مەشىتتى قايتا قالپىنا كەلتىرۋ تۋرالى حابار تاراي سالا بەسقاراعاي اۋدانى مەن سەمەي قالاسىنىڭ تۇرعىندارى ورتاق قازانعا قارجى قۇيا باستاعان. ماتەريال الۋعا اقشا جينالعان سوڭ مەشىتتىڭ ماڭايىنداعى اۋىل تۇرعىندارى دەمالىس كۇندەرىن قۇرىلىسقا ارناپ ءجۇر. ءبىرى كىرپىشىن جەتكىزسە, ەندى ءبىرى تسەمەنت الىپ كەلگەن. ايتقانداي, كونە مەشىت سەمەي – پاۆلودار تاس جولىنىڭ بويىندا ورنالاسقان.
مەشىت مادەني, تاريحي نىسان بولعاندىقتان, قايتا قالپىنا كەلتىرۋ جۇمىستارى الدىمەن تالقىلاندى. ءوڭىردىڭ ولكەتانۋشىلارى, مەشىتتى جوندەۋمەن اينالىساتىن بەلسەندىلەر جينالىپ, اقىلداستى. اكىمدىك وكىلدەرى قۇجات جۇمىستارىن رەتتەۋدى قولعا الىپ, ساراپتاما جۇرگىزبەك.
– قالاي بولعاندا دا, الدىمەن ساراپتاما جۇرگىزۋ كەرەك. مەشىت تاريحي نىسان رەتىندە مەملەكەت قورعاۋىندا. جوندەۋدى ليتسەنزياسى بار كومپانيالار جۇرگىزۋى كەرەك ەدى. قۇجات جۇمىستارىنان كەيىن بۇل نىساندى 2022 جىلعا ارنالعان جوندەۋ جوسپارىنا قوسۋ تۋرالى ۇسىنىس ەنگىزبەكشىمىز. بىراق جۇمىس باستالىپ كەتكەندىكتەن, ولاردى توقتاتپايمىز, – دەپ اتاپ ءوتتى شىعىس قازاقستان وبلىستىق تاريحي-مادەني مۇرانى قورعاۋ جونىندەگى مەكەمەسىنىڭ قىزمەتكەرى ماقسات قۇسايىنوۆ.
مەشىت اعاشتان كوتەرىلگەندىكتەن, قايتا قالپىنا كەلتىرۋ وڭايعا تۇسە قويمايدى. مۇنارانىڭ ءوزى قيسايىپ كەتكەن. بيىلشا شاتىرىن جاۋىپ, ەسىك-تەرەزەلەرىن سالىپ قويۋدى جوسپارلاعان. الداعى جىلدارى نىسان تولىعىمەن اياقتالسا, تۋريستەر توقتايتىنداي تانىمدىق ورىنعا اينالادى. قازىردىڭ وزىندە شەتەلدىك ساياحاتشىلار قىزىقتاپ, بۇرىلىپ جاتادى. كەيبىرەۋى قارجى اۋداراتىندارىن دا ايتىپ كەتكەن.
شىعىس قازاقستان وبلىسى
