بايتەرەك اۋدانى اكىمى قاتاڭ سوگىس الدى

وقيعا بىلاي بولعان: 17 شىلدە كۇنى كەشكىسىن بايتەرەك اۋدانىنداعى جايىق اۋىلى تۇسىندا جاعاجايدا 150-دەي حالىق جينالعان كوپشىلىك ءىس-شارا وتكەن. ارنايى قۇرىلعان، قىزىل-جاسىل شامدارمەن جابدىقتالعان ساحنادا ەكى ەركەك پەن ءبىر ايەل تىر جالاڭاش شەشىنىپ، بيلەپ جاتقانى تۇسىرىلگەن بەينەجازبا از ۋاقىتتا حالىققا تاراپ، جۇرتتىڭ اشۋ-ىزاسىن تۋعىزدى. بىرىنشىدەن، پاندەمياعا بايلانىستى «قىزىل ايماق» مارتەبەسىندەگى وبلىستا مۇنداي كوپشىلىك ءىس-شارا قالاي ۇيىمداستىرىلعان؟ ەكىنشىدەن، ادەپ قاعيدالارىن اياققا تاپتاعان مۇنداي ارسىز كورىنىستى اشىق دالادا وتكىزۋشىلەر كىمدەر؟ 

«بايتەرەك اۋدانىنداعى ترەكين اۋىلدىق وكرۋگىنە قاراستى جايىق اۋىلىندا جاڭا جاعاجايدىڭ اشىلۋىنا وراي ءىس-شارا ءوتىپ، وعان 150-دەي ادام قاتىسقان. بۇل جونىندە ءبىزدىڭ مەكەمەگە پوليتسيا دەپارتامەنتىنەن ءىس ماتەريالدارى كەلىپ ءتۇستى. وسى ءىس-شارانىڭ ۇيىمداستىرىلۋىنا مۇرىندىق بولعان كاسىپكەر دۇيسەكەنوۆكە 670 مىڭ تەڭگە ايىپپۇل سالۋ جونىندە شەشىم قابىلداعالى وتىرمىز»، دەدى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆ.

باتىس قازاقستان وبلىستىق پوليتسيا دەپارتامەنتى باسشىسىنىڭ ءبىرىنشى ورىنباسارى، پولكوۆنيك مەرحات اجەنوۆتىڭ ايتۋىنشا، جاعاجايداعى ارسىز كورىنىستى ۇيىمداستىرعاندار «ۇساق بۇزاقىلىق» بابىمەن جاۋاپقا تارتىلادى. قازىر كىنالى ادامدار انىقتالىپ جاتىر.

ءبىر قىزىعى، اۋداندا رەسمي تۇردە اشىلعان ەكى-اق جاعاجاي بار ەكەن. جوعارىداعى وقيعا ەسەپكە الىنباعان ءارى جەكەمەنشىك اۋماققا تيەسىلى جەردە وتكەن كورىنەدى. سوندىقتان دا مونيتورينگتىك توپتاردىڭ نازارىنا تۇسپەي قالعان. بايتەرەك اۋدانىنىڭ اكىمى مارات توقجانوۆ بولعان وقيعانىڭ ءمان-جايىن انىقتاپ جاتقانىن، كىنالىلەر جاۋاپقا تارتىلاتىنىنا ۋادە بەردى.

ء«بىر توپ ادام كارانتين تالاپتارىن بۇزىپ، مادەنيەتكە جات قىلىقتارىمەن وبلىستى ەل الدىندا قارابەت قىلدى. وسىنداي كورگەنسىز ارەكەت جاساعانداردى، بەيادەپ ءىس-شارانى وتكىزۋگە اتسالىسقانداردى قاتاڭ جازالاۋ قاجەت. بايتەرەك اۋدانىندا كارانتيندىك تالاپتاردىڭ ساقتالۋىن قاداعالاۋ ءتيىستى دەڭگەيدە ەمەستىگى بەلگىلى بولدى. سول سەبەپتى اۋدان اكىمى مارات توقجانوۆقا قاتاڭ سوگىس جاريالايمىن. وسى اۋدان اكىمىنىڭ يدەولوگياعا جاۋاپتى ورىنباسارىنا، وقيعا بولعان اۋىلدىڭ اكىمى مەن وقيعاعا جول بەرگەن مونيتورينگ توپ باسشىسىنا قاتىستى ءتيىستى دەڭگەيدە تارتىپتىك شارا الۋدى تاپسىرامىن. جاعاجايدى جالعا بەرگەن كاسىپكەردى جانە جالعا العانداردى قاتاڭ جازالاعان دۇرىس. دەمالىس كۇندەرى جاعاجايلار مەن باسقا دا كوپشىلىك تىنىعاتىن ورىندار جابىلسىن دەگەن باس سانيتار دارىگەردىڭ ۇسىنىسىن قولدايمىن»، دەدى وبلىس اكىمى عالي ەسقاليەۆ.