۆ ءبىر-بىرىمەن جۇدىرىقتاسۋ ءۇشىن الدىمەن ەكى-ءۇش قارسىلاستى جەڭىپ شىعۋ كەرەك. سودان كەيىن كورە جاتارمىز. ەگەر دە فينالدا كەزدەسىپ جاتسا, قوڭقاباەۆ كەتكەن ەسەنى قايتارۋعا تىرىساتىنى ءسوزسىز. ول وعان ابدەن دايىندالدى.
‒ وليمپيادالىق قالاشىقتىڭ قىزمەت كورسەتۋ جاعدايى قالاي؟
‒ بارلىعى جاقسى. ءبىز كۋرورتقا كەلگەن جوقپىز, سايىسقا كەلدىك. سوندىقتان بارلىعىنا دايىنبىز. الەۋمەتتىك جەلىدە شۋلاپ ايتىپ جۇرگەن كارتوننان جاسالعان كەرۋەرتتەر ىڭعايلى. ساپاسى دا كەرەمەت.
‒ توكيوعا كەلگەننەن كەيىن بىردەن جاتتىعۋ جاساۋعا مۇمكىندىك بولدى ما؟
‒ ءبىز ءبىرىنشى كۇننەن باستاپ جاتتىعۋدى باستاپ كەتتىك. العاشقى جاتتىعۋدى كەلگەن كۇنى-اق اشىق الاڭدا جاسادىق. ەكىنشى كۇننەن باستاپ جاتتىعۋدى زالدا وتكىزىپ ءجۇرمىز.
‒ اۋا-رايىنا, جەرگىلىكتى ۋاقىتقا بەيىمدەلدىڭىزدەر مە؟
‒ توكيودا ىلعال كوپ. ىستىقتاۋ. بىراق ءبىز جاتتىعۋدى كەشكە جاساپ جاتىرمىز. بىزدە ەشقانداي پروبلەما جوق. جەرگىلىكتى كليماتقا دا, اۋا-رايىنا دا ۇيرەنىپ الدىق.
‒ وزبەكستان قۇراماسىنىڭ بوكسشىلارى توكيوعا ەرتە كەلگەن ەكەن. ال قازاقستان بوكسشىلارى نەگە ەرتە كەلمەدى؟
‒ ءبىز الماتىداعى «اقبۇلاق» وليمپيادالىق ورتالىقتا ەكى اپتا بويى كارانتيندىك تالاپتاردى ساقتاي وتىرىپ, تىڭعىلىقتى جاتتىعۋ جاسادىق. وليمپياداعا قاتىساتىندارعا ەكىنشى-ءۇشىنشى ءنومىرلى بوكسشىلار كومەكتەستى.
‒ توكيودا قۇرامانىڭ جوسپارى قانداي؟
‒ اركىمنىڭ ءوز جوسپارى بار. بىراق دايىندىقتىڭ ناتيجەسىن رينگ كورسەتەدى. باق پەن باپ قاتار كەلسە, بارلىعىنىڭ دا جۇلدە الۋىنا مۇمكىندىگى بار.
‒ «قازاقتىڭ سالماعى» ‒ 69 كيلوداعى ابىلايحان ءجۇسىپوۆ ءوزى قاتىسقان سوڭعى تۋرنيرلەردە ولجا الماي ءجۇر. مۇنى نەمەن تۇسىندىرەسىز؟
‒ ابىلايحان ءسوز جوق تالانتتى بوكسشى. بىراق بۇل سالماقتا زامكوۆوي, باتۋروۆ, سوتولونگو سىندى مىقتىلار بار. ولارمەن تەڭ دارەجەدە جۇدىرىقتاسۋ دا وڭاي ەمەس. وسىلاردىڭ قايسىسى مىقتى بولادى, سول چەمپيون اتانادى.
‒ ءابىلحان امانقۇل كوبىنە جاراقات الىپ جاتادى. قازىر جاعدايى قالاي؟
‒ ءابىلحان قازىر بابىندا. ازيا چەمپيوناتىندا جاقسى جۇدىرىقتاسىپ شىقتى. توكيودا دا جاراقات الماي بوكستاسىپ شىقسا, ءابىلحاننان ناتيجە كۇتەمىز.
‒ بەكزات ەكىنشى بەكزات بولا الا ما؟
‒ سۇراعىڭىزدى ءتۇسىندىم. بەكزاتتىڭ جەرەبەسى وڭاي ەمەس. ونىڭ الداعى قارسىلاسى يمام حاتاەۆ دەگەن رەسەيلىك مىقتى بوكسشى. ءتۇبى سونداي-اق داعىستاندىق يسپانيانىڭ اتىنان شىعاتىن بوكسشى ول دا اجەپتەۋىر قارسىلىق كورسەتە الادى. سوندىقتان بەكزاتقا العاشقى كەزدەسۋدە جەڭىسكە جەتۋ ماڭىزدى. وليمپيادادا ءبىز بەكزاتتان ءۇمىت كۇتەمىز.
52 كگ
ساكەن بيبوسىنوۆ – يانكيەل ريۆەرا (پۋەرتو ريكو)
57 كگ
سەرىك تەمىرجانوۆ – رولاند گالوس (ۆەنگريا)
63 كگ
زاكىر سافيۋللين – لەودان پەزو (پەرۋ)
69 كگ
ابىلايحان ءجۇسىپوۆ – قارسىلاسى كەيىن انىقتالادى
75 كگ
ءابىلحان امانقۇل – قارسىلاسى كەيىن انىقتالادى
81 كگ
بەكزاد نۇرداۋلەتوۆ – قارسىلاسى كەيىن انىقتالاجى
91 كگ
ۆاسيلي لەۆيت – ەممانۋەل رەيەس (يسپانيا)
+91 كگ
قامشىبەك قوڭقاباەۆ – ەسري رەز مۇستافا (ەگيپەت)
+75 كگ
نادەجدا ريابەتس – تامارا تيبەلت (كانادا)
الماس ماناپ»,
«Egemen Qazaqstan»
توكيودان (جاپونيا)
