«سايلاۋ تۋرالى» كونستيتۋتسيالىق زاڭعا ەنگىزىلگەن وزگەرىستەرگە سايكەس بيىلعى شىلدەنىڭ 25 كۇنى وتەتىن اكىمدەر سايلاۋىنا «اۋىل» حدپپ 104 ۇمىتكەردى ۇسىندى. ولار 13 وبلىستا تىركەلگەن.
كانديداتتاردىڭ سانى بويىنشا ەڭ كوپ وڭىرلەر – تۇركىستان جانە شىعىس قازاقستان وبلىسى (19 جانە 18 كانديدات), سونداي-اق اقتوبە مەن جامبىل وبلىستارى (16 ۇمىتكەردەن). «اۋىل» پارتياسىنىڭ ۇسىنعان بارلىق ۇمىتكەر بەكىتىلگەن تالاپتارعا ساي دەپ تانىلىپ, ايماقتىق سايلاۋ كوميسسيالارىنان كانديدات كۋالىكتەرىن الدى.
ۇگىت-ناسيحات جۇمىسىنىڭ كوپ بولىگى پاندەمياعا بايلانىستى قويىلعان تالاپتاردى ساقتاي وتىرىپ, ەلەكتوراتپەن تىكەلەي كەزدەسۋ ارقىلى وتپەك. سونىمەن قاتار ۇمىتكەرلەردىڭ دايىنداعان باعدارلامالارى جەرگىلىكتى بۇقارالىق اقپاراتتار قۇرالدارى ارقىلى جانە قاعاز جۇزىندە بەرىلەتىن ماتەريالدار ارقىلى تاراتىلادى. الەۋمەتتىك جەلىلەر مەن قولدانىستا كەڭىنەن پايدالانىلاتىن مەسسەندجەرلەر دە ۇگىت-ناسيحات جۇمىسىندا قولدانىلاتىن بولادى.
كانديداتتار باعدارلامالارىنىڭ نەگىزگى بولىگى «اۋىل» پارتياسىنىڭ پلاتفورماسى مەن جارعىسىنا سايكەس كەلەدى. ولار – اۋىل ينفراقۇرىلىمىن جاقسارتۋ, الەۋمەتتىك ماسەلەلەر, جۇمىسسىزدىقپەن كۇرەس, اگروونەركاسىپتى دامىتۋ, ءبىلىم بەرۋ مەن دەنساۋلىق ساقتاۋ نىساندارىنىڭ قولجەتىمدىلىگىن قامتاماسىز ەتۋ.
«اۋىل» پارتياسىنىڭ ۇسىنعان 104 كانديداتىنىڭ بارلىعى – اۋىل تۋماسى. ورتا جاسى 35 پەن 45 اراسىندا. ۇمىتكەرلەردىڭ 11-ءى – ايەل. كانديداتتاردىڭ ورتاشا ەڭبەك ءوتىلى – 10-15 جىل.
كانديداتتار ۇسىنىلعان وڭىرلەردە «اۋىل» پارتياسىنىڭ سەنىمدى وكىلدەرى مەن بايقاۋشىلارى جۇمىس ىستەيتىن بولادى, دەپ حابارلادى «اۋىل» پارتياسىنىڭ ءباسپاسوز قىزمەتى.
«ەگەمەن-اقپارات»
