جۇمىسىن 2011 جىلى 15 ءتۇرلى مەديتسينالىق بۇيىمداردى وندىرۋدەن باستاعان زاۋىت بۇگىندە 400-گە جۋىق فارماتسەۆتيكالىق زاتتاردى ەلىمىزگە دە, كورشىلەس مەملەكەتتەرگە دە ەكسپورتتايدى.
زاۋىتتا توقىلماعان ماتەريالدان جاسالعان بىررەتتىك ستەريلدى ەمەس ء«ناريا» مەديتسينالىق حالاتتارى, حيرۋرگيالىق كيىمدەر جيىنتىعى, اسا جۇقپالى جانە ينفەكتسيالىق اۋرۋلاردان ساقتانۋعا ارنالعان بەتپەردەلەر مەن شپريتستەر, سونداي-اق, سيستەمالىق قۇرالدار, ءسپيرتتى سالفەتكالار مەن بينت, لەيكوجاپسىرمالار, وتا جاساۋعا ارنالعان قۇرال-جابدىقتار جيىنتىعى وندىرىلەدى.
سونداي-اق, مۇنداعى جۇمىسشىلارعا دا جاعداي جاسالعان. جۇمىسقا جاڭادان ورنالاسقان ازاماتتار تەحنيكا ءتىلىن مەڭگەرۋ ءۇشىن ارنايى كۋرستاردى تەگىن وقىپ, كاسىپكە ۇيرەنەدى. تاعى ءبىر ايتا كەتەرلىگى, كاسىپورىندا بالالار ۇيىنەن شىققان, تۇرعىن ءۇيى جوق جاندارعا زاۋىت ىشىنەن سالىنعان 100-گە جۋىق ورىندىق جاتاقحانا مەن اسحانانىڭ تەگىن قىزمەتى كورسەتىلەدى.
اتالعان زاۋىتتىڭ جۇمىسىمەن جامبىل اۋدانىنىڭ اكىمى ساكەن ارۋباەۆ بارىپ تانىستى. بۇل رەتتە «Super Pharm» جاۋاپكەرشىلىگى شەكتەۋلى سەرىكتەستىگىنىڭ ديرەكتورى قايرات قايمولداەۆ كاسىپورىن وسى كۇنگە دەيىن مەديتسينالىق بۇيىمداردى ءوندىرۋ ءۇشىن شيكىزاتتى سىرتتان تاسىمالداپ كەلگەن بولسا, ەندى سول شيكىزاتتى ءوندىرۋ ءۇشىن زاۋىت اۋماعىندا ۇلكەن كورپۋستىڭ جۇمىسى باستالعانىن ايتتى.
كەلەشەكتە زاۋىتتىڭ قۋاتتىلىعى ارتىپ, جۇمىسپەن قامتىلاتىن ازاماتتار قاتارى دا ارتاتىن بولادى. قۇرىلىس جۇمىستارى مەن قاجەتتى قۇرىلعىلاردى ورناتۋ ءۇشىن اتالعان سەرىكتەستىك تاراپىنان 1,7 ميلليارد تەڭگە جۇمسالىپتى. ەندى شيكىزات وندىرەتىن كورپۋستىڭ قۇرىلىسى كەلەسى جىلدىڭ مامىر ايىندا تولىق اياقتالىپ, 100-گە جۋىق ادامدى جۇمىسپەن قامتيتىن بولادى. سونداي-اق, بۇل كورپۋستا مۇناي قالدىقتارىنان اۋىلشارۋاشىلىق, جول جاساۋ, قۇرىلىس زاتتارىنىنا دا قاجەتتى شيكىزات وندىرىلەدى.
جامبىل وبلىسى
